Read Chang Naga JEREMIA 19 Bible Online

JEREMIA 19 - Chang Naga bible

JEREMIA 19

¹BUNYUBOUei hai lauda: Hauashi hoba thamchak yaübou ka chak che jekashi, hoba mütshuong ka jaishou at hoba ungshedbou shuong ka at leiashi.

²Hobaje Ben Hinnom Yo to hauashi, laobou chak phetnyinbü bakhün nyangko ki hoba ka la lenbü ngüh kho khünei phinthonashi.

³Hobaje lauashi: Kanei BUNYUBOUeibü ngüh kho ditashi, “O Jihudabü Choba shuong, hoba Jerusalema kibü shuong, Thükenbou BUNYUBOU Israel Mühghaüei hai lauda: Chühashi, ho kaonyek to khei amaibü sungbada, laobou ditbü shuongeibü noua tingde wilabü.

⁴Aieilausi mütshuongei ngo nangletkei hoba ho kishang kaoen shatikei; hoba khonei lubü mühghaü la jen jikkukei, aoyou haoenei hoba haoeneibü pisibousi shuong hoba Jihudabü Choba shuongei ange. Haoenei shed akakbü siiei ho kaodak shentikei,

⁵hoba haoeneibü shousi shuong Baal to lemla shanga wana juokla lemshon yaüenkei; laobou kümla ngei ladangkei asakku, ayingsi kü maangpon to alot.

⁶Hibü chühashi, dogo BUNYUBOUei lauda, khei ho kaonyek touje Tofet ayingsi Hinnom Yo dogo anyenlabü. Lausikei Haitibü Pholi dogo nyenlabü chalou louada.

⁷Hobaje ho kishanga ngei Jihuda si Jerusalem huonsiyou kho kongkongbü la yeitilabü. Ngei haoen haoeneibü langkei lambü dangbou shuong thedanga inei tuongtilabü. Ngei haoeneibü haibü mang shuong mühkabü au shuong si yamkabü meisiau shuong la shausiyung shanga kulabü.

⁸Hobaje ngei ho sangnyu hatlamoklabü hoba jemtenlabü che yeitilabü, hoba ho nyangko danbü wekoei ho thusheda moklabü hoba maangpanglabü.

⁹Hobaje ngei haoen la haoeneibü jayang nouyangshousieibü phe shautilabü. Hobaje komlepbü hoba khonsak laobouei haoeneibü dangbou shuong, aoyouei haoen khonkutila lamda, kho tegü kijinei mütpem weko la jembü lepboueibü phe shautilabü.”

¹⁰Kheijinei BUNYUBOUei kü yoa habü mütshuong thedanga ngei thamchak kho phetnyinshi dogo laukei,

¹¹hoba Thükenbou BUNYUBOUei haoen to hai lenshi dogo laukei, “Kho tegütham ngei habü mütshuong hoba ho sangnyu, chakyaüboueibü chak phetnyinkubü tegü, nyibou kümetla amailabü lele leilutikulabü; mütshuong Tofeta khünlabü aieilausi khünshang aikei akilabü.

¹²Kho tegü ho kaonyek to hoba ho mütli to Tofet tegü ho sangnyu yeitiko ngei kümlabü.

¹³Jerusalema kibü chem shuong hoba Jihudabü Chobaeibü chem pendou, laobou chemdaka ong mühkabü hang- angbü tan pendou to ponlem hibü jen juokkei hoba lubü mühghaü shuong la yunglabü ih lembü jonan jinkukei, Tofet kaoen tegü shaan aplabü.”

¹⁴Kheijinei Jeremia Tofet, BUNYUBOUei thusei ngüh laula hautishang Tofet kaoen ka loukei. Kheijinei hao haukei hoba Lembüchem khongmaanga lokei hoba mütshuong pendou to lenkei,

¹⁵Thükenbou BUNYUBOU Israel Mühghaüei hai lauda: “Chühashi, ho sangnyu thükto hoba habü chung pendou thükto ho khulimbo lauentilabü amaibü pendou sungbada; aieilausi ngeibü ngüh asungletko haoen ngüm kaangkei.”