Read Chang Naga LEVI 26 Bible Online

LEVI 26 - Chang Naga bible

LEVI 26

¹“Kanei kan shanga ai heangsho teküm, ayingsi heangsho jakenbü yingsikei, thaonyu yingsikei, kanei tepho, ayingsi kaneibü kaodaka khüpetla shanga aikei laangei küman tepho, aishanga ngo BUNYUBOU kaneibü Mühghaü ki.

²Kanei ngeibü Nounyet shuong nouashi, hoba ngeibü lemshang to sou hatashi, ngo BUNYUBOU ki.

³“Kanei ngeibü ngühkhüma paialonga, hoba sakkubü jungeialonga hoba khübü kho kümalonga;

⁴kheijinei ngei kan shanga jihsiphai paplepbüa lang yantikulabü, hoba kaoei jembü lang hekkulabü, hoba yama bunyuei jembü hek hekkulabü.

⁵Hobaje kaneibü youshou nakbü semlüh hek kheibü jih sühko kilabü, hoba kaneibü semlüh hek kheibü jih sühko kilabü, hoba kanei kaneibü shausiyung apsileko shaulabü hoba kan kaonyeka khümenan kilabü.

⁶“Hobaje ngei kaonyeka sangmai kulabü, hoba kan aitokei ühütko lengan kilabü. Hobaje meisiau amaibü ngei kaonyek ka shian sattikulabü, hoba kaneibü kaonyek danko in aikei adantikulabü.

⁷Kanei labou shieilabü hoba kan thedanga haoen inei tuonglabü.

⁸Kan müt ngaoei saongao shieilabü, hoba saongaoei hajar an shieilabü, hoba kaneibü dangbou kan thedanga inei tuonglabü.

⁹Hobaje ngei kan weeilabü hoba kaneibü lilabü bukyo haayotilabü, hoba kan haala yaanglabü, hoba ngeibü thebülanbü kan yoa kümlabü.

¹⁰Hobaje kanei hangbü nyak lounyu thanan phobü shaula kilabü, hoba haanbü shanga hangbü nyak pu kho sungenlabü.

¹¹Hobaje ngeibü lemshang neichem kan yoa phokulabü; hoba ngeibü soushouei kan amangsenlabü.

¹²Ngo kan yoa pailabü hoba kaneibü Mühghaü kilabü hoba kan ngeibü mütli yinglabü.

¹³Kan haoeneibü aaola ayeilabü shanga Ijep kaodak ka kan leiyenbou ngo BUNYUBOU kaneibü Mühghaü ki; ngei kaneibü kaangkhüh buleng leilutikua, hoba kan tangshaitham paitia.”

¹⁴“Lausikei kanei kü to ngüha alelonga, hoba habü sakkubü pendou akümlonga; hoba kanei ngeibü ngühkhüm asungletlonga,

¹⁵hoba ngei sakkubü pendou akümlonga ngeibü thebülanbü leilulabü lele kaibü soushouei ngeibü matjem mangsena longa,

¹⁶ngeikei kan to ho kümlabü; kaneibü nyek hoba kaushang lühko shatbü longtilabü lele ngei kan thükto hatlamoklabü khukushat hoba lühshatei sühtilabü; hoba kanei kaneibü kesiong amlang jim akibüa keanongan aplabü, aishanga kaneibü dangbou shuongei kho shaulabü.

¹⁷Ngeibü the kan khulimbo kilabü, hoba kaneibü dangbou thedanga kan phetetlabü; aoyouei kan to mangsenda haoenei kan thüka song daklabü; hoba aoeikei shijung aloujinei kan satyolabü.

¹⁸“Hobaje khübü kho shangakei kanei kü to ngüha alelonga kheijinei kaneibü shabü shanga ngei nyetneiei aei kan shieikoelabü.

¹⁹Hobaje kan tubüsekbü lilisese ngei leilutikulabü; hoba ngei kaneibü müh kho nam kaangbü tegü hoba kaneibü kao chisaknam tegü yeitikulabü.

²⁰Hobaje kaneibü hau amlanga aplabü, aieilausi kaneibü kaoei hek ahekkulabü, ayingsi kaneibü kaokabü bulongei lang ahekkulabü.

²¹Hobaje kanei kü to dangyoko kialonga hoba kü to ngüha alelonga, kaneibü shabü thüng kan thükto khonsak nyetneiei aei juongtikulabü.

²²Hobaje kaneibü shousi shuong haoenei solabü hoba kaneibü samkeisamuk shatsinam mautikulabü hoba shisho la ong yeitikuko kaneibü lam sangliphang la yeitikulabü lele ngei kan yoa yam ka meisiau litikulabü.

²³“Hobaje kho thepetbüei kan kü jungto asepei longa hoba kü to dangyoko kia longa,

²⁴kheijinei sepeian ngokei kan to dangbou la yeian kilabü, hoba kaneibü shabü shanga nyetneiei ngei kan khonkutilabü.

²⁵Hobaje kanei theyolanyobü leilubü shanga phoklamla ngei kan thükto in sungbakulabü; hoba kaneibü sangnyu shuong phanga liko onshaitikulabü; kan yoa ngei limsilang hautikulabü; hoba dangbou shuong ik to ngei khümbo kulabü.

²⁶Kan senetan kibü wentek kho ladang ngei sungngailaje, yaksa müt anei wen ngoubü chak chenei ong wentek kümlabü, hoba kan la wentek hauan chühan ong kulabü, hoba kanei shaulabü, lausikei senyüh ashemlabü.

²⁷“Hobaje habü pendou shangakei kanei kü ngüha alelonga hoba dangyoleyoko kialonga,

²⁸kheijinei ngo khauang longbü kan yoa dangyoko kilabü; hoba tokei kaneibü shabü shanga nyetneiei kan shieikoelabü.

²⁹Hobaje kanei kaneibü jayang nouyang shousi shuongeibü phe shaulabü.

³⁰Hobaje ngei kaneibü lemshang shongh leilukulabü, hoba kaneibü jenjuokbü lemshang heangsho shuong wapnyinkulabü hoba kaneibü haibü mang kaneibü heangsho thükto tekan jinkulabü, hoba ngeibü soushouei kan mangsenlabü.

³¹Hobaje ngei kaneibü sangnyu shuong leilukulabü, hoba kaneibü lemshang shakkei shakko phokulabü, hoba ngei kaneibü ponlem maibü lem ajemlabü.

³²Hobaje ngei kaonyek sangliphang la yeitikulabü, hoba khünei kibü kaneibü dangbou shuongei khünei maangpanglabü.

³³Hobaje kan phangshuong yoto lintilabü, hoba kan thükto ngei in setenlabü, hoba kaneibü kaodak sangliphang la yeitilabü, hoba kaneibü sangnyu shuong leiluan kilabü.

³⁴Hobaje lalokche sangli- phanga kilaje khülokche kaonyekei hoeibü nou noulabü, hoba kaneibü dangbou kaodaka kan kilabü, kheijinei ong kaonyekei haksoko hoeibü nou noulabü.

³⁵Kaonyek kho lalokche sangliphanga kida, khülokche hakso kilabü, khünei kan kijinei ühü- penbü hakso kilabü.

³⁶Hobaje kan jouletbü shuong shanga khei pik soujung satbü ngühlangei haoen shian aplabü lele haoen dangbou kaonyeka haoeneibü maangpona maangkou yuibü jinkulabü, hoba inei linbü tegütham haoen satyolabü hoba aoeikei shijung aloujinei haoen tuonglabü.

³⁷Hobaje aoeikei shijung aloujinei in thedanga haoen cheei che thüka phaiyetlabü; hoba kan dangbou thedanga lolabü, kan hau akilabü.

³⁸Hobaje kan phangshuong yoa maulabü, hoba kaneibü dangbou shuongeibü kaonyekei kan shauan aplabü.

³⁹Hobaje kan jouletbü dan kibü shuong kaneibü dangbou kaonyeka haoenei shed shonbüei pheijung ngailabü, hoba tokei nyuei bouei shed shonbü haangshong haoen pheijung ngailabü.

⁴⁰“Lausikei haoenei ngo khulimbo ngühkhüm lulimbü shanga hoba kü to dangyoko kibü shanga haoeneibü shabü hoba haoeneibü nyusibou shabü thekualonga,

⁴¹laobou laüa ngokei hao to jakan kila yeitikei hoba haoen dangbou shuongeibü kaonyek to leian loukei, tokei haoen kipan üpbü maangpon eaaoa ayeilonga hoba kheijinei haoenei luluei shed shonbü shanga shieikoe sungleda longa;

⁴²kheijinei ngei Jakob to ngeibü thebülanbü damenlabü; hoba tokei Isak to ngeibü thebülanbü hoba Abraham to ngeibü thebülanbü ngei damenlabü, hoba kaonyek kho ngei damenlabü.

⁴³Hobaje kaonyek kho haoenei apyolabü, hoba haoen akiko litham yeijinei hoeibü nou noulabü, hoba haoenei shed shonbü shanga shieikoe haoenei sungletlabü, khei haoenei ngeibü matjem asungletbü hoba haoenei ngeibü ngühkhüm mangsenbü haangshong ki.

⁴⁴Hobaje kho khei yingasikei khei haoen dangbou kaonyeka kibü hangshongkei haoen yoa ngeibü thebülanbü leilubüei haoen lepde mautilabü lele ngei haoen asungletko, ayingsi haoen mangsenkokei akitei; aishanga ngo BUNYUBOU haoeneibü Mühghaü ki.

⁴⁵Lausikei haoen dambo haoeneibü nyusibou aoyou phangshuong thedanga ngo haoeneibü Mühghaü lela shanga ngei Ijep kaodak ka haoen leiyenkei, haoen yoa lin- yobü ngei damenda; ngo BUNYUBOU ki.”

⁴⁶Sinai shongha Mosa danko BUNYUBOUei hao hoba Israel shousi shuong kanglanga kümbü ngühkhüm deikhüm hoba matjembü hoba ngühkhüm habü ki.