Read Chang Naga JEREMIA 18 Bible Online

JEREMIA 18 - Chang Naga bible

JEREMIA 18

¹BUNYUBOUei kü to laukei,

²“Meimeiashi, hoba chak- yaübü chem to yanashi, hoba khünei ngei ka la ngeibü ngühlang kulabü.”

³Hibü ngo chakyaübü chem to yankei hoba hao haoeibü kümsilei büngsoua kümbo kikei.

⁴Hobaje chakyaüboueibü ika haoei shungkung thamei yaübü chak kho leilukei hoba haoei toukei haoei hao la maikubü tegü lubü chak che yaüetkei.

⁵Kheijinei BUNYUBOUei kü to laukei:

⁶“O Israelbü shuong, ho chakyaübüei tegü ngeikei kan to kümla athükkei lo? Chühashi, chakyaüboueibü ik kabü shungkung tham tegü kan kü ikmanga kia.

⁷Ai jiha ngei phang che hoba sangle che pheian apla hoba leilula hoba mautila shanga laulaje,

⁸hoba ngei joyobü phang khoei haoen amaibü ka sepeialonga ngei haoen to amaibü kümla dambü ka ngo maangpon sepeilabü.

⁹Hobaje ai chaloua ngei phang che huongla hoba kho kitila shanga laulaje,

¹⁰hoba khoei kü thedanga amaibü kümalonga, hoba ngeibü ngüh aditkuko apalonga, kheijinei ngei haoen to maibü kümla dambo kibü ka ngo maang- pon sepeilabü hoba akümlabü.

¹¹Kholonga tou, hauan Jihuda si Jerusalema kibü to hai lenashi, ‘Chühashi, ngei kan khulimbo huon amaibü huongda hoba kan shieikoela lamleda. Hibü kan mütpem weko jembü shabü lamnyu ka sepeiashi, hoba kaneibü lamthen amaibü hoba kanei kümbo kibü kümsilei shuong ka jaksheiashi.’

¹²Lausikei haoenei lauda, ‘Künei ainyula kümetla? Aishanga kün pendou lulueibü huonayoua pailabü, hoba kün mütpem weko lulueibü maangpon tubüsekbü phai semlabü.’ ”

¹³Hibü BUNYUBOUei hai lauda, “Hibü tou kan yoa atei ongkei ho tegübü ditkeilaoje pheashi. Saosüngbü medei Israelei aeibou hatlamoklabü kümsilei che küma!

¹⁴Lebanon kabü ninthu kho longleng ka shanjung koulep lo? ayingsi suokbü ka dei libü koubü kho ulangtham aplep sai?

¹⁵Lausikei kü mütliei ngo maan apbei; haoenei amlangbü heangsho la jen juokkuda; haoen haoeneibü shangiedbü lamnyua phaiyetda; hoba lamkhong to ohauko kolam to haua.

¹⁶Haoeneibü kaodak hatlamoklabü, ponpen himoulabü yeitida. Aoyou ho to danlaje hatko maangpangda hoba haoeibü khu ngomeida.

¹⁷Chaangbou yeiei tegü ngei haoen dangbou thedanga phinnyintilabü. Haoen thushed jihsiphaia ngei haoen la phaiae yeikulabü; khonku jihsiphaia ngei haoen to athuilabü.”

¹⁸Kheijinei mütshuongei laukei, “Kaiya, senei Jeremia khulimbo huon kümbho! Aishanga ungshedbou ka ngühkhüm, ayingsi songbüdobü ka songsido maibü, ayingsi thuseibü ka Mühghaü ngühlang amaulabü. Kaiya, senei sembungei hao to pekyokho, hoba haoeibü ngüha telekho.”

¹⁹Kheijinei ngei welaukei, “O BUNYUBOU, kü ngüha leashi, hoba kü to tokyobü shuongeibü ngühlang ditshima.

²⁰Maibü shanga amaibü nopngaikulep lo? Khei yingasikei haoenei ngeibü langkei shanga püngkhün che thukuakei. Ngei ka thedanga haoen pü maibü lauko, kaibü maangshat haoen ka sepeinyu satla ngo lai lokei damenshima.

²¹Lausikei tou, O BUNYUBOU, haoeneibü shousi shuong mühsinouei shemtiashi; haoen lasona haitiashi. Yaksa shuong laoei hoba shousiei kongtiashi; mütshuong shatsin- yatei haitiashi hoba heshou shuong lasona haitiashi.

²²Ladang nyi haoen thükto sepai tan hautilaje haoeneibü chem ka hatbümokbüa haapbü che dittiashi; aishanga ngo mintila haoenei püngkhün thukei, hoba ngeibü you shanga tin sankukei.

²³Khei yingasikei, O BUNYUBOU, haoenei ngo haitila huonbü pendou nyi ngekei. Haoeneibü shedbü tüpbu ayingsi haoeneibü shabü amai tüpbuma. Lausikei ka thedanga haoen tuongtiashi; hoba no khauangbü chaloua haoen to ik atshima.”