Read Chang Naga JEREMIA 17 Bible Online

JEREMIA 17 - Chang Naga bible

JEREMIA 17

¹BUNYUBOUei lauda, “Jihuda bü shuong, kaneibü shabü namkung dojinei doakei; ho kaneibü maangpona diamond simbüei seijinakei hoba kaneibü lemshang laanga doan phoakei.

²Hobaje bulong sangtüngbü weko hoba shonghshou suokbüa shetenan kibü shongh thüka kaneibü shousi shuongei haoeneibü lemshang hoba Ashera mühghaüsao damenda.

³Kaneibü leikhu leidang pendoua kaneibü shabü shanga kanei kibü hoba kaneibü nyaksinam pendou soletbü peisilei tegü ngei kaneibü dangbou la kulabü.

⁴Ngei kan la kubü phet ka kaneibü ik ngei lititilabü hoba kanei angebü kaonyeka ngei kaneibü dangbou shuong kanei khangentilabü, aishanga ngeibü maangshat wan tegü longakei hoba ladangkei anyetlabü.”

⁵BUNYUBOUei hai lauda, “Aoei müt to maanglemda, hoba phe jembüeibü insiaubu la yeitida, aoeibü maangpon BUNYUBOU ka sepeida, hao shedsikhau yingshi.

⁶Hao phetsen kaoa buham che phatkei, hoba aikei maibü longbü ühüplabü. Hao ulangbü yam, müt akibü jemkaoa kilabü.

⁷“Lausikei aoei BUNYUBOU to maanglem phoda hao haübou.

⁸Hao dei nyangko kibü bulong phatko ki, laobouei haoeibü li shumang aeto yanan koutida; hoba juokbü aubü loujinei ühütda. Aishanga saoeibü yik sangtüngtham kia, hoba uangmuang loujinei maang amauda. Aishanga saoei hek hekbü athakda.

⁹“Pendou thüka maangpon khüpbülangbü ki, hoba ho maingaila yongko sekakei; ho aoei ditenla thükla?

¹⁰Ngo BUNYUBOUei maangpon lamda hoba dambü takteida; khei mütpem weko la jembü thechüh thüng, hoba jembüei kümbü thüng ngaingoula shanga.”

¹¹Ajanayingbü haang ka nyaksinam pailetbü kho jembüei ateibü tei pakan shoushou püpenbü aulak phatko ki. Hao haangtoua nyaksinamei hao apyolabü hoba thonlaje hao ngoubü che ong yinglabü.

¹²Soneikangbü Choba setshang tegü khanglathama tonenan kibü kho küneibü Lembüchem ki.

¹³O BUNYUBOU, no Israel maanglem; no inletbü shuong pendou himou bautilabü. Ka jungka sepeinyu ngaibü shuong kho thamngua doan pholabü; aishanga haoenei lang kibü deikük BUNYUBOU inletkei.

¹⁴Ngo maitiashi, O BUNYUBOU, hoba ngo maian aplabü. Ngo khümenashi hoba ngo khümenan kilabü. Aishanga ngei nyen sangbü kho no ki!

¹⁵Chühashi, haoenei kü to lauda, “BUNYUBOUeibü ngüh kho lanei ki? Kho tou loushedtiashi!”

¹⁶Lausikei, BUNYUBOU, haoen thükto amaibü hautila ngei ka to asuaja, ayingsi ngei thushed chalou ahi, dogo nyi ngeakei. Kü sembung ka ai longkei, kho ka thedanga kiteikei.

¹⁷Kü to hatlamoklabü che teyingtima; amaibü chaloua no ngeibü satenshang ki.

¹⁸Aoyouei ngo shieikoeda khübü kho himou bautiashima, lausikei ngoje teyoti, BUNYUBOU. Haoen thükto hatlamoklabü chalou amaibüei sühtiashi, lausikei ngoje temokti. Haoen thükto amaibü chalou sühtiahi hoba haoen netla yeiko mautiashi.

¹⁹BUNYUBOUei kü to hai laukei, “Jeremia, hauashi hoba Jihudabü Choba shuong at longei dogo kümshang sangnyu bakhün Mütshuongeibü Bakoua ngeibü ngühlang phinthonashi; kho phaia Jerusalem lubü bakhün pendou to hauashi.

²⁰Choba shuong to hoba Jihuda mütshuong pendou hoba Jerusalema kibü shuong hoba ho bakhün to lotbü shuong pendou to ngei lenbü to ditla lenashi.”

²¹BUNYUBOUei hai lauda, “Nounyet chaloua on akünla ayingsi Jerusalem bakhün danko on künan alotla maangsangashi.

²²Kanei Nounyet chem ka on künan telong ayingsi kümsilei ai teküm; lausikei ngei kaneibü pisibousi la sakkubü Nounyet chalou saopotham jungeiashi.

²³Khei yingasikei, haoenei kü ngüha ale ayingsi nou ühang. Lausikei haoen tubüsekbü yeikei; hoba haoenei kü to ngüha ale ayingsi ngeibü songlen asunglet.

²⁴“Lausikei khübü mütshuongei to kü ngühkhüm pendoua ngüha leshi dogo lenshi. Haoenei ho sangnyu bakhün danko Nounyet on aikei akünjan. Haoenei Nounyet kho saopobü chalou dogo noujan hoba khünyet ai kümsilei akümjan.

²⁵Kheijinei haoeneibü Choba shuong si songdakbü shuong Jerusalem bakhün danko lotlabü hoba Dawid to kibü jeteibü Choba songdak hau kilabü. Jihudabü si Jerusalembü mütshuong yoa haoen liko koli kailong si koli thüka setan loulabü, hoba Jerusalem sangnyu kho ponpendou mütei shenan kilabü.

²⁶Hobaje Jihudabü sangnyu shuong ka hoba Jerusalem kaijembo kibü sang shuong ka mütshuong loulabü; Benjamin kaophei ka, hoba shongh shuong ka, hoba Negeb kaonyek ka, juokbü lembü si lembüsabü, hoba shusiphon lembü si ponlem juokbü, hoba nyensangbü lembü jungan BUNYUBOUeibü chem to loulabü.

²⁷Lausikei haoenei kü to Nounyet kho saüenbü chalou che tegü jungeila ngüha lejan. Khünyet haoenei Jerusalem bakhün danko on künan ütjan; haoenei khei kümalonga, ngei Jerusalem bakhüna wan sapbulabü. Wanei Jerusalem Choba- chem shuong lonlabü, hoba aoeikei kho panyetla athüklabü.”