Read Chang Naga LEVI 27 Bible Online

LEVI 27 - Chang Naga bible

LEVI 27

¹BUNYUBOUei Mosa to laukei,

²Israel shousi shuong to lenshi, ladang müt cheei BUNYUBOU to phangche takletbü namei müteibü munam kümlaje,

³po saoche ka po saosem sühko bousu munam kümlaje lemshanga shekel kibü tegü, chandinam shekel anjinsem kijan; kho yaksa yingalonga munam kümbü kho shekel khujin kijan. Haoen kho po ngao ka saoche jai yingalonga bousueibü munam kho shekel saoche, hoba yaksa shanga shekel an. Haoen lit che ka po ngao sühko jai yingalonga bousu munam chandinam shekel ngao hoba yaksa shanga munam chandinam shekel sem. Haoen po saosem ka thükae sühko yingalonga munam kümbü kho bousu yingalonga shekel anthükngao hoba yaksa shanga shekel an.

⁸Lausikei munam kula hao aeibou shalea longa hao ungshedbou thedanga phokulabü, hoba ungshedbouei haoeibü munam tetlabü, mütei ai thükkei kho thüng haoeibü munam kümlabü.

⁹Meisiau che yingalonga, laobou BUNYUBOU la lemla kulabü ki, ai ong kho tegü meisiau mütei BUNYUBOU la kulaje noubüsoubü peisilei yingjan.

¹⁰Haoei kho lubü den che to ajeiyojan ayingsi maibü che amaibü che shanga; amaibü che maibü che shanga ajeiyojan; haoei meisiau che jeiko lubü che to jeiyoa tegükei, kheijinei kho hoba jeiyobou kho ham noubüsoubü yeilabü.

¹¹Kho asaopobü meisiau che yingalonga hoba kho BUNYUBOU la lemla akulabü meisiau yingalonga haoei kho ungshedbou thedanga phokulabü,

¹²hoba ungshedbou khoei maibü si amaibü nam tetlabü; ungshedbouei namtet tetbü tegü kho khei kilabü.

¹³Haoei kho angngaimang sühko kia tegükei haoei munam thükto ngaoboubü phejan jinkujan.

¹⁴Hobaje müt cheei jembü chem BUNYUBOU shanga khümbo saüenmang sühalonga kheijinei ungshedbouei maibü si amaibü namtet kümbulabü; ungshedbouei namtet kümbubü tegü kho khei kilabü.

¹⁵Hobaje aoei kho saüenla khümbo kuda, haoei haoeibü chem kho angngaimang sühalonga kheijinei haoei kho namteta ngaoboubü phejan jinyokujan, hoba kho hao shangabü yinglabü.

¹⁶Müt atei jembüeibü sek at saüenla khümbo kualonga kho shanga kebü ongbü thüng munam kho kilabü, barli youshou homer chenei chandinam shekel anjin sem.

¹⁷Haoei haoeibü sek kho jubilee po ka saüenla khümbo kualonga, kho namtet tegü kilabü.

¹⁸Lausikei haoei jubilee phaia saüenla khümbo kualonga kho shanga nam jouan kibü po thüng nyiboubü jubilee sühko ungshedbouei wean chühlabü, hoba namtet küman kibü khünei shingaitilabü.

¹⁹Müt wekoei sek saüenla khümbo kuan phaia haoei kho angngaimang sühalonga, haoei kho mantet khünei phejan ngaoboubü jinyokujan, hoba kho haoeibü yeilabü.

²⁰Sek kho angngailabü jeiko haoei lubü müt che la yaakan kialonga, haoei kho touje üangngailabü;

²¹lausikei sek khümbo kubü tegü ladang jubileea litilaje BUNYUBOU to sao- pobü kilabü, kho ungshedboueibü la yeilabü.

²²Müt atei lubü ka jekbü sek laobou haoei phanbü phejan che aying, kho BUNYUBOU la khümbo kualonga kho shanga,

²³ungshedbouei jubilee po sühko namtet wean chühan, hoba kho chaloua haoei saopobü jongsak tegü BUNYUBOU la kujan.

²⁴Jubilee poa aoka kho jekkei ao shangabü phet phanan kikei hao la ngaitikujan.

²⁵Namtet pendou lemshanga kibü shekel tegü kijan; shekel kho gera saoche yinglabü.

²⁶Shaang shatbü meisiau san yingsikei masu yingsikei, kho BUNYUBOUeibü kilabü. Aoeikei kho saüenan lembüa ayotijan

²⁷Hobaje kho asaopobü meisiau yingalonga kho haoei namtet kümbüei khünei phejan ngaoboubü jinan jekngaijan; hoba üangngailonga, kho haoeibü namtetei yaakjan.

²⁸Kho khei yingasikei, lembü sungenan phoan kibü aikei, müt yingasikei meisiau yingasikei, ayingsi haoei kibü sek yingsikei ayaaklabü, ayingsi üangngailabü, lemla sungenan kuan apan kibü weko kho BUNYUBOU shanga yongko saopobü ki.

²⁹Khümbo kuan apbü müt, ao müt yoka lemailela mautilabü ki, hao üangngailabü, hao kho haitijan.

³⁰Hobaje kaonyeka an phejan pendou kao ka longbü hek ayingsi bunyu kabü buhek yingsikei, BUNYUBOU shangabü ki, kho BUNYUBOU shanga saopobü ki.

³¹Hobaje müt atei an phejan jekmangsühsi haoei khünei phejan ngaoboubü jinyokujan.

³²Hobaje masu shuong hoba lon shuong ka an phejan, laobou lombouei wean dantida, anboubü kho BUNYUBOU shanga saopobü kilabü.

³³Maia si amai kho haoei alamjan, ayingsi haoei kho ajeiyojan, hoba haoei kho jeiyoa tegükei, kheijinei kho hoba laobou shanga kho jeiyokei penyi ham saopobü kilabü kho ajekngaijan.

³⁴Sinai shongha Israel shousi shuong shanga BUNYUBOUei Mosa la sakkubü ngühkhüm habü ho ki.