Read Chang Naga JEREMIA 28 Bible Online

JEREMIA 28 - Chang Naga bible

JEREMIA 28

¹Kho poa ong Jihudabü Choba Zedekiaeibü songdak khangbü po leibou, lit ngaoboubüa, Gibeon ka Azzureibü shou Hanania thuseibouei BUNYUBOUeibü chema ungshedbou shuong hoba müt pendou thedanga kü to joyoko laukei:

²Israel Mühghaü BUNYUBOUei hai lauda: “Ngei Babilonbü Chobaeibü buleng leilutikua.

³Po nyi kanglanga Babilonbü Choba Nebukhadnez- zarei haka künlangbü Lembü- chem kabü peisilei pendou ngei ho kaoen to sungngaibalabü.

⁴Ngei tokei Jihudabü Choba, Jehoiakimeibü shou Jehoiakhin hoba Babilon to langsenbü Jihudabü shuong pendou nyibou leingailabü. Haü, ngei Babilon Chobaeibü buleng leilutikulabü, dogo BUNYUBOUei lauda.”

⁵Kheijinei ungshedbou shuong thedanga hoba BUNYUBOUeibü chema loan kibü pendou thedanga thuseibou Jeremiaei thuseibou Hanania to jongaikei.

⁶Haoei laukei, “Amen! BUNYUBOUei kheishou naküma! Nyi tetenbü ngüh shuong tegütham, BUNYUBOUei Lembüchemeibü peisilei shuong hoba Babilon to langsenbü shuong leibako haüthüktishima.

⁷Khei yingasikei tou ngei laobou kan pendouei hoba müt pendouei ditko lauda ho ditashi:

⁸Shangied ka thuseibü shuong aoyou kan to hoba kü to shaang kikei, haoenei wapyo, mühsinou, hoba limsilang, kaonyek yaangbü juong hoba sangle yaangbü shuong khulimbo tetena.

⁹Lausikei thuseibü aoei sangmei shanga tetenda hao shangaje ladang kho thusei ngüh loushedlaje, kheijinei ong BUNYUBOUei tükde thuseibou kho hautikei dogo ngeko louda.”

¹⁰Kheijinei thuseibou Hananiaei Jeremiaeibü ngüm ka buleng kho sungkei hoba leilukukei,

¹¹hoba Hananiaei müt pendou thedanga joyoko laukei, “BUNYUBOUei hai lauda: ‘Kho tegü ngei po nyi kanglanga phang pendoueibü ngüm ka Babilon hoba Nebukhadnezzareibü kaangkhüh leilukulabü.’” Kheijinei thuseibou Jeremiaje jembü lam to haukei.

¹²Thuseibou Hananiaei Jeremia thuseiboueibü ngüm ka kaangkhüh kho leilukuan longche kian BUNYUBOUeibü ngüh Jeremia jungto loukei:

¹³“Hauashi hoba Hanania to lenshi, BUNYUBOUei hai lauda: Nyi bueibü kaangkhüh leilua, lausikei khübü jeiko ngei namkungeibü kaangkhüh kümbulabü.

¹⁴Aishanga Israel Mühghaü, Thükenbou BUNYUBOUei hai lauda: Khübü phang pendouei haoenei Babilonbü Choba Nebukhadnezzar khangenla ngei namkungeibü kaangkhüh haoeneibü ngüma jinkua; hoba haoenei hao khangenlabü, hoba ngei hao la khongthu kabü shatsinamkei kua.”

¹⁵Kheijinei thuseibou Jeremiaei thuseibou Hanania to laukei, “Tou ditashi, Hanania, BUNYUBOUei no ohauti, lausikei nyi habü mütli la amlanga mailemtikei.

¹⁶Hibü BUNYUBOUei hai lauda: Chühashi, ngei no kao the ka kuktilabü. Toupotham no hailabü, aieilausi nyi mütshuong la BUNYUBOU khulimbo lena.”

¹⁷Hibü Hanania thuseibou kho khüpotham lit nyetboubüa haikei.