Read Chang Naga JEREMIA 27 Bible Online

JEREMIA 27 - Chang Naga bible

JEREMIA 27

¹Jihudabü Choba Josiaeibü shou Zedekia songdak khangbüa BUNYUBOU ngüh ho Jeremia jungto loukei.

²BUNYUBOUei kü to hai laukei: Nyi lolo kip hoba buleng kaang kümashi hoba khübü kho kaibü ngüma yakashi.

³Hobaje Jerusalem to Zedeia Choba jungto loubü lambubou shuong danko Edom Choba, Moab Choba, Ammon Choba, Tair Choba hoba Sidon Choba jungto ho ngühlang hautiashi.

⁴Haoen la haoeneibü bunyu shuong shanga ho ngühlang lentishi, Thükenbou BUNYUBOU Israel Mühghaüei hai lauda: Kaneibü BUNYUBOU shuong to hai lenshi:

⁵“Ngeibü seisihau yaangbüei ngei kaodak, khunakshousi, hoba kaodaka kibü meisiau shuong kümbei; hoba kho ngei kü la maikubü la kuda.

⁶Tou ngei kaneibü kaonyek pendou ngo khangenbou Babilonbü Choba Nebukhadnez- zar la kuakei, hoba tokei ngei hao la khongthu yaang kabü shatsinam shuong hao khangenla kuakei.

⁷Hao jembü kaodak tuonglabü chalou apen shongko phang pendouei hao, haoeibü shousi, hoba haoeibü shisi shuong khangenlabü; kho phaia phang juongei hoba Choba yaangbü shuongei hao haoeneibü aao la yeitilabü.

⁸“Lausikei phang atei kho Nebukhadnezzar, Babilonbü Choba akhangenlonga hoba Chobaeibü songdak phangto akhomlonga, kho phang inei, mühsinouei hoba limsilangei, khei haoeibü ikei kho amautishongko, ngei shieikoelabü, dogo BUNYUBOUei lauda.

⁹Hibü kanei thuseibü shuong to ayingsi khopjik seibü shuong to ayingsi manghtakbü shuong ayingsi yemshanbü shuong ayingsi seibü yaübü shuong aoyouei kan to, ‘Kanei Babilon Choba tekhangen,’ dogo lauda haoen to ngüha tele.

¹⁰Aishanga haoenei kho kan kaneibü kaonyek ka saabü to kuktila yepeijaweko tetenkuda; ngei kan shian sattilabü hoba kan shemlabü.

¹¹Lausikei phang laobouei jembü ngüm Babilonbü Choba kaang phangto sungbalaje kho phang ngei jembü kaodaka sek moushauko khünei kitilabü, dogo BUNYUBOUei lauda.”

¹²Jihudabü Choba Zedekia to ngei jeteibü ngühlang kukei. Ngei laukei, “Babilonbü buleng phangto kaneibü ngüm atashi; hoba hao si hao mütshuong khangenashi, hoba kan lang kilabü.

¹³Laobou phangei Babilonbü Choba akhangenda kho phang shanga BUNYUBOUei laubü tegü, aila no hoba kaibü mütli mühsinouei hoba limsilangei haila?

¹⁴Thuseibü shuong aoyouei kan to, ‘Kanei Babilonbü Choba akhangenlabü,’ dogo laulaje haoeneibü ngüh kanei tedit, aishanga haoenei kan la amlangbü tetenkuda.

¹⁵Ngei haoen ohauti, dogo BUNYUBOUei lauda. Lausikei haoenei kü nyena amlangbü tetenda. Hibü ngei kan shian sattilabü, hoba kan hoba kan la amlang tetenkubü thuseibü shuong khonei maulabü.”

¹⁶Kheijinei ngei ungshedbou shuong hoba müt pendou to joyoko laukei, “BUNYUBOUei hai lauda: Kaneibü thuseibü shuong aoyouei kan to ‘Chühashi, BUNYUBOUeibü chema kibü thungsiphau shuong tou lalok akiko Babilon ka sungngaibalabü,’ dogo tetenkuko kibü thuseibü shuong to tedit. Haoenei kan la amlangbü tetenkuda.

¹⁷Haoen to ngüha tele. Babilonbü Choba khangenashi hoba kan lang kiashi. Aila ho sangnyu sangliphang la yeila?

¹⁸Haoen maimaitham thuseibü shuong yingalonga, hoba BUNYUBOUeibü ngühlang haoen yoa kialonga khülonga Thükenbou BUNYUBOU to Lembüchema kibü thungsiphau shuong phoyokula hoba Jihudabü Choba chema kibü hoba Jerusalema kibü shuong Babilon to alangtilabü lele joyotiashi.”

¹⁹(Ladang Nebukhadnezzar Chobaei Jihuda Choba Jehoiakim shou Jehoiakhin, hoba Jihuda si Jerusalem kabü khuleibü shuong Babilon to laplangkei, haoei thaonyu shuong, chinam deidang, denshang kailong, hoba Lembü- chem kabü nyaksinam at asunglang.)

²¹“Ditashi, BUNYUBOUeibü chema apyokuan kibü thungsiphau si Jihudabü Chobaeibü chema hoba Jerusalema kibü shangabü Israel Mühghaü Thükenbou BUNYUBOUei hai lauda.

²²Khübü peisilei Babilon to künlanglabü hoba ngei haoen pean chühbü chalou asühshongko khübü kho khünei kiteilabü, dogo BUNYUBOUei lauda. Kho phaia ngei haoen nyibou sungbalabü hoba kho kaoena phongailabü.”