Read Chang Naga JEREMIA 24 Bible Online

JEREMIA 24 - Chang Naga bible

JEREMIA 24

¹Babilonbü Choba Nebukhadnezzarei Jerusalem ka Jihudabü Choba Jehoiakimeibü shou Jehoiakhin hoba Jihudabü leiyeibü shuong, dobüshibü shuong hoba namyaübü shuong Babilon to lang senan phaia, BUNYUBOUei ho mangsang kü la lenkei. Chühashi, BUNYUBOUeibü lemshang thedanga bhuk kam penyi phoan kikei.

²Kam che kabü bhuk aeibou semlo maian shaang sembü tegü kikei; lausikei lubü kam che kabü bhuk kho shaula amaiko nyaüan sheman kikei.

³Kheijinei BUNYUBOUei kü to laukei, “Jeremia, nyi ai hapda?” Ngei laukei, “Bhuk. Bhuk maibü shuong kho aeibou maikei, bhuk amaibü shuong kho shaulakei amaikotham nyaüakei.”

⁴Kheijinei BUNYUBOUeibü ngühei kü to laukei:

⁵“Ngo BUNYUBOU, Israel Mühghaüei lauda: Jihuda ka Babilon to langsenbü shuong kho habü bhuk maibü phatko kilabü, hoba ngei haoen to sanouko thounoulabü.

⁶Maibü shanga ngeibü nyekei haoen to chühlabü, hoba ngei haoen ho kaodak to leibalabü. Ngei haoen huongngailabü hoba atuongtilabü; ngei haoen kelabü, hoba haoen pheian üplabü.

⁷Ngo BUNYUBOU ki, dogo ngetila ngei haoen la maangpon yemtilabü. Kheijinei haoen ngeibü mütli yinglabü, hoba ngo haoeneibü Mühghaü yinglabü, aishanga haoeneibü maangpon khümboei haoen kü jungto sepeilabü.”

⁸Lausikei BUNYUBOUei hai lauda, “Bhuk amaibü, laobou ashauenlabü lele amaiko ki, kho phatko ngei Jihudabü Choba Zedekia, haoeibü yaangenbü shuong hoba Jerusalema jouletbü shuong, ho kaodaka kibü hoba aoyou Ijep kaodaka kida, haoen to ngei amaiko jungeilabü.

⁹Ngei lae aeto haoen shian aplaje pendou aenei kaodak sangle thüka hatlamoklabü che, nyikubü che, tetenbü che mokde aplabü che hoba shedsikhau che yinglabü lele haoen yeitilabü.

¹⁰Hobaje haoen hoba haoeneibü pisibou la kubü kaonyek ka haoen lemailela amauti shongko ngei haoen thükto in, mühsinou hoba limsilang hautikulabü.”