Read Chang Naga JEREMIA 22 Bible Online

JEREMIA 22 - Chang Naga bible

JEREMIA 22

¹BUNYUBOUei hai lauda: Jihudabü Choba chem to yanashi hoba khünei ho ngüh lenashi,

²hoba laushi, BUNYUBOUeibü ngüh ditashi, O Jihudabü Choba, ao Dawid Choba setshanga setda, no hoba kaibü khangenbü shuong, hoba kaibü mütli aoyou habü bakhün to lotda:

³“BUNYUBOUei hai lauda, ngühmai hoba saopobü kümashi hoba ao ka soshau soyungkei hao khonkutibou ik ka khümenashi, hoba yenbou, bou akibü ayingsi latnyu to ajanbü teküm; ayingsi ho saopobü kaoena sii tephin.

⁴Aishanga kanei maimaitham ho kümalonga kheijinei ho chem bakhün to Choba shuong aoyou Dawid setshanga setda, koli kailong hoba koli thüka setbü shuong, haoen hoba haoeneibü yaangenbü shuong, hoba haoeneibü mütli shuong lottilabü.

⁵Lausikei kanei habü ngüh aditlonga ngei lolo khei ho chem sangliphang la yeitilabü. Ngo BUNYUBOUei kho lauan apa.”

⁶Aishanga Jihudabü Choba chemdang shanga BUNYUBOUei hai lauda, “Kü thedanga no Gilead tegü, Lebanon shongh khu tegü, khei yingasikei ngei no yam che, müt akibü sangnyu che la yeitilabü.

⁷No naklepbo ngei leilutibou che hautida. Mütpem wekoei jembü wou sungbalabü, hoba haoenei kanei amenbü cedar bulong shuong chenglabü, hoba khübü kho wan to jinlabü.

⁸“Kho phaia phangshuong kho sangnyu peithetko danlabü, hoba mütpem wekoei jembü lepbü to, ‘Aila ho sangyaang to BUNYUBOUei hai jungeikei?’ dogo laulabü.

⁹Kheijinei haoenei jongailabü, ‘Aieilausi haoenei jembü Mühghaü BUNYUBOU to thebülanbü nangletkei, hoba lubü mühghaü shuong lembei, hoba haoen khangenkei.’ ”

¹⁰Ao haia hao shanga tühaap ayingsi mang tühaap; lausikei ao satda hao shanga aeibou haapashi, aishanga touje hao jembü kaodak chühla alongeilabü.

¹¹Aishanga Jihudabü Choba Josiaeibü shou Shallum, aoei haobou jeiko songdakkei hoba ao ho kishang ka satkei hao shanga BUNYUBOUei hai lauda: “Hao touje hato ladangkei alongeila sada.

¹²Lausikei kishang lato hao laplangkei hao khünei hailabü, hoba touje ho kaodak ladangkei ühüplabü.”

¹³Aoei jembü chem asaopobüei danglaje hoba jembü shemjang thükkabou ngühmaang alanbüei kümlaje; aoei jembü mütli amlanga kümtileitilaje, hoba haoeibü eik mukei akudaje kho müt ügütü!

¹⁴Aoei, “Ngei chem yaangbü che hopatham, thükkabou shemjang yoan danglabü,” dogo lauda kho müt ügütü! Hobaje haoei kho shanga koulom yettian, cedar buei koulom koukap kümda; hoba kho saklangbü laüei naanglepda.

¹⁵Cedar buei tokyoko chem dangbü shanga nyi no Choba maibou dogo damda sai? Kabouei ngühmai hoba saopobü kümbo shaukeiyungkei. Hibü khoei hao maian kikei.

¹⁶Haoei shalebü hoba khambü la yingkuan mat jembei, hibü khoei hao maian kikei. Ho ngo ngela shanga aying si? dogo BUNYUBOUei lauda.

¹⁷Lausikei nyi ngühmaang alanbü pailetbü shanga, hoba shed akakbüeibü sii phintila, hoba ka mütli khonsaktiko ik shatyola shanga ong kaneibü maangpon hoba nyek thean ki.

¹⁸Khei yingsije Jihudabü Choba Josiaeibü shou Jehoiakim shangabü hai lauda: “Hao hainyet aoeikei, ‘Ügütü, kü thangbou! ügütü!’ dogo lauko mang ühaaplabü. Ayingsi aoeikei hao shanga, ‘Ügütü, ngeibü bunyu! ügütü, ngeibü Choba!’ dogo lauko ühaaplabü ayingsi angeklabü.

¹⁹Gadu che khünan apbü hima Jerusalem bakhün danko hao senjung hauan tekan aplabü.”

²⁰Jerusalembü, Lebanon to angashi hoba ngekashi, hoba Bashana kaibü ngühlang ngekashi; hoba Moab ka ngekashi, aishanga no sanoubü pendou mautiakei.

²¹No naang maijinei BUNYUBOUei ka to joyokei, lausikei nyi laukei, “Ngei ngüha alelabü.” Nashou dangka thama no khei kikei, khei nyi BUNYUBOUei lenbü adit.

²²Kaibü sanlombü pendou yeiei soulangkulabü, hoba ka to sanoubü pendou laplanglabü; kheijinei kaibü amaibü kümsilei haangjung kaibü sangnyu nyikulabü hoba himoulabü.

²³O kan Lebanona kibü cedar bulonga hap takbü shuong, yaksa na hapla khonkubü tegü ladang ka thükto khonku sühlaje no latetche wila?

²⁴BUNYUBOUei Jihudabü Jeho- iakim Chobaeibü shou Jehoiakhin to laukei, “Ngo lang kishongko no ngeibü mai ikjikhap yingasikei ngei no kekan aplabü,

²⁵hoba nyi hatbü hoba ka langkei lambo kibü mütshuong ik to ngei no kuan aplabü. Ngei no Babilonbü Choba Nebukhadnezzar hoba haoeibü sepai shuong ikmang to kulabü.

²⁶Ngei no hoba kaibü bukbü nyu lubü kaonyek che to langsentilabü. Lanei no ayingsi sao abuk khüto kasi haulabü hoba ham khünei hailabü.

²⁷Kan longeila chüheibü kaonyek to kan ladangkei alongeilabü.”

²⁸Ngei laukei, “Ho Jehoiakhin Choba, akhainyu, hoba aoeikei athounouko tekan apbü chakkok che phatko yeia sai? Aila hao hoba haoeibü shousi shuong haoenei angebü kaodak che to langsenkei?”

²⁹O kaonyu, kaonyu, kaonyu! BUNYUBOUeibü ngüh ditashi:

³⁰BUNYUBOUei hai lauda, “Ho müt shousi aki dogo doashi, hao haanga jeibü akilabü. Aishanga Dawid Choba setshanga setla, hoba Jihudaa nyibou songdakla haoeibü shousi aokei apenlabü.”