Read Chang Naga JEREMIA 32 Bible Online

JEREMIA 32 - Chang Naga bible

JEREMIA 32

¹Jihudabü Choba Zedekia po anboubüa BUNYUBOU ka Jeremia jungto loubü ngüh, laobou Nebukhadnezzar songdak po anthüksetboubü kiteikei.

²Kho chaloua Babilonbü Choba sepai danei Jerusalem komlepbo kikei, hoba Jeremia thuseibou kho Jihudabü Chobaeibü lombou kibü chema khinlepan kikei.

³Aishanga Jihudabü Choba Zedekiaei hao lapan phoan laukei: “Nyi aila, BUNYUBOUei hai lauda: Chühashi, ho sangnyu ngei Babilonbü Chobaeibü ik to kuda, hoba haoei kho lelabü dogo tetenda;

⁴hoba Jihudabü Choba Zedekia kho Babilonbü ka asatenlabü, lausikei maimaitham Babilonbü Chobaeibü ika kuan aplabü; hoba kho yoa theshuok hoba nyek si nyek shuokyoan joyolabü.

⁵Hobaje haoei Zedekia Babilon to sunglanglabü hoba khünei ngei pean achühshongko kilabü. Kanei Babilonbü khulimbo wapyosikei athüklabü dogo BUNYUBOUei lauda, dogo tetenda hoba lauda?”

⁶Jeremiaei laukei, BUNYUBOUeibü ngüh kü jungto loukei:

⁷Chühashi, kabou nashoubou Shallumeibü shou Hanamel ka jungto loulabü, hoba laulabü: Anathota kibü ngeibü sek jekashi; aishanga jekngaian anglabü kho no ong ki.

⁸Kheijinei kübou nashouboueibü shou Hanamel lombou kibü chem to BUNYUBOUeibü ngüh tegütham kü jungto loukei, hoba kü to laukei: Ngeibü sek jekashi, ngei ka to sudajada kho Anathota kia, laobou Benjamin kaonyeka ki; aieilausi lelabü hoba angngailabü khoje no ong ki, ka shanga kho jekashi. Kheijinei ho Mühghaü ngüh yingan kikei dogo ngei ngekei.

⁹Hobaje ngei Anathota kübou nashouboueibü shou Hanamel ka sek kho jekkei, hoba hao la nam chandinam shekel anthüknyet kho wean jinkukei.

¹⁰Ngei yeibü khünei ngeibü nyen dokei hoba khonei shangkei hoba aukabü shuong ngakei, hoba nam kho seret kunga hauan chühkei.

¹¹Kheijinei jekthetbü aukabü dokei; shangan kibü ham kho hoba laobou ipan kikei, ngühkhüm hoba song tegütham khübü kho yoan ngei lekei.

¹²Hobaje jekthetbü aukabü dobü kho kübou nashouboueibü shou Hanamel thedanga jekthetbü aukabü dobüa nyen doletbü aukabü shuong thedanga hoba Jihudabü aoyou lembü chema setan kikei pendou thedanga Maaseiaeibü shou Neriaeibü shou Baruk la kukei.

¹³Haoen thed- anga ngei Baruk la kuko laukei,

¹⁴Hai Thükenbou BUNYUBOU Israel Mühghaüei lauda, “Habü aukabü dobü sungashi, ho jekthetbü aukabü dobü khinlepan kibü hoba ho ipan kibü ham sungashi hoba khübü kho thamchak chenei jinashi, hoba khünei khübü kho süngshonko thalabü.

¹⁵Aishanga Thükenbou BUNYUBOU Israel Mühghaüei hai lauda: Chemsibung, sekphai hoba semlüh laak shuong nyibou ho kaonyeka jekngailabü.”

¹⁶Jekthetbü aukabü dobü kho ngei Neriaeibü shou Baruk la kuan phaia ngei BUNYUBOU to welauko laukei:

¹⁷“Ügütü, BUNYUBOU Mühghaü, nyi seisihau yaangbü hoba kaibü phem shingbüei mühshuong hoba kaodak kümbei; ka shanga kheinyu sekbü ai aki.

¹⁸Nyi hajar juong to thonsithak akiko sanou lenda, lausikei pisiboueibü shedbü haoeneibü shisishousi jungto haoen phaito loutida. O yaangbü hoba hau kibü Mühghaü, aoeibü nyen Thükenbou BUNYUBOU ki.

¹⁹Songsihon yaangbü; hoba kümbüleibüa yaangbü; aoeibü nyek müteibü lamthen pendou aenei ipan ki, mütpem weko la jembü lamthen thüng hoba jembüei kümbü thüng pailetkuda;

²⁰aoei Ijep kaodaka tetsida hoba seikümseilei lenkei hoba tat sühko Israela hoba khunak shousi pendou yoa hoba tat tegü nyen che longtian ki.

²¹Nyi kaibü mütli Israel Ijep kaodak ka tetsida hoba maangpanglabü hau kibü ikei hoba phem shingbüei hoba hatlamoklabü yaangei leibakei.

²²Hobaje ho kaodak laobou nyi haoeneibü pisibou la kula theyolanyokei, sendei hoba naodei kouko kibü kaodak haoen la kukei.

²³Hobaje haoen atkei hoba kho lekei, lausikei haoenei kaibü ngüha ale ayingsi kaibü ngühkhüma apai; nyi haoen la kümla sakkubü haoenei ai aküm; hibü nyi haoen thük to habü amaibü pendou loutikei.

²⁴“Chühashi, Babilonbüei sangnyu kho lela kaotok yaüenan komlepakei. In, mühsinou hoba limsilang danko sangnyu kho haoen ikmang to atlabü. Nyi ai laukei kho pendou loushedbü kho nyi hapda.

²⁵Khei yingasikei, O Thükenbou BUNYUBOU, nyi sangle kho Khaldibü ik to kuan apan kiasikei, ‘Nam lu sek kho jekashi hoba aukabü sungba,’ dogo nyi kü la lena.”

²⁶BUNYUBOUeibü ngüh Jeremia jungto loukei:

²⁷“Chühashi, ngo BUNYUBOU, khunakshousi pendoueibü Mühghaü ki. Kü shanga den che yongko sekan ki sai?

²⁸Hibü BUNYUBOUei hai lauda, Chühashi, ngei ho sangnyu Khaldibü ik to hoba Babilonbü Choba Nebukhadnezzar ik to kuda, hoba haoei kho lelabü.

²⁹Hobaje ho sangnyu khulimbo wapyola Khaldibü loulabü hoba ho sangnyua wan thekulabü, hoba chemdaka laobou haoenei Baal la ponlem hibü lembo ki, hoba ngo maangto shattiko lubü mühghaü shuong la yunglabü lembü yeian jinkuko ki, kho yoan juoklabü.

³⁰Aishanga Israelbü shousi shuong si Jihudabü shousi shuongei kü thedanga ai amai kho ong haoen heshou dangka thama küma; aishanga Israelbü shuongei ngo maangto shattila ong haoeneibü ikküm ikleiei küma, dogo BUNYUBOUei lauda.

³¹Aishanga ho sangnyu kümbü chalou ka tat sühko ngeibü khauang maangpok hoba maangshat longtia. Hibü ngei ho kü thedang ka sungan aplabü.

³²Israelbü shousi shuong hoba Jihudabü shousi shuong haoeneibü Choba shuong hoba haoeneibü ungshedbou shuong, hoba haoeneibü thuseibü shuong, Jihudabü hoba Jerusalema kibü shuongei amaibü pendouei ngo maangto shattiko khauangtikei.

³³Haoenei haoeneibü thenyek aying takphai kü ae yeikei; hoba ngei haoen to maangshikko lenasikei haoenei songlen asunglet.

³⁴Ngeibü Nyen nyenbü chem kho shatila haoenei mangsenlabü shuong phokei.

³⁵Haoeneibü jayang nouyang shousi shuongeibü lembü Molek la kula ngei haoen la asakku, ayingsi ho mangsenlabü haoenei kümla Jihudabü shuong shatila ngeibü maanga daman akisi dogokei haoenei Hinnomeibü jayangshou pholia Baal shanga lemshang shongh lemshang kümbei.”

³⁶Israel Mühghaü BUNYUBOUei kü to laukei, “Jeremia, mütshuongei hai lauyoda, ‘Inei, mühsinouei hoba limsilangei ho sangnyu Babilonbü Choba ikmang to kuan aplabü,’ lausikei Israel Mühghaü BUNYUBOUei hai lauda:

³⁷Chühashi, ngo khausak longko khauangjinei hoba maangto shatjinei ngei haoen laeto ong shian sattikei, khübü kaonyek pendou ka ngei haoen leishailabü; hoba ngei haoen nyibou ho kaonyek to leibaan haoen thushed akiko phokulabü.

³⁸Hobaje haoen ngeibü mütli kilabü, hoba ngo haoeneibü Mühghaü yinglabü.

³⁹Hobaje haoenei kü to ponpen soumo hattila shanga ngei haoen la maangpon che kulabü; hoba haoen hoba haoen phainei haoeneibü thensilen maila yaangla shanga lamnyu che kulabü.

⁴⁰Ngei haoen to theyolanyobü che kümlabü. Ngei haoen to maibü kümbü ladangkei ananglabü, hoba haoen kü jungka ladangkei sepeinyu angaitila shanga kü to hattila haoeneibü maangpona ngei jinkulabü.

⁴¹Haoen to maibü kümbüa ngo olinlabü, hoba ho kaonyeka ngei haoeneibü maang- ponei hoba ngeibü maangpon pendouei hoba ngeibü soushou pendouei lo leko phokulabü.

⁴²“Aishanga BUNYUBOUei hai lauda: Ho mütli thükto ngei amaibü yaang sungbabü tegütham, ngei haoen pendou thükto ngei haoen to thekubü maibü sungbalabü.

⁴³Ho sangliphang, müt ayingsi meisiau akishang ho Babilonbü ik to kuakei, dogo laobou shanga kanei laueida, kho kaonyeka kao jekyo phouyolabü.

⁴⁴Mütshuongei sekphai chandinamei jekthetlabü, hoba aukabü doyobü nyen dolabü, hoba aukabü shangyolabü. Ho Benjamin kaonyeka, Jerusalem sangnyu kaijemboa, Jihudabü sangnyu shuonga hoba kaonyek sangnyu shuonga, hoba Negeb sangnyu shuonga haüthüklabü. Aishanga ngei haoeneibü thu kümetkulabü, dogo BUNYUBOUei lauda.”