Read Chang Naga LEVI 24 Bible Online

LEVI 24 - Chang Naga bible

LEVI 24

¹BUNYUBOUei Mosa to laukei,

²Athakko wanthung jikan phola Israel shousi shuong to wanthung oliv onang nitbü lanbü ka jungto sungbatila sakkushi.

³Kamshang neichem ngühkhüm busen thüka Aronei kho chasem ka ngeyang sühko BUNYUBOU thedanga jiktian phokulabü, kan meten sünga ho ponpen shanga ngühkhüm che kilabü.

⁴Haoei hon lanbü wanthung denshang khünei BUNYUBOU junga wanthung jiktian phokulabü.

⁵Hobaje nyi wen inyaibü sungan khoei wentek anthüknyi kümjan; wentek chenei efa an phejana phejan penyi kilabü.

⁶Hobaje hon lanbü khümsok thüka BUNYUBOU junga nyi khübü kho lin penyi, lin weko lakbang phojan.

⁷Hobaje BUNYUBOU jungto wanei lembü tegü damenlabü wentek yingla lin wekoa jen hinseibü phokushi.

⁸Nounyet weko haoei kho küpjembo BUNYUBOU junga khei ong phokujan; ho Israel shousi shuong shanga ponpen theyolanyobü kilabü.

⁹Hobaje kho Aron hoba haoeibü shousi shuong shanga kilabü hoba kho haoenei lemshanga shaujan, aishanga ho ponpen ngühkhüm, wanei BUNYUBOU to lembü yongko saopobü lembü ki.

¹⁰Hobaje Israel saoeibü shou che, aoeibü bou Ijepbü kikei, Israelbü yoa haukei, hoba Israel saoeibü shou si Israelbü che kho shaishanga oyo khangkei hoba Israel saoeibü shouei Mühghaü nyen to nyikuko khükkeiuokkei, hibü haoenei hao Mosa jungto leibakei, aoeibü nyu nyen kho Dan phang ka Dibri nouyangshou Shelomit kikei.

¹²BUNYUBOU maang- angbü ai kho angeti shongko haoenei hao khinan phokei.

¹³BUNYUBOUei Mosa to laukei,

¹⁴“Shaishang khongmaang to aoei khükkeiuokkei hao leiba. Hobaje haoei laubü ditbü pendouei ikei haoeibü khua shangetan shuong pendouei hao to laangei sonlabü.

¹⁵Hobaje nyi Israelbü shousi shuong to lenashi, aoei ong jembü Mühghaü to khüklauoklaje haoei jembü shabü künlabü.

¹⁶Hobaje aoei BUNYUBOUeibü nyen aweasünglaje maimaitham haoje haitilabü, maimaitham shuong pendouei hao to laangei sonlabü, küksithang yingsikei sangbüshou yingsikei, ladang haoei BUNYUBOU nyen shalaje haitilabü.

¹⁷“Hobaje aoei müt che hailabü lele leilutilaje maimaitham haitilabü.

¹⁸Hobaje aoei shatsinam to hailabü lele leilutilaje kho shemtilabü; langkei jeila langkei.

¹⁹“Hobaje müt atei jembü lepbou la leilutia longa; haoei kümbü tegü haoeikei kümlabü.

²⁰Leilubü jeila leilubü, nyek jeila nyek, hau jeila hau, haoei müt la nali thetibü tegü haolakei thetilabü.

²¹Aoei meisiau haitilaje kho shemtilabü; hoba aoei müt haitilaje hao haitilabü.

²²Küksithang yingsikei, sangbüshou yingsikei, kan ngühkhüm che ong kilabü, aishanga ngo BUNYUBOU kaneibü Mühghaü ki.”

²³Kho tegü Mosaei Israel shousi shuong to joyokei hoba aoei shaishang khongmaanga khükkeiuokkei hao leibakei, hoba laangei tetkei. Kho tegü Israel shousi shuongei BUNYUBOUei Mosa to lenbü tegü kümbei.