Read Chang Naga JEREMIA 14 Bible Online

JEREMIA 14 - Chang Naga bible

JEREMIA 14

¹Thea thangbü shulinyunglin shanga BUNYUBOUeibü ngüh Jeremia jungto loubü:

²“Jihudaei mang haapda, hoba haoeibü sangnyu shuong sakleda; haoeibü mütliei kaoa manghaap chia lauda hoba Jerusalemei thuibü mangsühko ngekbü ngühlang angtida.

³Haoeneibü yaangenbü shuongei haoeneibü sambü shuong deikhula hautida, haoen deikhün khüto louda, lausikei dei ühüpda. Haoen deiyei kongkong longeida; haoen himousele phenyemakei hoba haoen neikhu yukakei.

⁴Kao kho paknyina, aieilausi kaonyek to lang aloubü hangshong, sekmoubü shuong himouko haoen neikhu yukda.

⁵Khongthu ushia meishi nyunyuei saoei shoushou shatbüyam apyoan satda aieilausi nyem aki.

⁶Yamkabü gadu shuong shonghkhua loda, selong shuong tegü haoenei hakhin thakthakle hinda; haoeneibü nyek yuida, aieilausi bunyem deinyem aki.

⁷Kün khulimbo küneibü shabüei aukabü kuasikei, O BUNYUBOU, kaibü nyena den che kümbü, aieilausi kün jih juonga phai suka, künei no khulimbo shabü shona.

⁸O Israel maanglembou, khonsak khonku jiha hao khümenbou, aila kaonyeka no yenbou phatko ki, wakoubü youche shanga otbü phatko kida.

⁹Aila no phenyembü müt che tegü, khümenla athükbü Thükenbou müt che tegü kida? Khei yingasikei, O BUNYUBOU, no kün yoa kia! hoba kaibü nyenei kün ngaan kia; kün tüpyoma.”

¹⁰BUNYUBOUei ho mütli shanga hai lauda, “Haoenei hai shoongaila olinko kia, haoenei jembü you asenetda. Hibü BUNYUBOUei haoen asungletda; tou haoei haoeneibü shabü damenlabü hoba haoeneibü shabü shieikoelabü.”

¹¹BUNYUBOUei kü to laukei, “Ho mütli mailayaangla shanga tewelau.

¹²Haoenei mühei nyengasikei, ngei haoenei ngekbü aditlabü, hoba haoenei juokbü lembü hoba shausiyung lembü kuasikei ngei khübü kho asungletlabü. Aeiko ngei haoen kho inei, müheinouei hoba limeilangei mautilabü.”

¹³Lausikei ngei laukei, “Ah, BUNYUBOU Mühghaü, chühashi, thuseibü shuongei haoen to lauda: Kanei in ühüplabü, ayingsi kan müh akilabü. Maimaitham ngei kan la ho kishanga süngshonbü sangmai kulabü.”

¹⁴Hobaje BUNYUBOUei kü to laukei, “Thuseibü shuongei amlanga kü nyena tetenda. Ngei haoen ohauti ayingsi ngei haoen apien, ayingsi haoen to ajoyo. Haoenei kan to amlangbü mangsang lejim akibü maang ka bakbü hoba haoen jembü maangpona khüpbülangbü tetenko lauda.

¹⁵Hibü thuseibü shuong aoyouei ngei ohautisikei kü nyena tetenbü ngüh lauda, hoba aoyouei ho kaodaka in si mühsinou aloulabü dogo lauda, khübü thuseibü in si mühsinouei mautilabü, dogo BUNYUBOUei hai lauda.

¹⁶Hobaje aoyou mütli shanga haoenei tetenbü ngüh lauda, haoen Jerusalem khongmaanga mühsinou hoba inei haitibü shuong tekteksousou aplabü. Hobaje haoen ayingsi haoeneibü yaksi khünla hoba haoeneibü jayangshousi ayingsi nouyangshousi khünla ao akilabü. Aishanga ngei haoen amaibü haoen thükto khüpan jinkulabü.”

¹⁷BUNYUBOUei kü to ngo hauan mütshuong la habü ngüh lenashi laukei: “Change nangnak ngeibü nyek ka nyeksi koutiashi, aishanga kü mütli saosüngbü nouyangnyu kaang ngümbüei mou yaang letia.

¹⁸Ngo khong to angalonga inei haitibü shuong hapda; hoba sangnyu khüto ngo atalonga limsilang shatsinyat shuong hapda. Aishanga thuseibü hoba ungshedbü ham kaonyek shoongko hauda, khei yingankei haoenei ai angekei.”

¹⁹BUNYUBOU, nyi Jihuda lepde inletkei lo? Kaibü soushouei Zion to maang ashik lo? Kün amailabü lele aila nyi kün to ngümbei? Künei hakso lambei, lausikei ai maibou alou; maitibü jih che lambei, lausikei chühashi, kho jeiko hatlabü.

²⁰O BUNYUBOU, kün amaibü hoba küneibü pisibousi shuongeibü shabü künei ngejung louda, aishanga künei kakhu limbo shabü shona.

²¹Kaibü nyen shanga kün tekan tüpkai; kaibü soneikangbü Choba setshang aweasüngko teyingma; damenashi hoba kün yoa kaibü thesilan teleiluma.

²²Phangshuongeibü amlangbü mühghaü shuongei lang loutilep lo? Ayingsi müh shuongei lang yantilep lo? O BUNYUBOU, küneibü Mühghaü kho no ong ki. Hibü künei ka to maanglem phoda; aishanga nyi habü pendou kümda.