Read Chang Naga JEREMIA 12 Bible Online

JEREMIA 12 - Chang Naga bible

JEREMIA 12

¹O BUNYUBOU, ngo maangto shatko ka jungto pheyo phanyoko louasikei noje ponpen tangetnyu ong ki; khei yingasikei ngeibü ngüh ka thedanga laueida: Aila müt amaibü naangmaida? Aila khüpbülangbü shuong maisho kida?

²Nyi haoen kekei hoba haoen li ada; haoen yemda hoba lang hekda. Haoeneibü sembunga no nyangko kia, lausikei haoeneibü maangpon kaje saakei.

³Lausikei O BUNYUBOU, nyi ngo ngekei; nyi ngo hapda hoba ngeibü maangpon ka aenei takteida. Haitilabü sanshuong tegü nyi haoen senashi.; haitilabü chalou shanga haoen phei chenei phoashi.

⁴Lalokche kaonyekei mang haapla hoba khongthu kabü sang pendou yuila? Khünei aoyou kida haoen amaibü haangjung meisiau shuong hoba ausiyuk shemda; aieilausi mütshuongei laukei, “Mühghaüei küneibü thonshang ühüplabü.”

⁵BUNYUBOUei laukei, “Jeremia, no müt yoa langyosi mangalonga no koli to lai leiyola? Hobaje no kaomaia tuongalongaje Jordan lamanga lai lela?

⁶Aishanga khei kaibü jaisinasi shuong hoba kaibü chungei ka to lepbolangko jungeiakei; khei haoenei ka phainei kakhu limbo ngekda. Haoenei ngüh maibü lauasikei haoen to mai telem.”

⁷BUNYUBOUei lauda, “Ngei ngeibü Israel apyoa; ngei ngeibü phang inleda. Ngeibü soushouei sanounyu ngei sao dangbou shuongeibü ik to kua.

⁸Kü shanga ngei pienbü phetei yama molosaonyu phatko longeida; saoei ngo khulimbo ngühda, khoei ngei sao to mangsenda.

⁹Ngeibü phet kho kü thedanga haitilabü tolobü au phatkei sai? Sao khulimbo haitilabü au shuong kaijembo kia sai? Hauashi hoba yamkabü meisiau pendou kamshaitiashi; shautila haoen leishaiashi.

¹⁰Usa kabü sanlombü juongei ngeibü semlüh bamang leilutikua; haoenei ngeibü phejan naknyinkua; haoenei ngeibü phejan maibü yam sangliphang la yeitkua.

¹¹Haoenei kho sangliphang la yeitia; sangliphang la yeitisije kü la mang haapbuda, kaonyek pendou sangliphang la yeiakei, lausikei aoeikei athounouda.

¹²Kaolong shongh khongthu pendoua leilutibü shuong louan kia. BUNYUBOUeibü inei kaonyek ji thon ka ji thon sühko suian apa; müt aokei sangmai haksoa aki.

¹³Haoenei whet youshou wenkei lausikei yousang latkei; haoen jembü lolo mangetkei, lausikei ai apailet. BUNYUBOU hatla moklabü khauang longbü haangjung youlatbü shanga himouko kilabü.”

¹⁴BUNYUBOUei lauda, “Ngeibü mütli Israel la phetphanla kubü phet laobou to ngeibü amaibü lepbü sangmang pendouei meiouda haoen shanga BUNYUBOUei hai lauda: Chühashi, ngei haoen jembü kaodak ka pheian aplabü, hoba haoen yo ka ngei Jihuda chung pheian aplabü.

¹⁵Hobaje ngei haoen pheian apan phaia ngei tokei haoen to onoulabü hoba haoen mütpem weko jembü phetphan hoba mütpem weko jembü kaodak to nyibou leian loulabü.

¹⁶Hobaje ho tegü hai haüthüklabü, haoenei ngeibü mütlieibü lamnyu moshikko ditletko, kü nyenei BUNYUBOU lang kiabü dogo thelet lanleda longa, khei haoenei kü mütli to Baal phongko theyolanyola lenbü tegü kheijinei kü mütli yoa haoen kümetkulabü.

¹⁷Lausikei phang atei ngüha alelonga kheijinei ngei kho lepde pheian aplabü, hoba kho mautilabü dogo BUNYUBOUei lauda.”