Read Chang Naga JEREMIA 3 Bible Online

JEREMIA 3 - Chang Naga bible

JEREMIA 3

¹BUNYUBOUei lauda, “Müt cheei jembü yak sattisi, hoba saoei hao ka bangjung satan lubüeibü yak la yeian haoei sao jungto nyibou ngailep lo? Khoei kaonyu aeibou shedlep aying lo? Nyi sanouyobü juong to pejapelako kian tokei no nyibou kü jungto loulep lo?” dogo BUNYUBOU Mühghaüei lauda.

²“Kaolong shonghkhu aeto kaibü nyekei chühangtiashi, hoba chühashi, no ayepbü kaoen lanei ki? Arabbü yama tegü lama no haoen shanga setan kiteikei; hoba kaibü asangalanbü kümsileiei hoba kaibü shedbüei nyi kaonyek shentikei.

³Hibü langloubü senetkei hoba youshap lang alou; khei yingasikei no asangalanbü the yeman ihimouko kida.

⁴“Touje nyi kü to, ‘Abou, nyi kü to heshoudanga thama sanouko thounoukei dogo angekda lo?

⁵Hao ponpen khauangko kilep lo? Haoei kho thon sühko kilep lo?’ Chühashi Israel, nyi laua, lausikei thükthüng nyi amaibü küma.”

⁶Josia Choba haanga BUNYUBOUei kü to laukei, “Sukjung ngaibü Israelei ai kümbei nyi hapakaoba lo? Sao shongh suokbü weko to angan hoba bulong phang weko to hauan khünei pejapela kümsilei kümbei.

⁷Hobaje saoei habü pendou küman phaia, sao kü jungto sepeilep dogo ngei dambei.

⁸Hobaje ladang khei sukjung ngaibü Israelei asang- alan jungeikei, ngei sao tekan apbei. Khei yingasikei khüpettibü Jihuda saoeibü nousinaei ühüt, lausikei tokei saokei haukei hoba asangalanbü jungeikei.

⁹Sao pejapelako helelea kibü danko kaonyek kho shaan apbei hoba haoei laang si bulong to asangalan kümbei.

¹⁰Ho pendou haüthüksi dogokei sao maang- asangbü jaisina Jihudaei saoeibü maangpon pendouei kü jungto sepeinyu alou, lausikei hibü- youbü maangpon kikei,” dogo BUNYUBOUei lauda.

¹¹Kheijinei BUNYUBOUei kü to laukei, “Phaisukbü Israelei ong amlangbü Jihudabü to aei ngühmai lena.

¹²Hauashi, hoba khübü ngüh yungküka ngekashi, hoba lenashi, phaisukbü Israel, sepeiashi dogo BUNYUBOUei lauda; ngo ka to khau angyoyo akhüplabü, aishanga ngei onouda, ngo ponpenje khauangko akilabü,” dogo BUNYUBOUei lauda.

¹³“Nyi BUNYUBOU kaibü Mühghaü khulimbo ngühkhüm leilukei hoba küksithang thedanga bubhek hakjung koubü bulong phanga nyi kaibü thedüh maangdüh shuong phinthonkei, hoba nyi ngeibü ngüh adit dogo kaibü shedbü thekuashi,” dogo BUNYUBOUei lauda.

¹⁴BUNYUBOUei lauda, “Sepeiashi, O phaisukbü shousi shuong, aishanga ngo ka to chem kana, hoba ngei kan sangnyu ka che hoba chemdang ka penyi pienlabü, hoba ngei kan Zion to leibalabü.

¹⁵Hobaje ngei kan la ngeibü maangsembü sanlombü shuong kulabü, aoyouei kan hapbüngebü songadoa hoba ditenbüei samlabü.

¹⁶Hobaje khübü chaloua BUNYUBOUei lauda, ladang kaonyeka kan bukkohaako hoba haakoyaangko yeilaje haoenei, ‘BUNYUBOUeibü thebülanbü ngühkhüm busen,’ dogo alaulabü; ayingsi haoenei kho adamenlabü, ayingsi haoenei kho pean achühlabü.

¹⁷Kho chaloua haoei Jerusalem to BUNYUBOUeibü Choba Setshang dogo ngalabü; hoba phang pendou khünei BUNYUBOUeibü nyena Jerusalema kamshailabü; ayingsi haoenei touje haoeneibü sensimaang amaibüa tukosekko apailabü.

¹⁸Khübü chaloua Jihudabü chemdang kho Israelbü chemdang yoa pailabü hoba haoen yungkük kaonyek aeka kaneibü pisibousi shuong la ngei phet- phanla kubü kaodak to liko loulabü.”

¹⁹Kheijinei ngei laukei, “Ngei no ngeibü shousi shuong yoa lai phokula hoba ka la kaonyek maibü phangshuongeibü phetphan maibü lai kula? Hobaje ngei laukei: Kanei kü to, ‘Abou,’ dogo ngalabü; hoba kü phai sembü ka sepeinyu angailabü.

²⁰Maimaitham yakei jembü lao khüpettiko bangbü tegütham, kanei ngo khüpettiko jungeikei; O Israel chemdang,” dogo BUNYUBOUei lauda.

²¹Kaolong shonghkhua ngüh che ditda, Israel shousi shuong haapbü hoba subüjabü ngühlang; haoenei jembü lam theknyinsije, haoenei BUNYUBOU haoeneibü Mühghaü maan apbei.

²²Sepeiashi, kan phaisukbü shousi shuong, kan phaisukbü ngei maitilabü. “Haü, kün ka jungto louada, aishanga no BUNYUBOU küneibü Mühghaü ki.

²³Tükde shongh hoba shonghshou ka thuibü lambü, hoba shonghnyua lemenbü jim aki. Maimaitham BUNYUBOU seneibü Mühghaü to Israel khümenbü ki.

²⁴“Sen heshoudang ka thama himou kümsileiei seneibü pisibouei kümenbü suian apbei; haoeneibü sanlon tan hoba masu shuong, haoeneibü shousi shuong hoba haoeneibü yaksa shousi shuong.

²⁵Sen himou baubüa sen leketnyu yepbho hoba seneibü himouei sen küplettishi, aishanga seneibü BUNYUBOU Mühghaü khulimbo senei hoba seneibü pisibousi shuongei sen heshou dangka tat sühko shed shona hoba senei BUNYUBOU seneibü Mühghaü ngüha ale.”