Read Chang Naga LEVI 23 Bible Online

LEVI 23 - Chang Naga bible

LEVI 23

¹BUNYUBOUei Mosa to laukei,

²Israelbü shousi shuong to lenashi, BUNYUBOU shanga pienbü lemsilang shuong laobou kanei saopobü kambü dogo ngetijan khübü khokei ngei saüenbü lem ki.

³Chalou laknyet kümsilei kümlabü, lausikei nyetbounyet atshaitham haksoko noulabü, Nounyet saopobü kambü kia; kanei ai kümsilei akümjan; ho BUNYUBOU shanga kan kishang pendoua Nounyet ki.

⁴Habü ho BUNYUBOU saopoenbü lem, khei saopobü kambü ho kanei pienbü jiha ngetilabü.

⁵Shaangbou lita chalou anthük leiboubü chasemlama BUNYUBOU kojung danbü lem ki.

⁶Hobaje lit jeteibü chalou anthük ngaoboubüa BUNYUBOU shanga tokai ajinbü wentek lem ki.

⁷Shaangbou nyet kanei saopobü kambü che kijan hoba kanei kümsilei akümjan.

⁸Lausikei chalou nyet kanei BUNYUBOU shanga wanei lembü kijan; nyetbounyet saopobü kambü kia; kanei kümsilei kaangbü akümjan.

⁹BUNYUBOUei Mosa to laukei, Israel shousi shuong to lenashi, ladang kanla ngei kubü kaonyek to kan loulaje hoba khünei sek latlaje kheijinei kanei shaangbou hek youman ungshedbou jungto sungbajan;

¹¹hoba kan shanga sungletlabü hoba haoei BUNYUBOU thedanga youman kho jipeilabü; Nounyet danan nyibounyet ungshedbouei kho jipeijan.

¹²Hobaje kanei youman jipeibü chaloua BUNYUBOU shanga juokbü lembü shanga po cheeibü shou sanlon paang nali athebü cheei kanei lemjan.

¹³Hobaje ponlem maibü shanga BUNYUBOU to wanei lembü shausiyung lembü kho wen inyaibü onang to nyatyoan efa phejan ana penyi yingjan; hoba yunglabü lembü kho ih hin phejan leiboubü.

¹⁴Kho chalou asüh shongko kaneibü Mühghaü lembü kho jungan alou shongko kanei wentek yingsikei ang si thengbü ayingsi haanbü nyak ngoubü yingsikei ashaujan, ho kan kishang pendoua kan meten sünga ponpen shanga ki.

¹⁵Hobaje Nounyet wanan nyibounyet ka kanei jipbü lembü shanga youman sungbabü chalou ka bale nyet danan phaia kanei wean chühjan.

¹⁶Khei balenyet danan phaia nyibounyet ka kanei chalou anjinsem wejan; hoba kanei BUNYUBOU shanga shausiyung lembü haanbü kujan.

¹⁷Kan kishang ka wentek yaangbü penyi jipbü lembü shanga efa an phejana penyi kanei sungbajan; khübü kho wen inyaibü tokai yoan kümbü shaangbou hek BUNYUBOU shanga kilabü.

¹⁸Hobaje wentek yoa khünei nali athebü po cheeibü shou sanlon paang nyet hoba masu pongsu shoushou che, hoba sanlon paang penyi kanei kujan; shausiyung hoba yunglabü lembü, ponlem maibü shanga BUNYUBOU to lembü yo khünei habü ho BUNYUBOU to lembü kilabü.

¹⁹Hobaje shabü lembü shanga lon paang che hoba sangmai lembü shanga po cheeibü shou sanlon penyi kanei lemjan.

²⁰Hobaje BUNYUBOU junga sanlon shoushou penyi yo khünei hoba jipbü lembü shanga shaangbou buhek wentek yo khünei ungshedbouei khübü kho jipjan, ungshedbou shanga BUNYUBOU junga khübü kho saopobü kilabü.

²¹Hobaje khünyet tham kanei khong ngeklabü; kan shanga saopobü kambü kilabü; kanei nyishou tegü kümsilei kongkongle akümjan, kanei meten sünga kan kishang pendoua ho ponpen ngühkhüm kilabü.

²²Hobaje ladang kanei sek latdaje nyi kaibü sek phajib sühko alatjan, ayingsi kaibü sek ka youman atbü si maabü nyi ahejan; nyi khübü kho shalebü si yenbou shanga apyokuashi; ngo BUNYUBOU kaneibü Mühghaü kia.

²³BUNYUBOUei Mosa to laukei, Israel shousi shuong to lenashi, lit nyetboubü lita shaangbounyet teklaang metbü hoba saopobü noknyüh kamshai kibüei, kan haksomang maiko kijan.

²⁵Kanei nyishou tegü kümsilei kongkongle akümjan; hoba BUNYUBOU shanga kanei wanei lembü kujan.

²⁶BUNYUBOUei Mosa to laukei, ho lit nyetboubü chalou anbounyet tükdea saumei saülabü ki; ho kan shanga saopobü noknyüh kambü kilabü, hoba kanei kaneibü soushou shanga mühei nyengko kan jembü soushou shanga khonsakjan, hoba BUNYUBOU thedanga wanei lembüsabü lembü kanei kujan.

²⁸Hobaje khünyet kanei kümsilei ai teküm; aishanga BUNYUBOU kaneibü Mühghaü thedanga kan shanga saüsimaü saumei saütila ho saumeisaübü chalou ki.

²⁹Aishanga khünyet aoyouei jembü lulu khon asaklaje jembü mütli ka wapan aplabü.

³⁰Hobaje khünyet aoyouei kümsilei at ongkei kümlaje, kho müt ngei hao mütli ka mautilabü.

³¹Kanei kümsilei aikei akümjan; kan kishang pendoua kan meten sünga ho ponpen shanga ngühkhüm ki.

³²Ho kan shanga kaangkosekko haksobü nou ki, hoba kanei jembü lolo mühei nyengko khonsakjan; lit güboubüa chasem ka chasem sühko kanei kaneibü Nounyet phojan.

³³BUNYUBOUei Mosa to laukei, Israel shousi shuong to lenashi, ho lit anthük ngaoboubü kho BUNYUBOU shanga Dipchem lem nyetboubüa chalou nyetnyet kia.

³⁵Shaangbounyet kho noknyüh saopobü kambü che kilabü; kanei kümsilei kaangbüsekbü aikei akümlabü.

³⁶BUNYUBOU shanga wanei lembü nyetnyet kanei lembü kujan; setbounyeta kan shanga noknyüh saopobü kambü kilabü, hoba BUNYUBOU shanga wanei lembü kujan; ho kaangkosekko noubü kambü ki; kanei kümsilei kaangbü sekbü aikei akümjan.

³⁷(Habü ho chalou angboua lemlabü takletbü songle lemsilang ki, khei laonyet kanei BUNYUBOU la wana juokko lembü kulabü kaneibü shausiyung lembü, juokbü lembü hoba yunglabü lembü ki.

³⁸Khübü lembüsabü shuong kho songle Nounyet hoba kaibü jongsak shuong hoba nyi theletlanletbü hoba BUNYUBOU la maangmai jongsak lembü sungbabü to liman kilabü.)

³⁹Kanei ladang kaonyeka buhek yoshailaje, lit nyetboubü chalou anthük ngaoboubüa kanei BUNYUBOU lem kho nyetnyet noujan, shaangbounyet kho youjemnyet kilabü, hoba setbounyet khokei aeila khümbo kubü haksonyet kilabü,

⁴⁰Hobaje shaangbounyet kanei hemaibü bunyu buhek, pünglong bhek, ik hongmaibü bunyem hoba shumanga kibü willo bunyem sungbalabü, hoba chalou nyetnyet BUNYUBOU kaneibü Mühghaü thedanga kanei olinyolabü.

⁴¹Hobaje kanei ho poa nyetnyet BUNYUBOU shanga lem kilabü, ho kan shanga meten sünga ponpen shanga ngühkhüm ki; kanei ho lit nyetboubüa noujan.

⁴²Nyetnyet kan dipchema kilabü; ngei kan Ijep kaodak ka leiyenjinei; Israel shousi shuong dipchema kitikei dogo kaneibü meten shuongei ngela shanga

⁴³Israel bukmüt pendou dipchema kijan; ngo BUNYUBOU kaneibü Mühghaü ki.

⁴⁴Hobaje Israel shousi shuong la BUNYUBOUei pienbü lemshuong shanga Mosaei ngetikei.