Read Chang Naga JEREMIA 16 Bible Online

JEREMIA 16 - Chang Naga bible

JEREMIA 16

¹Tokei BUNYUBOUeibü ngüh kü jungto loukei,

²“Nyi yak tenga, ayingsi ho tegübü kaoena bousu yaksa shousi teki.

³Aishanga ho kaonyeka bukan kibü bousu si yaksa shousi shuong shanga haoen hoba buktibü haoeneibü nyusi shuong shanga hoba ho kaonyeka haoen bukbü bou shuong shanga BUNYUBOUei hai lauda:

⁴Hailabü shatsinyat yaangbüei haoen hailabü; haoeneibü mang ühaaplabü ayingsi haoen akhünlabü. Haoen tanga odsinot tegü kilabü. In hoba mühsinouei maubüa haibü mang kho mühkabü au hoba yamkabü meisiau shanga shausiyung kilabü.

⁵“Aishanga BUNYUBOUei hai lauda: Mang haapbü chem to tüt. Aoeibü mang haaplakei tohau. Aishanga touje ngei kü mütli ühaukulabü, ayingsi haoen to sanou si onou alenlabü, dogo BUNYUBOUei lauda.

⁶Ho kaodaka yaangbü si hanbü ham hailabü, lausikei haoen aoeikei akhünlabü. Kan aoeikei haoen shanga mang ühaaplabü, ayingsi kan lolo manghaap tetsida lenko khu ashulabü.

⁷Sanouboutham, khei bou ayingsi nyu haiasikei aoeikei manghaap sotila shausiyung akulabü ayingsi maang sula shanga yunglabü akulabü.

⁸“Lemlibü chem to haoen yoa setla, shaula yungla no ütjan.

⁹Aishanga Thükenbou BUNYUBOU Israel Mühghaüei hai lauda: Chühashi, ngei ho kaodak ka kaneibü thea hoba kan haanga ekyo nyiyobü ngüh hoba olinyobü ngüh, chemkanbü ngühlang ngei thaktikulabü.

¹⁰“Hobaje nyi habü ngüh pendou ho müt to lenjinei haoenei ka to: Ainyula BUNYUBOUei kün khulimbo amaibü hatetche ho lauan apbei? Künei ai shedbü kümbei? Künei küneibü BUNYUBOU Mühghaü khulimbo ai shabü shonkei? dogo laulabü.

¹¹Kheijinei nyi BUNYUBOUei hai laukei dogo haoen to lenshi: Aieilausi kaneibü pisibousi shuongei ngo nangletkei, hoba lubü mühghaü lembei hoba khangenkei. Haoenei ngo inletkei hoba ngeibü ngühkhüm ajungei.

¹²Lausikei kaneibü pisibousi shuong toje kanei amaibü kümbei. Aishanga chühashi, kan mütpem weko tubüsekbü hoba amaibü, hoba kanei kü to ngüha aleda.

¹³Hibü, kanei ayingsi kaneibü pisibousiei angebü kaonyek che to ngei kan ho kaodak ka tekan aplabü. Hobaje khünei kanei change nangnak lubü mühghaü shuong khangenlabü, aishanga ngei kan to onou alenlabü.”

¹⁴BUNYUBOUei lauda, “Israel mütli Ijep ka leian loubou langkeibü Mühghaü ki shongko, dogo lauko mütshuongei kü nyena athealanlabü jihsiphai che louada.

¹⁵Lausikei haoenei kü to, ngo yungkük kaodak hoba ngei shian apbü kaodak pendou ka leian loubou Mühghaü lang kishongko, dogo lauko thelalanlabü jihsiphai louada. Aishanga ngei haoen haoeneibü pisibousi la kubü kaodak to leian loulabü. Ngo BUNYUBOUei kho lauan apa.”

¹⁶BUNYUBOUei lauda, “Chühashi, ngei ngaulapbü shuong juong ngashaida, hoba haoenei haoen laplabü. Phaiaje ngei meishibü shuong juong ngalabü, hoba haoenei shongh weko ka hoba shonghshou weko hoba laangphang ka haoen shienlabü.

¹⁷Aishanga haoen haushang pendou to ngeibü nyek hautiakei; kü ka haoen ahuenkei, ayingsi haoeneibü shabü ngeibü nyek ka küplepan aki.

¹⁸Hobaje ngei haoen amaibü hoba haoeneibü shabü phejan nyiei khüpngailabü; aieilausi haoenei mangsenlabü heangsho haibü mang shuongei ngeibü kaonyek shatikei, hoba ngeibü phet haoeneibü mangsenlabü shuongei shentia.”

¹⁹O BUNYUBOU, no ngeibü hau hoba ngeibü lapheishon, khonsak chaloua ngo satenshang. Kaodak thonbü ka phangshuong ka jungto louan laulabü, “Küneibü pisibousi shuongei amlangbü mühghaü shuong, khei jim akibü hoba ku akibü heangsho peisilei shuong to liman aikei phet aphan.

²⁰Mütei jembü shanga mühghaü shuong kümlep lo? Habü ho mühghaü shuong aying.”

²¹“Hibü, ngo BUNYUBOUei haoen la ngetilabü, khei ho jiha ngei haoen la ngeibü sei hoba ngeibü hau ngetilabü. Kheijinei haoenei ngeibü nyen BUNYUBOU ki dogo ngelabü.”