Read Chang Naga LEVI 25 Bible Online

LEVI 25 - Chang Naga bible

LEVI 25

¹BUNYUBOUei Mosa to Sinai shongha laukei,

²Israel shousi shuong to lenshi, ladang ngei kan la kubü kaonyek to kan loulaje kheijinei BUNYUBOU shanga kaonyeka nou che noulabü.

³Po lak nyi kaibü seka kela onglabü hoba po lak nyi kaibü semlühlaaka bhek wapan aplabü, hoba khoeibü hek thanan pholabü.

⁴Lausikei po nyetboua kaonyek shanga khümbo kuan noubü nou po kilabü, kho BUNYUBOU shanga nou; nyi seka kesiong ajinlabü, hoba kaibü semlühlaak ka bhek wapan üplabü.

⁵Kaibü seka ai ong yemlaje nyi kho alatjan hoba nyi semlüh wapan üpbo kibü ka semlüh akheijan; kho kaonyek shanga khümbomeiko hakso po kilabü.

⁶Hobaje noubü poa kaonyuei ai ong hekkulaje kho ka shanga, kaibü sambü shanga, sambüsao shanga hoba ka yoa mulambü sambü hoba ka yoa homan kibü yenbou shuong shanga shausiyung kilabü.

⁷Hobaje kaibü samkeisamok hoba yamkabü meisiau shanga kho ka longbü pendou shausiyung kilabü.

⁸Kanei po shuong Nounyet wejan, nyetnei nyet po; kaneibü po shuong Nounyet penbü, po saonyito gü kilabü.

⁹Kheijinei nyi lit nyetboubü chalou anboubüa nyi teklaang ngüh yaangbü pendou aeto hautijan; saumei saünyet ka kanei kaneibü kaon- yek pendou to teklaang ngühlang hautijan.

¹⁰Hobaje anjinsem boubü po kho kanei saüenlabü, hoba kaonyek pendoua müt pendou to dongebü thu ngekletkulabü; kan shanga ho jubilee kilabü hoba kan mütpem weko jembüei kibü peisilei lambo sepeijung ngailabü, hoba kan mütpem weko jembü chempen jungto sepeijung ngailabü.

¹¹Kan shanga ho po anjinsem onbü jubilee kilabü, kanei akeaonglabü ayingsi khünei hao lolo yembükei alatlabü ayingsi wapan üpbhembo kibü ka semlüh hek akheilabü.

¹²Aishanga ho Jubilee ki, ho kan shanga saopobü kilabü, sek ka ai longkei kho kanei shaulabü.

¹³Kho Jubilee Po kan mütpem weko jembü nyaksinam jungto sepeilabü.

¹⁴Hobaje nyi kaibü sangbüyambü la kao at kuan kisi ayingsi kaibü sangbüyambü ka jekan kisi kan cheei che to lepbolangko akümjan.

¹⁵Jubilee po lühbak tetan nyi kaibü lepbou ka jekjan, hoba langle kesiong longlabü po wean chühjan, haoei ka la yaakkujan.

¹⁶Po juong yingalonga munam kho kho thüng yaang kilabü, po kho shisho ong yingalonga munam kho thüng shian kilabü, aishanga langle longlabü lühbak tetan chühan ka la yaaklabü ki.

¹⁷Hibü kan cheei che akhüpettijan, lausikei nyi kaibü Mühghaü to hatjan, aishanga ngo kaneibü BUNYUBOU Mühghaü ki.

¹⁸Hibü kanei ngeibü ngühkhüm phai semashi hoba ngeibü matjem to ngüha leashi, hoba khübü kho jungeiashi, hoba kan kaonyeka püetan kilabü.

¹⁹Hobaje kaoei kan la haoeibü hek hekkulabü hoba kan shi shenko shaulabü hoba kan khünei püetangetan kilabü.

²⁰Hobaje kanei akeaonglonga hoba sek alatlonga po nyetboubüa künei ai shaula dogo kanei laualonga,

²¹ngei po lakboubüa po sem heklabü mai hektilabü lele ngei kan thükto haülabü hautikulabü.

²²Hobaje po setboubüa kanei kesiong jinjinei hangbü nyak shauko kilabü, hoba po güboubü nyaka ashuok shongko hangbü nyak shauko kilabü.

²³Kao kho ponpen lole shanga ayaakjan; aishanga kao kho ngeibü ki; aishanga kan kü yoa yenbou hoba pensiyen shuong ki.

²⁴Hobaje kanei phetphan kibü kao pendoua kanei kao shanga angnam sakkujan.

²⁵Kaibü jaisina at shale phama longa hoba haoei nyaksinam at yaakalonga kheijinei hao nyangbü chempen at louan haoeibü jaisinaei yaakbü kho angngailabü.

²⁶Müt atei kho angngailabü chempen akilonga hoba müt kho angngailabü lele keian apan kialonga,

²⁷haoei kho yaakbü chalou ka po wean chühlabü hoba haoei yaakbü müt kho la joubü shanga ngaingoulabü hoba haoei jembü nyaksinam lengailabü.

²⁸Lausikei haoei kho nyibou lengaila nam akilonga, haoei ai yaakkei kho jekbou ika jubilee po asüh shongko kilabü; jubileea haoei litilabü, hoba haoei haoeibü nyaksinam nyibou lengailabü.

²⁹Müt atei lelepan kibü sangnyu maanga kishang chem yaakan kisi kho yaakan po che onan phaiaje haoei kho jekngaila thükkei; po che sünga shanga haoei jekngaila janbü yinglabü.

³⁰Hobaje po che onan kho ajekngaiko kisi kheijinei lelepan kibü sangnyu phanga kibü chem kho aoei jekkei, meten sünga kho ponpen hao shangabü yeitilabü, jubilee poakei kho alitilabü.

³¹Lausikei sangnyua kibü chem shuong laobou kaijembo ba alekei, kaonyeka sek kibü to weyolabü; khübü kho angngaila thükkei, hoba jubilee poa khübü kho litilabü.

³²Khei yingsikei Levibü sangnyu shuong shanga, hoba haoeneibü sangnyua kibü chem shuong shanga Levibüei ladang lemang sühlaje kheijinei angngaila thükkei.

³³Hobaje Levibü cheei angngaibü janbü kho ajungeilonga haoenei phet phanan kibü chem che yaakan kibü kho jubilee poa litilabü, aishanga Israelbü yoa Levi phang sangnyua chem shuong kho haoen shangabü ki.

³⁴Lausikei haoeneibü sanglea sek ayaaklabü; aishanga kho ponpen haoen shangabü ki.

³⁵Hobaje kaibü jaisina shale phamalonga, hoba ka yoa hao jembü lolo athuienlonga kheijinei nyi hao to thuijan; yenbou hoba bou laman kibü tegü hao kitijan.

³⁶Nam ayingsi peisileia nyi aikei phopbü tele, lausikei kaibü jaisina ka yoa kilabü lele kaibü Mühghaü to hatashi.

³⁷Nyi phopnam leko nyi kaibü nam telotku, ayingsi hapngaila shanga kaibü shausiyung hao la teku.

³⁸Kan la Kanan kaodak kulabü hoba ngo kaneibü Mühghaü yinglabü; kan Ijep kaodak ka leiyenbü BUNYUBOU Mühghaü ngo ki.

³⁹Kaibü jaisina shale phambo ka junga kialonga hoba hao lolo ka la yaakalonga nyi hao jekthetbü aao che tegü ayeitijan.

⁴⁰Mulambü che tegü bou laman kibü che tegü ka yoa hao kilabü;

⁴¹kho phaia hao hoba haoeibü shousi shuong ka jungka satan aplabü, hoba jembü chempen hoba pisibou nyaksinam lamjung ngailabü.

⁴²Aishanga Ijep kaodak ka ngei leiyenbü haoen ngeibü sambü ki; haoen aao tegü ayaakjan,

⁴³Nyi hao thüka maanga yaman song adakjan;

⁴⁴hoba kaibü aao hoba aaosao yeila shanga no kaijembo kibü phangshuong ka haoen aao müt bousu si yaksa jekjan.

⁴⁵Tokei küksithang kan yoa homan kibü shousi shuong hoba kan yoa kibü chem- pen hoba haoen yoka kaneibü kaonyeka bukyohaayobü shuong haoen ka kanei jeklabü; khübü kho kaneibü yinglabü.

⁴⁶Hobaje ka phainei phet tegü haoen kaibü shousi shuongeibü yeitikulabü, hoba phet phantilabü; haoen kanei ponpen shanga aao jekla thükkei. Lausikei kaibü jaisina Israel shousi shuongje kan cheei che thüka maangayambo ajungeijan.

⁴⁷Hobaje yenbou ayingsi ka yoa homan kibü at, keialonga hoba kaibü jaisina che hao junga shale phaman kialonga hoba yenbou ayingsi homan kibü ka phanga kibü la yaakan kialonga ayingsi yenboueibü chempen la hao lolo yaakan apalonga,

⁴⁸haoei hao lolo yaaka tegükei thenbülenbü shuongei hao angngaila thükkei.

⁴⁹Ayingsi bou nashoubou ayingsi bou jaishouboueibü shousiei hao angngaila thükkei, ayingsi haoeibü thenboulenbou tegü atei hao angngaila thükkei; ayingsi hao keialonga haoei hao lolo angngaila thükkei.

⁵⁰Hobaje haoei hao lolo yaakbü po ka jubilee po sühko hauan hao jekbü müt yoa weyojan, hoba hao yaakbü munam kho po penbü thüng yingjan; hao mulambü sambü tegü hao yoa kilabü.

⁵¹Tokei po juong jouan kialonga khübü tetan hao jekbü nam ka hao angngaibü mu hao la kungaijan.

⁵²Hobaje jubilee po sühla poa shisho ong jouan kialonga kheijinei haoei hao yoa weyolabü hoba haoeibü po kho tetan chühan, haoei hao angngaibü mu kungailabü.

⁵³Po weko chale khüpbü sambü tegü hao thüka maanga yaman song adakjan.

⁵⁴Hobaje khübü khoei hao üangngailonga hao hoba hao yoa haoeibü shousi shuong jubilee poa solo haplabü.

⁵⁵Aishanga kü thedanga Israel shousi shuong sambü ki, haoen ngei Ijep kaodak ka leiyenbü ngeibü sambü shuong ki, ngo BUNYUBOU kaneibü Mühghaü ki.