Read Chang Naga JEREMIA 30 Bible Online

JEREMIA 30 - Chang Naga bible

JEREMIA 30

¹BUNYUBOU ka Jeremia jungto loubü ngüh:

²BUNYUBOU Israel Mühghaüei hai lauda, “Ngei ka la lenbü ngüh pendou le chenei doashi.

³Aishanga BUNYUBOUei lauda: ‘Chühashi, ngei kü mütli Israel si Jihudabü thu kümetkulabü chalou louada, hoba ngei haoeneibü pisibou la kubü kaonyek to ngei haoen nyibou leibalabü, hoba kho haoenei phet phanlabü dogo BUNYUBOUei lauda.’”

⁴BUNYUBOUei Israel si Jihuda shangabü joyobü ngüh shuong kho ho:

⁵“BUNYUBOUei hai lauda, künei panglangbü, hatbü hoba hakso akibü ngühlang ditda.

⁶Tou loashi, hoba damanchühashi! Bousuei shou buklep lo? Khülonga aila bousu wekoei yaksaei na hapjinei kümbü tegü, lulueibü shimunga jembü ikei shangetan ngei hapda hoba aila thenyek phaklaktham kida?

⁷Ügütü, ho chalou aeibou yaangkei! ho phatko ai aki. Kü mütli Jakob shanga khonkulabü, lausikei kho chalou ka hao khümenlabü.”

⁸Thükenbou BUNYUBOUei: “Ladang kho chalou sühlaje, ngei haoeneibü ngüm ka kaangkhüh kho leilukulabü, haoeneibü khühbü phenthetkulabü hoba haoen touje küksithang shuongeibü aao la ayeitilabü, dogo BUNYUBOUei lauda.”

⁹Lausikei haoenei ngo haoeneibü BUNYUBOU Mühghaü, hoba ngei haoen shanga longtikula kibou Dawid Choba khangenlabü.

¹⁰“Kholonga tehüt, O Jakob, ngo khangenbou; ayingsi hatkomokko teki, O Israel. Ngei kan hoba kaneibü thensilen kaonyek saabü ka, hoba kan langsenshang ka püetlabü. Hobaje Jakob longeilabü hoba sangmaia hopatham kilabü, hoba aoeikei hao ühüttilabü, dogo BUNYUBOUei lauda.

¹¹Aishanga ngo ka yoa kia hoba no khümenlabü. Phang pendou aoyou yoa ngei no phinnyintikei, ngei haoen mautilabü, lausikei kan ngei khümboje athontilabü. Ngei ka to ngühmaiei haklabü; ngei no ashiakoeko thamje üpyolabü, dogo BUNYUBOUei lauda.”

¹²BUNYUBOUei mütshuong to hai lauda: “Ka la aakbü amaitikuenlabü, ka la mou yaang leakei.

¹³Ka shanga thounoulabü müt ao aki, kaibü mou shanga maishang aki, no mailabü maanglem aki.

¹⁴No sanoubü shuongei no maa; haoenei no alamda. Aishanga ngei ka la dangboueibü mou tegü letikei; hoba onou akakko shieikoekei, aieilausi no shabü yaang kia. Aishanga kaibü shedbü yaangseba, hoba kaibü shabü juongsepa.

¹⁵No leilubü shanga ainyula ngekda; no khonkubü maila athük. Aieilausi kaibü shedbü yaangbü hoba kaibü shabü juong thüngei ngei habü ho ka to kümbei.

¹⁶Lausikei no suibü dan pendou suilabü, hoba kaibü labou pendou lang senlabü. No khonkutibü shuong pendou khonkutilabü, ka ka soshau soyungbü shuong ka ngei solabü.

¹⁷Lausikei ngei no maingaitilabü; hoba kaibü mou shuong maitilabü; kaibü dangbou shuongei ka to, ‘Aoeikei athounouko tekan apbou Zion,’ dogo lauasikei, dogo BUNYUBOUei lauda.”

¹⁸BUNYUBOUei hai lauda, “Chühashi, Jakobeibü neichem thu kho ngei nyibou kümetkulabü hoba hao kishanga onou kilabü, sangnyu kho hao jembü shongh thüka kümlabü hoba Chobaeibü chem kho lanei kikei khünei lolabü.

¹⁹Khükabü mütshuongei nyensangbü chia laulabü; haoenei olinbüei ngekyolabü. Ngeibü haülabüei haoen haalabü hoba shijung angailabü; ngeibü haülabüei haoen la soumo sungbalabü hoba haoen hanbü la ayeilabü.

²⁰Haoeneibü shousi shuong shangied tegü haanglabü, hoba kü thedanga haoeneibü mütli huongenlabü; hoba haoen shieikoebü pendou ngei shieikoelabü.

²¹Haoeneibü choba kho haoen yo kabü che yinglabü; haoeneibü songdakbou haoen yo ka longlabü. Ngei hao ngo nyangko leibalabü, hoba hao ngo nyangko loulabü; aishanga angako aoei jembü lolo ngo nyangko loula maang yaangenla? dogo BUNYUBOUei lauda.

²²Hibü kan ngeibü mütli kilabü, hoba ngo kaneibü Mühghaü kilabü.”

²³BUNYUBOUeibü yeithu yeinak khoto chühashi, maangshat sada, yeithu yeinak yeishik saklangbü kho amaiboueibü khua loushatlabü.

²⁴BUNYUBOUeibü khauang maangpok longbü haoei akümshongko hoba awanti shongko angailabü. Phailamaje kanei ho ditenlabü.