Read Chang Naga JEREMIA 26 Bible Online

JEREMIA 26 - Chang Naga bible

JEREMIA 26

¹Jihudabü Choba Josiaeibü shou Jehoakim songdakla khangbüa ho ngüh BUNYUBOU ka loukei,

²BUNYUBOUei hai lauda: “BUNYUBOUeibü Lembüchem khonga loashi, hoba BUNYUBOUeibü chem to lemla loubü Jihudabü sangnyu pendou to ngei ka to haoen la lenla sakkubü ngüh pendou lenashi; ngüh che ongkei tesenet.

³Aingenyu haoenei kho ditlabü, hoba mütpem weko jembü amaibü lamnyu ka sepeilabü. Kheijinei haoenei amaibü kümbü haangjung ngei haoen to amaibü kümla dambo kibü ka ngo maangpon sepeilabü.”

⁴BUNYUBOUei mütshuong to hai laula kü to lenkei: “Kanei kü to aditkulonga hoba ngei kan la sakkubü kü ngühkhüma apailonga,

⁵hoba kanei ngo khangenbü thuseibü shuongeibü ngüh to aditkulonga, aoyou, kanei aditkusi dogokei ngei tokei tokei kan jungto hautikei,

⁶kheijinei ngei ho chem Shilo phatko yeitilabü, hoba ho sangnyu kaodak phang pendou yo ka shedsikhau che tegü ngei yeitilabü.”

⁷Ungshedbou shuong si thuseibü shuong hoba mütli pendouei BUNYUBOUeibü chema Jeremiaei habü ngüh laubü ditkei.

⁸Lausikei ladang BUNYUBOUei müt pendou to lenla sakkubü pendou Jeremiaei laukhümbei, kheijinei ungshedbou shuong, thuseibou shuong hoba mütli noknyüh pendouei hao to ik shatko lapbei hoba laukei, “No hailabü haang!

⁹Aila nyi BUNYUBOU nyena ho chem Shilo phatko kilabü hoba ho sangnyu müt akiko sangliphang la yeilabü dogo tetenkei?” Hobaje müt pendou BUNYUBOUeibü chema Jeremia kaijembo kamshaikei.

¹⁰Ladang Jihudabü khuleibü shuongei habü kümsilei shangabü ditkei, haoen Choba chem ka BUNYUBOUeibü chem to angkei hoba BUNYUBOUeibü chem Bakhün Haanbü to atshanga setkei.

¹¹Kheijinei ungshedbou hoba thuseibou shuongei khuleibü hoba müt pendou to lenkei, “Ho müt haila muakei, aieilausi haoei ho sangnyu khulimbo laua. Kaneikei kaneibü noueitham dida.”

¹²Kheijinei Jeremiaei khuleibü shuong si noknyüh pendou to joyoko laukei, “Kanei ditbü ngüh pendou kho ho chem hoba ho sangnyu khulimbo laula BUNYUBOUei ngo hautikei.

¹³Hibü tou kanei kümbü shuong kümetashi, hoba BUNYUBOU kaneibü Mühghaüeibü ngüh ditashi, hoba BUNYUBOUei amaibü laobou haoei kan khulimbo lauan ki, kho senetngailabü.

¹⁴Lausikei kü shangaje chühashi, ngo kaneibü ika kia, kan thedanga maibü hoba tükde dogo dambü kü to kümshi.

¹⁵Lausikei kanei ngo haitialonga, kanei shed akibü sii angtibü shedbü kho kan jembü lolo to hoba ho sangnyu hoba ho mütli thükto sungbalabü, aishanga BUNYUBOUei kanei ditko habü ngüh pendou joyola ngo kan jungto hautikei.”

¹⁶Kheijinei khuleibü hoba müt pendouei ungshedbou si thuseibü shuong to laukei, “Ho müt haila amukei; aishanga haoei BUNYUBOU seneibü Mühghaü nyena sen to joyoa.”

¹⁷Hobaje kaonyek kabü jaishou atei loenan kamshaian kibü pendou to joyoko laukei,

¹⁸“Ladang Moreshetbü Mikaei Jihudabü Choba Hezekia chaloua tetenkei hoba Jihudabü mütli pendou to, Thükenbou BUNYUBOUei hai lauda: ‘Zion sek tegü shapnyinlabü, Jerusalem leilubü odsinot shaangbü che yeilabü, hoba Lembüchem shongh kho lamang shongh yeilabü,’ dogo laukei,

¹⁹Jihudabü Choba Hezekia si Jihudabü pendouei hao haitikei si? Aeiko Hezekiaei BUNYUBOU to soumo hatko BUNYUBOUeibü onou hapla asuaja lo? Hobaje BUNYUBOUei amaibü laobou haoen khulimbo kümla laukei, haoei kho asungngai sai? Tou senei lolo sen thükto amaibü yaang senletla kümda!”

²⁰(Tokei lubü che aoei BUNYUBOU nyena tetenkei, Ki- riath-jerim ka Shemaiaeibü shou Uria, haoei ho sangnyu hoba ho kaodak khulimbo Jeremiaeibü ngüh phatko tetenkei.

²¹Hobaje ladang Jehoiakim Chobaei haoeibü khuleibü pendou hoba kongnyu pendou yoan haoeibü ngüh shuong ditkei, Chobaei hao haitila lambei. Lausikei ladang Uriaei ho shangabü ditkei hao hatla satkei hoba Ijep to satetlangkei.

²²Kheijinei Jehoiakim Chobaei Akhbor shou Elnathan yoa müt at Ijep to Uria lamla hautikei.

²³Haoenei Ijep ka Uria leian loukei hoba Jehoiakim jungto sungbakei. Chobaei hao inei haitikei hoba haoeibü mang püh khünshang to jinkukei.)

²⁴Lausikei Shafaneibü shou Ahikamei kü la pü lekubü danko haoenei ngo haitila noknyüh ik to khümbo kuan üp.