Read Chang Naga JEREMIA 25 Bible Online

JEREMIA 25 - Chang Naga bible

JEREMIA 25

¹Jihudabü Choba Josiaeibü shou Jehoiakim songdakbü po leiboua Jihudabü mütli pendou shanga ngo Jeremia jungto loubü ngüh. (Kho Babilonbü Choba Nebukhadnezzareibü songdak shaangbou po kikei.)

²Ngei Jihudabü hoba Jerusalema kibü mütshuong pendou to laukei,

³“Jihudabü Choba Amoneibü shou Josiaeibü songdak po anthük semboubü ka khangan tat sühko, khübü po saoto sem, BUNYUBOUeibü ngüh kü jungto loukei, hoba ngei haoen to lendang lekei. Lausikei kanei ngüha ale.

⁴BUNYUBOUei haoeibü khangenbü, thuseibü shuong pendou thenei thenko kan jungto hautikei, lausikei kanei ngüha ale ayingsi aditku.

⁵Tou kan mütpem weko lulueibü amaibü lamnyu hoba kümsilei ka sepeiashi, khei yingsi ong BUNYUBOUei kan hoba kaneibü pisibou la shangieda kuan kibü kaonyeka kan ponpen kitilabü.

⁶Lubü mühghaü shuong phaito haoen khangenla hoba lemla tohau; kaneibü ikküm ikleiei ngo khau anglabü lele temaangpokti. Khei yingsi ong ngei kan aikei khon akutilabü dogo laukei.

⁷Khei yingasikei kanei kü to ngüha ale hoba kaneibü kümsilei amaibüei kanei ngo khau angtikei, hoba ka thükto leilubü sungbakei, dogo BUNYUBOUei lauda.

⁸“Hibü Thükenbou BUNYUBOUei hai lauda: Kanei ngeibü ngüha alebuba,

⁹chühashi, ngei yungkük kabü phang pendou ngashailabü, hoba ngo khangenbou Babilonbü Choba Nebukhadnez- zar ngalabü; hoba ho kaodak hoba habü mütli hoba habü phang khulimbo ngei haoen hautilabü. Hobaje ngei haoen lemailela mautilabü hoba haoen konga jimbü che, hoba mangsenlabü che hoba ponpendou sangliphang la yeitilabü, dogo BUNYUBOUei lauda.

¹⁰Tokei ekyonyiyo ngühlang, olin maangmai ngühlang, chemkanbü ngühlang hoba, shemshi otangbü, hoba wanthung ngesakbü ngei haoen ka ngailanglabü.

¹¹Hobaje ho kaodak khümbo leilubü hoba sangliphang yeilabü hoba habü phang shuongei Babilonbü Choba po anjinlei khangenlabü.

¹²Kheijinei po anjinlei penan phaia ngei Babilonbü Choba hoba haoeibü phang haoeneibü shedbü shabü shanga shieikoelabü. Ngei kho kaonyek leilukulabü hoba ponpen shanga sangliphang la yeitikulabü, dogo BUNYUBOUei lauda.

¹³Ngei ngeibü ngüh pendou, laobou khulimbo laukei, hoba ho lea doan kibü pendou, laobou Jeremiaei phang pendou khulimbo tetena, ngei kho ho kaodak thükto loutilabü.

¹⁴Aishanga phangshuong hoba Choba yaangbü juongei haoen aaola lelabü; hoba ngei haoeneibü kümsilei thüng haoen la ngaitikulabü.”

¹⁵Israel Mühghaü BUNYUBOUei kü to hai lauda, “Kü ka maangshatei sopbü ihthung ho sungashi. Hobaje ngei no hautibü phangshuong jungto hauashi, hoba haoen la haka yungtiashi.

¹⁶Ladang haoenei haka yunglaje, ngei haoen jungto in hautibü haangjung haoen tuong nyinyi hoba jaakjaakmakmak yeilabü.”

¹⁷Hibü ngei BUNYUBOUeibü ik ka thung kho sungkei, hoba BUNYUBOUei ngo hautibü shuong jungto hauan haoen la khüka yungtikei.

¹⁸Jerusalem hoba Jihuda sangnyu shuong, khükabü Choba shuong hoba konglebü shuong la yungtikei, khoei haoen sangliphang hoba satenshang mangsenlabü hoba shedsikhau che, khei tat kibü tegü yeitilabü.

¹⁹Ho thung ka yunglabü nyen shuong pendou hanei kia: Ijepbü Choba, haoeibü yaangenbü shuong hoba leiyeibü shuong; Ijepbü khümbo hoba Ijepa kibü küksithang shuong; Uz kaodak kabü choba pendou; Filistia sangnyu shuong Ashkelon, Gaza, Ekron hoba Ashdoda jouletbü dan; Edom, Moab hoba Ammonbü mütshuong pendou; Tair si Sidon Choba shuong pendou; Mediterrania kaonyu kabü Choba shuong pendou; Dedan, Tema hoba Buz kabü sangnyu shuong pendou; khulou tuibang aman khu shubü mütshuong pendou; Arabiabü Choba shuong pendou; phetsen kaodak kabü phang Choba pendou; Zimri, Elam hoba Mediabü Choba pendou; yungkük kabü Choba pendou, saabü hoba nyangbüa kibü, che thena che. Kaonyudaka phang wekoei ho ka yunglabü. Thonla Babilon Chobaei yunglabü.

²⁷Kheijinei BUNYUBOUei kü to laukei, “Mütshuong to hai lenashi, khei ngo Thükenbou BUNYUBOU, Israel Mühghaüei, haoen jaakan akhinngai shongko, hoba tuongetan pingaila athükko üpshongko yungdang lela ngühkhüm kuda; aieilausi ngei haoen khulimbo in hautia.

²⁸Hobaje haoenei kaibü ik ka thung kho yungla asungletlonga kheijinei nyi haoen to laulabü, khei Thükenbou BUNYUBOUei lauda: Kanei yungjan!

²⁹Aishanga chüh- ashi, ngei jembü sangnyua leilubü kümsilei che kümla khangda. Haoeneije haoen ashiakoelep dogo damda si? Khei aying, haoen shieikoelabü haang, aishanga ngei kaonyudak pendou to lason hautila kümda. Ngo Thükenbou BUNYUBOUei kho lauan apa.

³⁰“Hibü, Jeremia, ngei laubü habü ngüh pendou tetenashi. Nyi habü mütshuong la hai lenjan: ‘BUNYUBOUei thükae ka ngühlabü; haoei hao saopobü kishang ka tennyinlabü. Haoei hao mütli khulimbo hau yaangbüei ngühlabü; haoei semlüh ngünbü maimai ngeklabü, khei kaonyua kibü pendou khulimbo ngeklabü,

³¹hoba kaonyu thon sühko ngüh jolabü, aishanga BUNYUBOUei phangshuong khulimbo mat che kia. Haoei müt pendou matjemlabü, hoba amaibou kho haitilabü, dogo BUNYUBOUei lauda.’”

³²Thükenbou BUNYUBOUei hai lauda: Chühashi, phang che ka phang che to amaibü louda, hoba kaodak thonshang ka yeithu yeinak yaangbü che louada.

³³Hobaje kho chaloua BUNYUBOUei haitibü mangjim shuong kho kaodak ji thon ka ji thon sühko phinnyinan kilabü. Haoen shanga aoeikei mang ühaaplabü, hoba khübü kho alanglabü ayingsi akhünlabü. Kaonyu thüka haoen odsinot shaangbü phatko kilabü.

³⁴Haapashi, kan sanlombü shuong, hoba kaang ngekashi! Kan sanshuong leiyeibü dan, mang haapashi hoba thamngua lekeiashi! Aishanga kan sanlon paang tegü haitilabü jihsiphai loua; kan thamchak tegü atan phetnyinlabü.

³⁵Sanlombü shuong satshang jouan akilabü, sanlon leiyeibü shuong shanga satenshang akilabü.

³⁶Sanlombü dan ngekyobü ditashi, hoba sanshuong leiyeibü dan haapyobü ditashi; aishanga BUNYUBOUei haoeneibü lamshaushang leilukuda.

³⁷BUNYUBOU khauang maangshatei küp jemetshouko kibü kaonyek leiluan aplabü.

³⁸Molosaonyu che phatko haoei jembü laangbob apyolabü, aishanga BUNYUBOU khauang maangshatei haoeneibü kaonyek apshangdanglabü.