Read Chang Naga JEREMIA 2 Bible Online

JEREMIA 2 - Chang Naga bible

JEREMIA 2

¹Tou BUNYUBOUeibü ngüh kü to joyoko loukei,

²“Hauashi, hoba Jerusalembüeibü noua joyoko ngekashi, BUNYUBOUei hai lauda: Ngei ka shanga no heshoudanga nyi phebü sanouyobü damenda, ailaibü nyi yamlamanga youli awenbü kaonyeka kü phai sembei.

³Haoeibü shaangbü buhek Israel kho BUNYUBOU thedanga saopobü kikei, aoyouei hao suikei haoenei shed shonkei; haoen thükto amaibüei sühlabü, dogo BUNYUBOUei lauda.”

⁴O Jakob chemdang, mütli pendou, kaneibü BUNYUBOUeibü ngüh ditashi.

⁵BUNYUBOUei hai lauda: “Kaneibü pisibousi shuongei kü to ai shedbü hapbei? Haoen kü ka lounyu bangjung satkei hoba amlangbü kümsilei heangsho phai sembei.

⁶‘Yamlamang danko sen leian loubü phetsen kaodak, hoba püngkhün danko uangmuang kaodak hoba haibü yemkao danko hoba aokei apaibü kaodak hoba müt aokei akishang Ijep ka kün leiyenbü BUNYUBOU kho lanei ki,’ dogo ongkei haoenei aphe.

⁷Hobaje ngei no apsileko kibü kaonyek khoeibü buhek hoba khoeibü peisilei maibü shuong shaula leian loukei; lausikei ladang kan loukei kanei ngeibü kaodak shatikei, hoba ngeibü phet mangsenlabü yeitikei.

⁸Ungshedbou shuongei, ‘BUNYUBOU lanei ki?’ dogo aphe, hoba aoyouei ngühkhüm jungeida haoenei ngo ange; songdakbü shuongeikei ngo khulimbo meimeikei, hoba thuseibü shuongei Baal nyen phongko thusei ngüh laukei, hoba ku akubü phaito sembei.

⁹“Hibü ngei ka to tokei khüpyolabü hoba kaneibü shisi shuong to khüpyolabü, dogo BUNYUBOUei lauda.

¹⁰Aishanga Kittim yungko danko hauashi, hoba Kedar to hautiashi hoba maisho daman chühashi; hoba kho tegü kibü si akibü chühashi.

¹¹Phang atei lulueibü mühghaü shuong, (khei mühghaümai ayingsi dogokei) jakshaikei sai? Lausikei kü mütli shuongei haoeneibü soneikangbü jeiko laobouei ku akuda kho jeia.

¹²O mühshuong, kan khünei mokashi hoba aeibou hatjihatko kiashi, dogo BUNYUBOUei lauda.

¹³Aishanga ngeibü mütliei shedbü penyi küma. Haoenei ngo langkeibü deikük inletkei, hoba haoen shanga deikhün, dei adangbü paknyinbü deikhün jakenakei.

¹⁴“Israelbü sambü che sai? Hao chema bukbü sambü che sai? Kholonga hao haitilabou che aila yeikei?

¹⁵Hao khulimbo molosaonyu paangshouei ngühkei, hoba ngühlang kukei hoba haoenei haoeneibü kaodak leiluan aptikei, haoeneibü sangnyu shuong müt akiko lonan apbei.

¹⁶Tokei Memfis si Tahpanhes mütshuongei kaibü khu khulo nyintikukei.

¹⁷Lausikei haoei no lamnyua leijinei BUNYUBOU kaibü Mühghaü nyi inletbü hangshong kho ka thükto sühkei aying lo?

¹⁸Hobaje tou Nail dei yungla shanga Ijep lama haubüei nyi ai pailetla? Ayingsi Eufrates dei yungla shanga Assiria lama haubüei nyi ai pailetla?

¹⁹No jembü amaibüei shieikoelabü, hoba no phai sukbüei ka to haklabü, hibü khoei BUNYUBOU kaibü Mühghaü inletla hoba soumo ühütko kibü kho lai amai hoba khaubü ki kho nyi ngelabü hoba haplabü, dogo Thükenbou BUNYUBOUei lauda.

²⁰“Aishanga shangied nyi kaibü buleng leilukei hoba kaibü khühbü phenthetkei, hoba nyi laukei, ‘Ngei akhangenlabü.’ Aishanga shonghshou suokbü wekoa hoba hakjung koubü bulong phang wekoa nyi no lolo lengkei hoba pejapelako kikei.

²¹Khei yingsikei ngei no pienbü semlüh long che kekei, aishanga lilabü jembüsangbü che kikei, khülonga aila kü thedanga haang alongbü yamkabü semlühlong yeikei?

²²Aishanga nyi sapon deiei no saksikei hoba sapon juong lesikei khei yingsikei kaibü shed shonbü kü thedanga nali kia dogo BUNYUBOU Mühghaüei lauda.

²³Ngo atotnyinkei, ngo Baal phaito ohau, dogo nyi lai lauenla? Pholia no haushang to chühashi, nyi ai kümbei ngeashi, you sobü ut shoushou jembü lama weneitaiko haubü kho no ki.

²⁴Yamkabü gadu yama haanghangyepbüei yei hipda, sao langeibü ka aoei sao sepeinyu ngaitila? Aoyouei sao lamda haoen lolo amanglabü, litcha maijinei haoenei sao haplabü.

²⁵No youkong teki hoba sanglou uko telang, lausikei nyi lauda, ‘Maanglem aki, aishanga ngei küksithang mühghaü shuong to sanouda, hoba haoen phaito ngo haulabü.’ ”

²⁶BUNYUBOUei lauda, “Kokbü lapenjinei hao himou baubü hima Israel chemdang himou baulabü, khei haoen haoeneibü Choba shuong, hoba haoeneibü leiyeibü shuong, haoeneibü ungshedbou shuong hoba haoeneibü thuseibü shuong himou baulabü.

²⁷Haoenei bulong che to, ‘No kübou,’ hoba laang che to, ‘Nyi ngo bukkei,’ dogo lauda. Aishanga haoenei haoeneibü thenyek ayingko haoeneibü takphai kü ae yeikukei. Lausikei haoeneibü khonsak chaloua haoenei laulabü, ‘Meimeiashi hoba kün khümenashi!’

²⁸“Lausikei nyi kümbü kaibü mühghaü shuong lanei ki? Kaibü khonsak chaloua haoenei no khümenla thükalonga, haoen meimeitiashi. Aishanga O Jihuda, kaibü sangnyu lajuche ki khüjoche kaibü mühghaü shuong ki.

²⁹Khülonga kanei ngo khulimbo aila lauyoda? Kan pendouei ngo khulimbo ngühkhüm leilua, dogo BUNYUBOUei lauda.

³⁰Amlanga ngei kaneibü shousi shuong to ngümbei; haoen maang asang, kan jembü inei kaneibü thuseibü shuong mautikubou molosaonyuei tegü suian apbei.

³¹‘O kan ho metenbü, kanei BUNYUBOUeibü ngüh ditashi, ngo Israel to yamlamang tegü kikei sai? Ayingsi nakthühbü kaodak tegü kikei sai? Khülonga aila kü mütli shuongei kün lulu lolo kida, kün ka jungto aloulabü,’ dogo lauda?

³²Medeiei jembü hele chimen yakmen maalep lo? Khei yingasikei kü mütli shuongei chalou shuong aweenko ngo maan apbei.

³³Sanounyu lamla nyi kaibü lamnyu lai küman ho ngeenda! Khei amaibü yaksa shuong tokei nyi kaibü lamnyu shuong lenakei.

³⁴Kaibü neia shed akakbü sii naangan hapda. Nyi kho paijung atbü ühüp. “Lausikei khübü pendou thüka hapbei. Khei yingasikei

³⁵nyi lauda, ‘Ngo shedbü aki; maimaitham BUNYUBOU kü ka asepeikei; chühashi, ngei shabü ajungei,’ dogo nyi laubü laüa ngei no yuktilabü.

³⁶Aila kaibü lamnyu ho hai jakshaiko shoongaida? Assiriaei no himoutilabü.

³⁷Kaibü khua kaibü ik tenan hao ka no satlabü; aishanga nyi maanglembü shuong BUNYUBOUei asunglet, hoba haoen yoa no naang amailabü.”