Read Chang Naga JEREMIA 15 Bible Online

JEREMIA 15 - Chang Naga bible

JEREMIA 15

¹Kheijinei BUNYUBOUei kü to laukei, “Khei Mosa si Samuel kü thedanga loa tegükei, khei yingasikei ho mütli aenei ngeibü maangpon ayeilabü. Kü the ka haoen huan aptishi hoba haoen ngaitiashi!

²Hobaje haoenei ka to, ‘Kün laeto haula?’ dogo phejinei nyi haoen to lenshi: BUNYUBOUei hai lauda: Aoyou yemshatei haila tetkei haoen yemei hailabü! aoyou lasona inei haila tetkei haoen inei hailabü; aoyou mühsinouei haila tetkei haoen mühsinouei hailabü; aoyou langsenla tetkei haoen langsenlabü.

³Ngo BUNYUBOUei haoen thükto leilutibü den lei hautila jantheda: haitilabü in, mangjim senlanglabü kei shuong; phe shaulabü mühkabü au shuong hoba jouletbü shuong suilabü yamkabü meisiau shuong.

⁴Hobaje Jihuda Choba Hezekiaeibü shou Manasseei Jerusalema ai kümbei kho hangshong kaodak sangle pendou to ngei haoen hatlamoklabü che yeitilabü.”

⁵BUNYUBOUei lauda, “O Jerusalem, aoei ka to onoula ayingsi aoei kaibü mang haapbula? No maisho kibü akibü shanga phela aoei sepeila?

⁶Kan danshuongei ngo inletkei; kan phaiae sukngailangkei; hibü ngei ngeibü ik kakhu limbo shingkei hoba no mautikei, aieilausi ngei ka shanga dambubüei oanshema dogo BUNYUBOUei lauda

⁷Kaonyek bakhüna ngei haoen wanei sipan aplabü. Ngei kan kü mütli shemtia, ngei kaneibü shousi shuong haitia; aieilausi kanei jembü amaibü lamnyu ka asepei.

⁸Ngei kaneibü latnyu shuong yungnyu phetsen tokei juongbou yeitia. Ngei kaneibü heshou shuong haoeneibü chajihboua haitikei, hoba haoeneibü nyusi shuong khonkutikei. Ngei hakde haoen to hatlamoklabü khonkuei ngümbei.

⁹Shousi müt nyet maubüeibü nyu semtheda hoba hakde apa. Tokei chajihboua kian saoeibü chanyu nepkua; sao himou bautikei hoba maangpon noutikei; hoba kaneibü joubü dan ngei kaneibü dangboulabou la haitila shanga kuan aplabü. Ngo BUNYUBOUei kho lauan apa.”

¹⁰Ügütü, kü thu amai! Anyuei ngo aila bukkeima? Kaodak khümboa ngo oyolemenko ong kilabü müt che. Ngei aolakei alotku ayingsi lotankei aki; lausikei haoen pendouei kü to khükdauokda.

¹¹O BUNYUBOU, ngei haoen mailayaangla ka to asuajako kialonga, hoba khonsak khonku hoba maangshat chaloua ngei dangbou shanga ka to asuajako kialonga kho khei yingshi.

¹²Atei namkung, khei yungkük aeka namkung hoba chisaknam leiluenlep lo?

¹³BUNYUBOUei kü to laukei, “Haoenei kaonyudak khümboa shabü shonbü kayang, ngei kü mütlieibü nyaksinam hoba keisiyaang aaklangtila dangboulabou shuong hautikulabü.

¹⁴Haoenei angebü kaodak chenei ngei haoen la haoeneibü dangbou shuong khangentilabü, aishanga ngeibü khauang wan che phatkei, hoba kho ladangkei anyetlabü.”

¹⁵Kheijinei ngei laukei, “O BUNYUBOU, nyi ngekei. Ngo damenashi hoba kü to thuikai. Ngei ngo shieikoebü dan to phok lamakho. Haoenei ngo haitilabüa nyi haoen thedanga kheinyuje tenatenma. Ka laüa ngei ho hakbü thoshauda dogo damenashi.

¹⁶Ladang kaibü ngüh shuong loukei, ngei khübü kho shaukei; hoba kaibü ngüh shuong kü shanga olinlabü hoba maanga mailabü che kiteikei, aishanga kaibü nyenei ngo ngakei, O BUNYUBOU Thükenbou Mühghaü.

¹⁷Ekyo nyiyobü dan yoa ngo aset, ayingsi aolinyo. Kü mütpem setkei, aieilausi kaibü ik kü thüka kikei, aishanga ngo khauangei soptikei.

¹⁸Aila ngeibü khonku anangda? Ngeibü mou aila amaida? Aila khübü temaikho lauda? No kü to ngo hau thettiko sulang kabü shumang ubü phatko kilep lo?”

¹⁹Hibü BUNYUBOUei hai jongaikei, “No sepeikho laualonga, ngei no sungletlabü; hoba no kü thea ngo khangenko lolabü. Hobaje nyi jim akibü jeila ai namsek ki, kho phinthona longa no kü sembung phatko kilabü. Mütshuong ka jungto sepeijung longeilabü, lausikei no haoen jungto haula akhamlabü.

²⁰Hobaje ngei ho mütli thedanga no chisak nameibü ba kümthang tegü yeitilabü. Haoenei no khulimbo wapyolabü, lausikei haoenei no athüklabü. Aishanga no khümenla hoba no senetla ngo ka yoa kia.

²¹Hobaje amaibü ka ngei no khümenlabü hoba hatla moklabü ka ngei no angthetlabü. Ngo BUNYUBOUei kho lauan apa.”