Read Chang Naga JEREMIA 20 Bible Online

JEREMIA 20 - Chang Naga bible

JEREMIA 20

¹Ladang Immereibü shou, BUNYUBOUeibü chema konglebou Pashur ungshedbouei Jeremiaeibü thusei ngüh habü ho ditkei,

²haoei thuseibou Jeremia to ngümbei hoba BUNYUBOUeibü chema Benjamin Bakhün Thükkabou thüngdang chema hao phokei.

³Nyibounyet Pashurei Jeremia thüngshang chem ka sungenjinei Jeremiaei hao to laukei, “BUNYUBOUei kaibü nyen Pashur aying; lausikei ‘Magor- Missabib’ dogo nyenkuda.

⁴Aishanga BUNYUBOUei hai lauda, ‘Chühashi, ngei no jembü shanga hoba kaibü thangbou shuong shanga hatlamoklabü che yeitilabü; hoba nyi hapbo haoeneibü dangbou shuongeibü inei haoen tuonglabü. Hobaje Jihuda pendou ngei Babilonbü Chobaeibü ik to kulabü; haoei haoen Babilon to laplanglabü, hoba inei haoen haitilabü.

⁵Tokei ngei sangnyu nyaksinam pendou, khoeibü pailetbü pendou, khonei namsek peisilei pendou thonan, Jihudabü Choba shuong nyaksinam pendou haoeneibü dangbou ik to kuan aplabü. Haoenei khübü kho soletbü nyaksinam tegü Babilon to künlanglabü.

⁶Hobaje no, Pashur, hoba kaibü chema kibü pendou Babilon langsenbü to haulabü. No khünei hailabü; no hoba nyi yepeijaweko tetenkubü kaibü jenabou shuong pendou yoan khünlabü.’ ”

⁷O BUNYUBOU, nyi ngo lepettikei, hoba ngo lepettiko kikei; kü toje no hau kibou, hoba nyi thüka. Chaseko ngo akhainyu yeia. Pendouei ngo awealauda; haoenei ngo chaseko nyikuda.

⁸Aishanga ladang ong ngei joyolaje ngei ngekla yeida, hoba ngekda, “Ik shatyobü! hoba Lusakbü!” BUNYUBOU, ngo chaseko akhainyu hoba hakeilabü che la yeia, aishanga ngei kaibü ngühlang phinthonda.

⁹Lausikei ladang, “Ngei BUNYUBOU nyen aphonglabü, ayingsi hao nyen alaueilabü,” dogo laulaje kheijinei kaibü ngüh kho ngeibü lomanga wan küplepnyu phobü maimai kü maangpona juokda. Ngei kho senetan phola hüanshemda, lausikei ngei athükenda.

¹⁰Aishanga müt juongei, “Pendou aenei hatlamoklabü! Hibü senei hao tesungletkho!” dogo laubü ngei ditda. Ngeibü maangjam thangbou shuongei mangkei ngo tuongbü chüheida hoba lauda, “Aingenyu hao huonoulabü, kheijinei senei hao lapan phok lamoulabü.”

¹¹Lausikei no, O BUNYUBOU, haukiyaangkibü, lakjaibou che tegü kü yoa kia; hibü ngo shieikoebü shuong phaiyetlabü; hoba haoenei ngo athüklabü. Haoen thonsithak akiko himoulabü,

¹²Lausikei, O Thükenbou BUNYUBOU, nyi saopobüa mütshuong takteida, hoba haoeneibü maangpona dambü hapda. Haoen thükto kaibü phoklambü kü la haptishi; aishanga ngeibü mat ngei ka la khümbo kua.

¹³BUNYUBOU to chia lauashi! BUNYUBOU sangashi! aishanga amaibü kümbü seisihau ka haoei shale jonglebü langkei püetda.

¹⁴Ngo bukbü chalou shedsikhau yingshi! Künyuei ngo bukbü chalou kho haülabü teyingma!

¹⁵Aoei kübou jungto, “Bousu shou che ka la bukkuakei!” dogo hao aeibou olintiko ngühlang künan loukei, hao shedsikhau yingshima!

¹⁶Kho müt kho BUNYUBOUei onou akiko tuongtibü, sangnyu shuong phatko kitishi; ngeyang ngesakbü ngühlang che hoba chajiha lapangbü che dittiashi;

¹⁷aieilausi haoei ngo nyusema ühaiti; tegüje künyueibü nayepshang kho ngeibü hee la yeikhoulabü.

¹⁸Ngo aila bukkei? khonkula hoba maangmau hapla hoba ngeibü salang himoua dantila shanga ong sai?