Read Chang Naga JEREMIA 10 Bible Online

JEREMIA 10 - Chang Naga bible

JEREMIA 10

¹O Israel chemdang, BUNYUBOUei kan to joyobü ngüh kho ditashi.

²BUNYUBOUei hai lauda, “Phangshuongeibü lamnyu teditlet ayingsi mühkabü tetsidaei tephenyem, aeilausi phangshuong khübü khoei mokda.

³Aishanga müteibü songle amlangbü ki. Yam ka bulong che akda hoba ikseibü müteibü ikei kho jakenda.

⁴Mütshuongei kho chandinam si honei naanglepda; atopeitila shanga haoenei martol si kojalei thünglepda.

⁵Haoeneibü heangsho shuong kho simo laka müteibü noksa küman phobü phatko ki; hoba haoenei joyola athük, haoen jung ong jungeilabü ki, aieilausi haoen paila athük. Haoen to tehüt, aieilausi haoenei amaibü kümla athük, ayingsi maibü kümlakei aki.”

⁶O BUNYUBOU, no phatbü ao aki, no yaangbü ki, hoba kaibü nyen hau yaangbü ki.

⁷O phangshuong Choba, aoei ka to ühütla? Aishanga kho ka shanga janbü ki. Aishanga phangshuong songbüdobü pendou yoa hoba haoeneibü sangle pendoua no phatbü ao aki.

⁸Haoen lepde lejim akiko ngousepa, heangsho lembü shuongeibü lenbü kho bu ong ki.

⁹Chandinam phau yaübü Tarshish ka sungbakei, hoba Ufaz ka hon, khübü kho bueibü ikküm iklei hoba hon yaübü ik ka ki; haoeneibü neisimei mühson hoba nakthüngan sakbü haoen pendou libünyenbü müteibü kümsilei ki.

¹⁰Lausikei BUNYUBOU kho tükdebü Mühghaü ki; hao lang kibü Mühghaü hoba ponpen kibü Choba. Hao khau longjinei kaodak nyaakeida hoba phangshuongei haoeibü maangshat atinda.

¹¹(Nyi haoen to hai lenshi: Shabü mühghaü shuong aoyouei müh si kao aküm, haoen kaodak ka hoba mühnyu phang ka maulabü.)

¹²Aoei kaodak haoeibü seiei hauei kümbei kho hao ki; aoei jembü songeidoei kaodak yaüda hoba haoeibü ditenbüei mühshuong jenkei.

¹³Ladang haoei haoeibü ngüh longlaje müha dei shuong ngühda, hoba kaodak thonbü ka haoei sangmei tuan angtida, lang loutila haoei langpon pontida, hoba haoeibü thanshang chem ka haoei yei longtida.

¹⁴Mütpem weko ngoubüloubü hoba songsihon akibü; hon yaübü weko jembü heangshoei himou bautida. Aieilausi haoeibü heangsho kho amlangbü hoba haoen to hak aki.

¹⁵Haoen lejim aki, mashikbü kümsilei ki; haoen shieikoejinei haoen maulabü.

¹⁶Ao Jakobeibü phejan ki haoje khübü aphatkei, aishanga pendou Kümbouyaübou kho hao ki, hoba Israel kho haoeibü phetphan phang ki; hao nyen kho Thükenbou BUNYUBOU ki.

¹⁷O no, ao komlepan ki, kaibü neilop kao ka hauan sungashi.

¹⁸Aishanga BUNYUBOUei hai lauda, Chühashi, ho jihsiphaia kaonyek kabü mütli shuong ngei tekan aplabü; hoba haoenei ngelabü lele ngei haoen jungto maangmau khonsak hautilabü.

¹⁹Ngo leilubü shanga ngo ügütü! Ngeibü mou yaangsepbei! Lausikei ngei ngo lolo laungaikei: “Maimaitham ho ngeibü shat, hoba ngei ho natjan!

²⁰Ngeibü neichem leilua hoba ngeibü jolüh pendou jangtheda; ngeibü shousi shuong kü jungka sada, hoba haoen aki; nyibou ngeibü neichem sengla ayingsi ngeibü thangtet phonngaikula ao aki.”

²¹Ngei jongaikei, “Aishanga sanlombü shuong ngoubü hoba BUNYUBOU to apheda; khei yingbü khoei naang amaida; hoba haoeneibü sanlon dan pendou lina.

²²Ditshima! Ngühphakphak che kho louada: Jihudabü sangnyu shuong sangliphang selong thüngshang la yeitila yungkük aeka aeibou pangyoda.”

²³Ngei ngekei, O BUNYUBOU, müteibü lamnyu jembü to aki; khei paila shanga jembü to lam shean lenla müt to aki.

²⁴Ngo tangtibü, O BUNYUBOU, lausikei ngühmaia ong yingshi, nyi ngo kongkongtham yeitibüla, no khauangkoje touma.

²⁵No angebü phangshuong thükto hoba kaibü nyen aphongbü mütli thükto kaibü khauang khüpan jinkushima. Aishanga haoenei Jakob suia; haoenei hao suikei hoba hao mautia, hoba haoeibü kishang leiluan phokua.