Read Chang Naga JEREMIA 34 Bible Online

JEREMIA 34 - Chang Naga bible

JEREMIA 34

¹Babilonbü Choba Nebukhadnezzar hoba haoeibü sepai tan pendou hoba haoeibü sangle phanga kaodak sangle pendou hoba müt pendou Jerusalem hoba ho sangnyu pendou khulimbo wapyobü chaloua BUNYUBOU ka Jeremia jungto ngüh kho loukei.

²“BUNYUBOU, Israel Mühghaüei hai lauda: Hauashi, hoba Jihudabü Choba Zedekia to joyoashi hoba hao to lenashi, BUNYUBOUei hai lauda: Chühashi, ngei ho sangnyu Babilonbü Chobaeibü ik to kuda, hoba haoei ho wanei thean apbulabü.

³Haoeibü ik ka no asatenlabü, lausikei maimaitham laplabü hoba no haoeibü ik to kulabü. Nyi Babilonbü Choba to the thenthen haüyolabü hoba hao to theshok joyolabü. Hobaje no Babilon to haulabü.

⁴Khei yingsikei BUNYUBOUeibü ngüha leashi, O Jihudabü Choba, Zedekia! BUNYUBOUei ka shangabü hai lauda: No ineije ühailabü;

⁵no sangmaia hailabü. Ka to shaang kibü kaibü pisibousi Choba shuong shanga kümbü tegütham mütshuongei ka la soumo kuko ponlem hibü juoklabü. Haoenei, ‘Ügütü, O BUNYUBOU!’ dogo lauko manghaaplabü.”

⁶Kheijinei Jeremia thuseibouei habü ngüh pendou Jerusalema Zedekia Choba to joyokei.

⁷Babilonbü Chobaei Jerusalem hoba Jihuda sangnyu pendou, jouan kibü Lakhish si Azeka to wapyoko kiteikei. Aishanga jouan kibü Jihudabü sangnyu shuong thangtetan kibüje khübü kho ong kikei.

⁸Zedekia Chobaei Jerusalema kibü pendou yoa haoen to solo phinthonla theyolanyobü küman phaia BUNYUBOU ka Jeremia jungto ngüh loubü:

⁹Khei mütpem weko jembü Ibribü aaomüt shuong bousu yingsikei yaksa yingsikei litilabü; aoeikei Jihudabü jembü jaisina che ongkei aaomüt la ayeitilabü.

¹⁰Hobaje konglebü shuong pendou hoba müt pendouei haoen nyibou aaothu la ayeitilabü lele haoeneibü aaomüt shuong bousu yaksa pendou litikho dogo theyolanyokei. Khonei haoenei hehoat kikei, hoba haoen litikei.

¹¹Lausikei phailaje haoeneibü dambü jakshaikei, hoba haoenei litibü bousu yaksa aaomüt shuong khümbo leibakei hoba nyiboula haoen phanga aaothu la yeitikei.

¹²Kheijinei BUNYUBOUeibü ngüh Jeremia jungto loukei:

¹³“BUNYUBOU Israel Mühghaüei hai lauda: Ijep kaodak ka aaothu chem ka haoen leian longjinei ngei kaneibü pisibousi to theyolanyobü che kümbei, hoba laukei:

¹⁴Po nyetbou thonbü weko kan mütpem wekoei kan la yaakkuan kibü jaisina Ibribü aaothu ka litijan. Haoei po lak no khangen- an phaia nyi hao kaibü kümsilei ka litijan. Lausikei kaneibü pisibousi shuongei, kü to ngüha ale ayingsi kü to haoeneibü nou ühang.

¹⁵Tou nyangko ong maangpon sepeida, hoba kü thedanga laobou janbü ki kho kümbei: Kan mütpem wekoei jembü lepbou to dongebü thu ngekletkukei. Kanei kü Nyen kiman kibü chema kü thedanga theyolanyobü che kümbei.

¹⁶Lausikei kanei kaneibü dambü jeileikei hoba kü nyen shatikei. Kan mütpem wekoei haoenei mangsühbü tegü litibü bousu hoba yaksa aaomüt shuong haan lengaikei, hoba haoen kaneibü aao la yeitingaikei.

¹⁷Hibü BUNYUBOUei hai lauda: Kanei ngüha ale; kanei kaneibü jaisinasi shuong la dongebü solo angekletku. Hibü, chühashi, tou ngei kan la inei, mühsinouei hoba limsilangei shemlabü solo ngekletkuda, dogo BUNYUBOUei lauda. Ngei kan kaodak sangle pendou thedanga hatlamoklabü che yeitilabü.

¹⁸Jihuda si Jerusalem kabü yaangenbü shuong, hoba Choba- chem kabü yaangenbü shuong si ungshedbou shuong, hoba leiyeibü shuong pendouei, haoenei penyi la yeiko shipnyinbü masu paangshou kanglanga paikotham kü thedanga theyolanyokei. Lausikei haoenei thesilan leilukei hoba takletbü ajungei. Hibü ngei khübü mütshuong to haoenei masu paangshou to jungeibü tegütham jungeilabü.

²⁰Ngei haoen dangbou shuong ik to hoba haoeneibü langkei lambü shuongeibü ikmang to kulabü. Haoeneibü haibü mang kho mühkabü au shuong hoba kaokabü yangsikok shanga shausiyung yeilabü.

²¹Hobaje Jihudabü Choba Zedekia hoba haoeibü lei- yeibü shuong haoeneibü dangbou shuong aoyouei haoeneibü langkei lamda haoeneibü ikmang to kulabü. Ngei haoen Babilonbü Choba sepai tan, laobou kan yo ka sepeinyu ngaian ki, haoeneibü ik to kulabü.

²²Chühashi, ngei sakkulabü hoba haoen ho sangnyu to longeitilabü. Haoenei ho khulimbo wapyolabü, hoba kho lelabü, hoba ho wanei lonan apbulabü. Ngei Jihuda sangnyu shuong müt akiko sangliphang che la yeitilabü, dogo BUNYUBOUei lauda.”