Read Chang Naga JEREMIA 29 Bible Online

JEREMIA 29 - Chang Naga bible

JEREMIA 29

¹Laobou Jeremia thuseibouei Jerusalem ka langsenbü jaishou shuong jungto, ungshedbou shuong jungto, thuseibü shuong hoba müt pendou, aoyou Jerusalem ka Babilon thüngshang to Nebukhadnezzarei langsenkei, haoen pendou jungto dobü le ngüh shuong habü ki.

²(Ho Jehoiakhin Choba, haoeibü nyu, sungphatbü shuong, Jihuda hoba Jerusalembü leiyeibü shuong, buei noksa kümbü shuong, hoba namyaübü shuong Jerusalem ka langsenan kibü shuong to dokei.)

³Shafaneibü shou Elasa hoba Hilkiaeibü shou Gemaria, aoyou Jihudabü Choba Zedekiaei Babilon to Nebukhadnezzar Choba jungto hautikei, haoeneibü ika le dobü hautiko laukei:

⁴“Israel Mühghaü, Thükenbou BUNYUBOUei hai lauda, langsenbü pendou aoyou ngei Jerusalem ka Babilon to langsenan hautikei:

⁵‘Chemsibung dangashi hoba khünei kiashi. Balaak leashi hoba khüka longbü shauashi.

⁶Yak ngaashi, hoba jayang nouyang shousi kiashi. Kaneibü shousi shuong la yak ngakuashi hoba kaneibü yaksa shousi shuong laolamla hautiashi, khünei haoenei nouyang jayang shousi buklabü. Khünei kan bukko haako hauashi hoba shijung tengai.

⁷Lausikei ai sangnyu to ngei kan laplangtikei kho sangnyu shanga sangmai naangmaibü lambushi. Kho shanga BUNYUBOU to welaukuashi, aishanga kho hakso naangmaibüa kisi ong kan soloko kilabü.

⁸Aishanga Thükenbou BUNYUBOU, Israel Mühghaüei hai lauda: Kan yoa kibü kaneibü thuseibü shuong hoba kaneibü wanenkubü shuongei kan tehuonetti. Ayingsi haoeneibü mangh to kanei teditku.

⁹Aishanga haoenei ngeibü nyena yepeijaweko tetenda. Ngei haoen ohauti, dogo BUNYUBOUei lauda.’

¹⁰“Aishanga BUNYUBOUei hai lauda: Ladang Babilonbü shanga po anjinlei penlaje, ngei kan pean chühlabü, hoba ngeibü thekubü ngei haüthüktilabü hoba kan hato sepeinyu leian longeilabü.

¹¹Aishanga kan shanga ngeibü lamthen ngei ngeakei; khei kan to komla aying lausikei kan naangmailabü lamthen, hoba kan la loulabü shanga maanglem souko kulabü lamthen, dogo BUNYUBOUei lauda.

¹²Kheijinei kanei kü to ngalabü, hoba louan kü to sulajalabü, hoba ngei kan to ditkulabü.

¹³Kanei ngo lamlabü hoba ngo haplabü, ladang kanei maangpon khümboei lamlaje.

¹⁴Haü, kanei ngo haplabü, dogo BUNYUBOUei lauda, hoba ngei kaneibü kaonyu thu kümetkulabü. Phang pendou hoba kaonyek pendou ka, lae aeto ngei kan nangan apbei khoka ngei kan leishailabü, hoba kishang laobou ka ngei kan laplangtikei khüto ngei kan leingaibalabü, dogo BUNYUBOUei lauda.”

¹⁵“Kanei, BUNYUBOUei sen shanga Babilona thuseibü shuong longtikei, dogo laula thükkei,

¹⁶lausikei Choba ao Dawid setshanga setda, hoba sangnyua kibü müt pendou, kaneibü thensilen aoyou kan yoa alaplang, haoen shang- abü BUNYUBOUei hai lauda,

¹⁷Thükenbou BUNYUBOUei hai lauda: Chühashi, ngei kan thüka in, mühsinou hoba lim hautikuda, hoba bhuk laobou nyaübü shaula amai, kho phatko ngei kan yeitilabü.

¹⁸Ngei in, mühsinou, hoba limsilangei haoen shieilabü hoba kaodak sangle pendou shanga konglabü, shedsikhau che, hatlamoklabü che, mangsenlabü che, hoba ngei lae aeto haoen shian apbei phang pendou yoa akhainyu che yinglabü.

¹⁹Aieilausi haoenei ngeibü ngüha ale, dogo BUNYUBOUei lauda, laobou ngei moshikko ngeibü khangenbü thuseibü shuong danko hautikei, lausikei kanei teditkho laukei, dogo BUNYUBOUei lauda.

²⁰Hibü, BUNYUBOUeibü ngüh kho ditashi, kan langsenbü pendou, aoyou ngei Jerusalem ka Babilon to hautikei.

²¹“Thükenbou BUNYUBOU, Israel Mühghaüei hai lauda, Kolaiaeibü shou Ahab hoba Maaseiaeibü shou Zedekia aoyouei kan to kü nyena yepeijaweko tetenda: Haoei haoen shangabü hai lauda: Chühashi, ngei haoen Babilonbü Choba Nebukhadnezzar la khümbo kulabü, hoba kan thedanga haoei haoen haitilabü.

²²Hobaje Babilona Jihuda ka laplangbü pendouei haosi laüa ho shedsikhau ngühtet jungeilabü: BUNYUBOUei no Babilonbü Chobaei wana juokettibü Zedekia si Ahab phatko yeitilabü.

²³Aieilausi haosiei Israelbü ngoukolouko jungeikei; haosiei jembü lepboueibü yaksi shuong to asangalanbü jungeikei, hoba haosiei ngeibü nyena ngei haosi la asakkubüa amlang ngüh laukei. Ngei ngeakei hoba ngo aukabü ki, dogo BUNYUBOUei lauda.”

²⁴Nehelambü Shemaia to nyi lenshi,

²⁵“Thükenbou BUNYUBOU Isreal Mühghaüei hai lauda: Nyi kaibü nyena Jerusalema kibü pendou jungto hoba Maaseiaeibü shou Zefania ungshedbou ungto hoba ungshedbou pendou jungto ho hai lenko le hautia:

²⁶‘BUNYUBOUei Jehoiada ungshedbou jeiko no ungshedbou yeitikei; hoba aoei ong BUNYUBOUeibü chema langet angko tetenda, hao tegübü thüngdanga hoba ngümyaka phola shanga no ikjai ki.

²⁷Kholonga, Anathotbü Jeremia, aoei jembü lolo kan thedanga ungshedbou la yeian ki hao to aila ühak?

²⁸Aishanga haoei Babilona sen jungto ngühlang hautiko laukei: Kan thüngchema lounyu kilabü; chem dangashi hoba khünei kiashi, hoba balaak leashi hoba khoka longbü shauashi.’”

²⁹Zefania ungshedbouei ho le Jeremia thuseibouei ditko wekei.

³⁰Kheijinei BUNYUBOUeibü ngüh Jeremia jungto loukei:

³¹Langsenbü pendou jungto hautiashi, hoba lauashi: Nehelambü Shemaia shangabü BUNYUBOUei hai lauda: Aieilausi ngei ohautisikei Shemaiaei kan to tetenko lenkei, hoba kan la amlanga mailemtikei.

³²Hibü BUNYUBOUei hai lauda, “Chühashi, Nehelambü Shemaia hoba hao ka bakbü shuong ngei sheieikoelabü. Ngei kü mütli to maibü kümla kibü kho haoei haplabü lele hao shanga ho mütli yoa che ongkei lang aphokulabü, dogo BUNYUBOUei lauda; aishanga haoei kü to khulimtilabü ngüh laua.”