Read Chang Naga JEREMIA 33 Bible Online

JEREMIA 33 - Chang Naga bible

JEREMIA 33

¹Tokei Jeremia lombou chema khinan kijinei BUNYUBOUeibü ngüh hao jungto nyiboula loukei.

²“Kaonyu yaübou BUNYUBOU, hoba ho kümsembou BUNYUBOU, aoeibü nyen kho BUNYUBOU ki, haoei hai lauda:

³‘Kü to ngaashi hoba ngei ka to jongailabü; hoba nyi ngean akibü hupang kümsilei yaangbü ka la lenlabü.’

⁴Aishanga BUNYUBOU, Israel Mühghaüei ho sangnyu kabü chem shuong hoba Jihudabü Chobaeibü chem shuong, laobou in thedanga komleplabü shon kümbü khulimbo thangtetla kümbü panletan kikei, khübü shangabü hai lauda:

⁵Khaldibü wapyobü shangabü, khei ngo khauang maangpoka haitilabü mangjimei ho kaoen shenlabü, aishanga haoen amaibü haangshong ho sangnyu ka ngei ngeibü thenyek huan aplabü.

⁶Chühashi, ngei khüto haangmaibü, hoba maitibü hoba haoen to thusinaang maibü hoba maimaitham sangmai tang khitlabü.

⁷Ngei Jihudabü si Israelbü thu nyibou kümetkulabü, hoba shaangla tegütham haoen nyibou kümetlabü.

⁸Ngo khulimbo shedbü shabü pendou ka ngei saüenkulabü, hoba ngo khulimbo lobü hoba shed shonbü pendou apbulabü.

⁹Hobaje kaodak phang shuong aoyouei ngo haoen shanga maibü kümla kibü pendou to ho sangnyu kü shanga olinlabü nyen che, nyensanglabü che, hoba soneikanglabü che yinglabü, ho shanga maibü pendou hoba sangmai, hakso pendou ngei sungbakubü shanga haoenei hatlabü hoba lühlabü.”

¹⁰BUNYUBOUei hai lauda, “Ho kishang laobou shangabü kanei, ‘Ho müt ayingsi meisiau akiko apbü kaoen; Jihudabü sangnyu shuong hoba Jerusalem khong- yaang shuong sangliphanga kibü, müt ayingsi meisiau akibü kaoen,’ dogo lauda, kho tükde. Lausikei khübü kaoena kanei nyibou

¹¹olinyobü ngüh hoba chemkanbü ngühlang, hoba aoyouei BUNYUBOUeibü chem to lembü sungbada haoenei chia laubü ngühlang hai lauko ditlabü: ‘Thükenbou BUNYUBOU la nyensang kuashi; aishanga BUNYUBOU maibü ki; haoeibü sanou ponpen kida!’ Aishanga shaangla tegü ngei haoeneibü kaonyek thu nyibou kümetkulabü, dogo BUNYUBOUei lauda.”

¹²Thükenbou BUNYUBOUei hai lauda, “Ho kaoen, laobou mütkei hoba meisiaukei akiko sangliphanga ki, ngei ho sangnyu pendoua sanlombü shuong kishang hoba haoeneibü san tan yepshang kitilabü.

¹³Shongh kaodak sangnyu shuonga, chanepbü sangnyu shuonga hoba Negeb sangnyu shuonga hoba Benjamin kaonyeka, Jerusalem kaijembo kabü sangnyu shuonga hoba Jihuda sangnyu shuonga, san tan tan, aoei haoen weanchühda, haoeibü ik phanga nyibou danjung haulabü,” dogo BUNYUBOUei lauda.

¹⁴“Chühashi, Israelbü chung si Jihudabü chung to thekubü haüthüklabü chalou shuong louada, dogo BUNYUBOUei lauda.

¹⁵Khübü chalou hoba kho jihsiphaia Dawid shanga ngei saopobü Bhek che longtilabü, hoba haoeibü kaonyeka ngühmai hoba saopobü kümlabü.

¹⁶Khübü chaloua Jihuda püetlabü hoba Jerusalem khümenan kilabü. Khoeibü nyen ho hai nyenlabü: ‘BUNYUBOU Küneibü Saopobü.’

¹⁷Aishanga BUNYUBOUei hai lauda: Israel chung Choba setshanga settila Dawid ladangkei mütei shalean akilabü,

¹⁸ayingsi Levi ungshedbou shuong kü thedanga juokbü lembü kula, shausiyung lembü juokla hoba ponpen shanga haitibü lembü lamlela ladangkei mütei shalean akilabü.”

¹⁹BUNYUBOUeibü ngüh Jeremia jungto loukei:

²⁰“BUNYUBOUei hai lauda: Chalou si nangnak jembü takletbü jih aloutilabü lele nyi ngeibü chalou si nangnak to thebülanbü leilutila thükalonga,

²¹kheijinei ngo khangenbou Dawid yoa ngeibü thesilan hoba kü thedanga khangenko kibü Levi ungshedbou shuong to theyolanyobü leiluenlabü, hoba haoeibü Choba setshanga setan songdakla Dawidei haoeibü shousi che ongkei akilabü.

²²Müha khanshoulitshou wela athükbü tegütham, ngo khangenbou Dawideibü thensilen shuong hoba Levi ungshedbou shuong aoyouei kü to khangenda, ngei haatijuongtilabü.”

²³BUNYUBOUeibü ngüh Jeremia jungto loukei:

²⁴“Habü mütshuongei, ‘BUNYUBOUei haoei Israel si Jakob chung penyi pienbü inletkei,’ dogo lauyobü nyi achühen lo? Kho tegü haoenei ngeibü mütli wela aleda hoba touje phang che tegü ajungeida.

²⁵BUNYUBOUei hai lauda: Chalou si nangnak ngei thebülanbü ahoongen tegüje hoba müh si kaodak to haang ngühkhüm atakletku tegüje,

²⁶kheijinei ngei Jakob si ngo khangenbou Dawid thensilen inletlabü hoba ngei haoeibü thensilen ka Abraham, Isak hoba Jakob thensilen thüka songdakla telekhoulabü. Aishanga ngei haoeneibü thu kümetkulabü hoba haoen thüka üeisanou kilabü.”