Read Chang Naga JEREMIA 31 Bible Online

JEREMIA 31 - Chang Naga bible

JEREMIA 31

¹BUNYUBOUei lauda, “Kho chaloua Israel chung pendoueibü Mühghaü kho ngo kilabü, hoba haoen ngeibü mütli kilabü.

²BUNYUBOUei hai lauda: Mütli aoyou in ka satenkei haoenei yama onou hapbei. Ladang Israel mütliei hakso lambei,

³BUNYUBOU saabü ka haoen jungto longkei. Ngei ponpen thon akibü sanouei ka to sanoukei; hibü ka to maanglemenbü athakko kia.

⁴Ngei no nyibou dangetlabü, hoba no kümsembulabü, O Israel, saosüngbü medei! Nyibou nyi no lolo busen junglabü, hoba lemlembo olinyobüa tombolakko haulabü.

⁵Tokei nyi Samaria shongh semlüh sek moulabü, sekmoubü shuongei kelabü, hoba kho hek shaulabü.

⁶Aishanga Efraim shongh kaodaka lapheibü shuongei nyetche chalou ngeklabü: ‘Meimeiashi, hoba sen Zion to seneibü BUNYUBOU Mühghaü jungto angkho.’ ”

⁷Aishanga BUNYUBOUei hai lauda, “Jakob shanga haujembo olinyobü chia lauashi; hoba phangshuong yoa yaangboutham shanga ngekashi. Kaibü nyensangbü dittiashi hoba hai lauashi, BUNYUBOUei jembü mütli Israel joubü khümena.

⁸Chühashi, ngei haoen yungkük aeka leibalabü, hoba haoen kaodak thonbü ka leishailabü. Haoen yoa nyekthubü hoba sokebü loulabü, hoba mang akongbü yaksa si hapla khonkubü yoan, haoen liko tan yaangbü che hato longeilabü.

⁹Haoen haapbo longeilabü, hoba subüjabüa ngei haoen leingailabü. Ngei haoen dei shumang nyangko paitilabü, haoen aphaiyetlabü lamnyu yenbüa ngei haoen leilabü. Aishanga Israel thedanga ngo bou, hoba Efraim ngeibü shaangbü shou ki.”

¹⁰BUNYUBOUei hai lauda, “O phangshuong, kü to ditashi; hoba yungnyu khatan kibü kaodak saabüa kü ngüh phinthonashi. Aoei Israel lintikei haoei leishailabü, hoba sanlombüei jembü san lombü tegü haoen lomlabü.

¹¹Aishanga BUNYUBOUei Jakob jekthetkei, hoba hao shanga yongko hau kibü ik ka hao khümenkei.

¹²Haoen loulabü hoba Zion shongha ngüh yaangbüei chia laulabü hoba BUNYUBOUei haoen to maibü thüka, khei youshou thüka, ih thüka hoba oliv onang, hoba sanlon si masu pongsu shoushou thüka olinyolabü. Haoen dei lakbü bamang che phatko kilabü, hoba haoen touje sensen maangmau akilabü.

¹³Kheijinei yaksa nashou shuong tombolakko olinyolabü; hoba heshou shuong si baushi shuong lemlemtham kilabü. Ngei haoen la hakso kulabü hoba manghaap jeila olintilabü, ngei haoen maang sulabü hoba maangshat jeiko olinbü kulabü.

¹⁴Ungshedbou shuongeibü langkei ngei soukoauko samlabü, hoba ngeibü mütli ngo maibüei senyüh shemlabü, dogo BUNYUBOUei lauda.”

¹⁵BUNYUBOUei hai lauda: “Ramaa ngühlang che, maang waangko hoba aeibou haapbü ditda; Rachel jembü shou shanga haapda, saoeibü shousi shuong shanga sao maangli athonda, aieilausi haoen aki.

¹⁶BUNYUBOUei hai lauda, Haapbü ka kaibü ngüh hoba nyeksi angbü nangashi; aishanga kaibü kümsileia pailettilabü, dogo BUNYUBOUei lauda; hoba haoen dangbou kaodak ka longeilabü.

¹⁷Hibü loulabüa no maanglem kia, hoba kaibü shousi shuong jembü kaodak to longeilabü, dogo BUNYUBOUei lauda.

¹⁸“Maimaitham Efraimei jembü lolo hai ngühko wibü ngei dida: ‘Nyi ngo asenetbü masu shoushou tegü thepetkei, hoba ngo thepetbü phanga ngüha lekei. Ngo nyibou kümetkuashi, hoba ngo sepeinyu longeilabü, aieilausi no ngeibü Mühghaü BUNYUBOU ki.

¹⁹Ngo sepeinyu satan phaia ngo maangpon sepeikei; hoba ngei ditenan phaia, ngei ngeibü khukua jangkei. Ngo himousele kikei, ngo maang kouan kikei, aieilausi ngeibü mütaoabü shedbüshabü ngei künkei.’

²⁰“Efraim ngei sanoubü jayangshou. Hao ngei yongko sanoubü shou; aishanga ladüngnei ngei hao khulimbo laulaje ngei tokei hao damenda. Hibü kü maangponei hao shanga haiyeida, maimaitham ngei hao to onoulabü, dogo BUNYUBOUei lauda.

²¹Nyi lamnyu shensinge phoashi; no lolo lamleilabü bu jangashi. Sepeiashi, O saosüngbü Israel, kaibü sangnyu shuong to sepeiashi.

²²No lalokche sepeisaila, O mailem akibü nouyangnyu? Aishanga yaksaei bousu püetbü phatko, BUNYUBOUei kaodaka kümsilei haanbü che pakentia.”

²³Thükenbou BUNYUBOU Israel Mühghaüei hai lauda: “Ladang ngei haoeneibü thu kümetkulaje, haoenei habü ngüh ho nyibou Jihuda kaodaka hoba sangnyu shuonga laueiko jungeilabü: ‘BUNYUBOUei no haükushi, O saopobü kishang, O saopobü shongh’

²⁴Hobaje Jihuda si haoeibü sangnyu pendou hoba sekmoubü shuong, hoba aoyou jembü san tan yoa shoongaida khünei liko kilabü.

²⁵Ngei hübü mangbü soushou sinngaitilabü hoba semthetbü soushou weko ngei senyühshemtilabü.

²⁶Kheijinei mütshuongei laulabü, ‘Ngo shen to haukei hoba yepmang maian laksepbei.’

²⁷“Chühashi, ngei Israel chung si Jihuda chung, müt si meisiau lilabü yoa kaonyu nyaktilabü chalou lousühada, dogo BUNYUBOUei lauda.

²⁸Hobaje ho haüthüklabü, khei ngei lai haoen thüka pheienla hoba leilutila, apla hoba mautila hoba amaibü sungbala chühko kikei, kho tegütham ngei haoen thüka kümla hoba kela chühko kikei dogo BUNYUBOUei lauda.

²⁹Khübü chalou ka touje, ‘Pisibousi shuongei haijepbü shaukei; hoba shisi shousi la hauh amda,’ dogo haoenei alaulabü.

³⁰Lausikei mütpem weko jembü shabü shanga hailabü; aoei haijepbü semlüh hek shaulaje hao hauh amlabü.”

³¹BUNYUBOUei lauda, “Khei ngei Israel chung hoba Jihuda chung yoa theyolanyobü haanbü che kümlabü chalou louada.

³²Theyolanyobü laobou ngei haoeneibü pisibousi shuong yoa haoeneibü ika jenan Ijep kaodak ka ngei leiyenjinei kümbei, ngeibü theyolanyobü laobou, ngo haoeneibü lao tegü yingasikei haoenei leilukei, kho theyolanyobü tegüje ayinglabü, dogo BUNYUBOUei lauda.

³³Lausikei theyolanyobü hoje khübü chalou danan phaia Israelbü chung to ngei kümbü kho ki, ngei ngeibü ngühkhüm haoen thükto jinkulabü, hoba ngei kho haoeneibü maangpona dolabü, hoba ngo haoeneibü Mühghaü hoba haoen ngeibü mütli yinglabü.

³⁴Hobaje touje mütpem wekoei jembü lepbou to hoba mütpem wekoei jembü jaisina to ‘BUNYUBOU kho ngeashi’ dogo alaulabü; aishanga haoen hanboutham ka yaangboutham sühko pendouei ngo ngelabü. Aishanga ngei haoeneibü shedbü shabü apbulabü hoba haoeneibü shabü touje adamenlabü, dogo BUNYUBOUei lauda.”

³⁵BUNYUBOU aoei ngesakbü shanga chanyu kuda, hoba nangnak shanga litnyu hoba khanshoulitshou la takletbü ngühkhüm kuda. Haoei yungnyu shouentida hoba ngühtida; haoeibü nyen Thükenbou BUNYUBOU ki.

³⁶BUNYUBOUei lauda, Kü thedang ka habü takletbü ngühkhüm bangjung satkualonga kheijinei ong Israel thensilen kü thedanga ponpen thonsithak akiko phang che kilabü ka thonan aplabü.

³⁷BUNYUBOUei hai lauda: Thükaenei müh shuong takan chühla thükalonga hoba phangaenei kaomaang denshang lamenalonga, kheijinei ong ngei Israel ka pakbü pendou, khei haoenei kümbü pendou shanga inletlabü, dogo BUNYUBOUei lauda.

³⁸“Chühashi, chalou shuong louada,” dogo BUNYUBOUei lauda, “khei sangnyu kho BUNYUBOU shanga Hananel laangshong ka Chemnyek Bakhün sühko kümetlabü.

³⁹Hobaje takan chühbü lüh aei longlabü, khei Gareb shongh sühko tangshaitham hoba kho phaia Goa to sepeilabü.

⁴⁰Haibü mang shuong hoba tap yo khümbo, hoba chaang aenei Koli Bakhün nongbü ka Kidron Shoushou thük khongthu pendou jembo BUNYUBOU thedanga saopobü yinglabü. Sangnyu kho touje ladangkei apheienlabü ayingsi atuonglabü.”