Read Chang Naga JEREMIA 1 Bible Online

JEREMIA 1 - Chang Naga bible

JEREMIA 1

¹Benjamin kaodaka Anathota ungshedbou yoa Hilkiaeibü shou Jeremiaeibü ngüh shuong:

²Ao jungto Jihudabü Choba Amoneibü shou Josia, haoeibü songdakbü po anthüksem boubüa hao haanga BUNYUBOUeibü ngüh loukei.

³Tokei Jihudabü Choba Josiaeibü shou Jehoakim haanga Jihudabü Choba Josiaeibü shou Zedekia po anthükche boubü thonbü sühko, lit ngaoboubüa Jerusalem langsenbü sühko kho loukei.

⁴Tou BUNYUBOUeibü ngüh kü to joyoko loukei.

⁵“No shia akünjinei ngei no ngean kikei, hoba no abukjinei thama ngei no saüenan phokukei, phang shuong jungto thuseibü che yingla ngei no pienkei.”

⁶Kheijinei ngei laukei, “Ah, BUNYUBOU Mühghaü! Chühashi, lai laula ngei athük; aieilausi ngo nashou che ong.”

⁷Lausikei BUNYUBOUei kü to laukei, “Ngo nashou che ong dogo telau; aishanga ngei aoyou jungto no hautilaje no haujan, hoba ngei ka la ai ong sakkulaje nyi laujan.

⁸Haoen to tehüt, aishanga no püetla ngo ka yoa kia.”

⁹Kheijinei BUNYUBOUei haoeibü ik shingkei hoba ngeibü sembunga meitikei hoba BUNYUBOUei kü to laukei, “Chühashi, ngei ngeibü ngühshuong kaibü sembunga jinkua.

¹⁰Chühashi, tat phangshuong thüka hoba sangle shuong thüka pheienla hoba senthetla, mautila hoba khokan koutila, kümla hoba kela ngei no phoyoda.”

¹¹Tokei BUNYUBOUeibü ngüh kü jungto joyoko loukei, “Jeremia, nyi ai hapda?” Hobaje ngei laukei, “Ngei almond bubhek che hapda.”

¹²Kheijinei BUNYUBOUei kü to laukei, “Nyi maisho hapa; aieilausi ngei ngeibü ngüh kümsemla panteilabü.”

¹³Nyiboukei BUNYUBOUeibü ngüh kü to joyoko loukei, “Nyi ai hapda?” Hobaje ngei laukei, “Ngei tühjung longbü chak che yungthang ae chak sembung yeian phoan hapda.”

¹⁴Kheijinei BUNYUBOUei kü to laukei, “Yungthang aeka kaonyeka kibü pendou thükto amaibü loushadlabü.

¹⁵Aishanga ditashi, yungkük sangle pendou ngei ngashailabü,” dogo BUNYUBOUei lauda; “hoba haoen loulabü hoba kaijembo hoba Jihuda sangle pendou khulimbo Jerusalem bakhün to lotla shanga lulueibü Choba setshang kümlabü.

¹⁶Hobaje haoen amaibü shanga ngei haoen khulimbo matjem laulabü, aieilausi haoenei ngo inletkei, hoba lubü mühghaü shuong to jen juokko lembei hoba haoenei lulueibü ikküm iklei shuong lembei.

¹⁷Lausikei nyi shembe lokan meimeiashi, hoba ka la sakkubü pendou haoen la lenashi. Tou nyi haoen to tehüt, khei ayinglonga ngei no haoen yoa kijinei aei hatentilabü.

¹⁸Aishanga chühashi, ngei no tat kaonyek khümbo khulimbo Jihudabü Choba shuong khulimbo, khoeibü konglebü shuong khulimbo, khoeibü ungshedbou shuong hoba kaonyek kabü mütli khulimbo loan kibü sangnyu che hoba nameibü thaonyu che hoba chisak nameibü kümthang yeitia.

¹⁹Hobaje haoenei kakhu limbo wapyolabü, lausikei haoenei no anyemlabü aishanga no khümenla ngo ka yoa kia,” dogo BUNYUBOUei lauda.