Read Chang Naga JEREMIA 36 Bible Online

JEREMIA 36 - Chang Naga bible

JEREMIA 36

¹Josiaeibü shou Jehoiakim, Jihudabü Choba po lei boubüa ho ngüh BUNYUBOU ka Jeremia jungto loukei:

²“Phekhon tu che sungba hoba kho thüka ngei ka la Israel hoba Jihuda hoba phang pendou khulimbo joyobü ngüh pendou doashi. Josia Choba songdak jihsiphaia ngei ka to joyo khangbü chalou ka tat sühkobü ngüh khümbo doashi.

³Aingenyu ladang Jihudabü mütliei ngei haoen to kümla kibü amaibü pendou shangabü ditlaje khünei haoen mütpem weko jembü kümsilei amaibü ka maangpon sepeilabü. Kheijinei ngei haoeneibü amaibü hoba shedbü shabü apbulabü.”

⁴Kheijinei Jeremiaei Neriaeibü shou Baruk ngakei, hoba BUNYUBOUei Jeremia to joyobü ngüh pendou haoei lenko tulaia dotikei.

⁵Hobaje Jeremiaei Baruk la sakkuko laukei, “Ngo BUNYUBOUeibü Lembüchem to atla asakkuko lothetakei.

⁶Hibü no mühei nyengbü chaloua BUNYUBOUeibü chem to hauashi, hoba kü sembungei lenko nyi dobü tulai ka müt pendouei ditko BUNYUBOUeibü ngühshuong kho weashi. Nyi tokei khübü kho Jihudabü aoyou jembü sangnyu shuong ka longda, haoenei ditko weashi.

⁷Aingenyu haoeneibü subüjabü BUNYUBOU jungto loulabü hoba khei mütpem weko jembü lamnyu amaibü ka sepeilabü, aishanga ho mütli khulimbo BUNYUBOUei lauan apbü khauangbü hoba maangshat kho yaang ki.”

⁸BUNYUBOUeibü chema BUNYUBOUeibü ngüh shuong tulaia dobü ka wela Jeremia thuseibouei sakkubü pendou Neriaeibü shou Barukei kümbei.

⁹Jihudabü Choba Josiaeibü shou Jehoakim po ngaoboubüa lit güboubüa Jerusalema müt pendou hoba aoyou Jihuda sangnyu shuong ka Jerusalem to loukei, BUNYUBOU thedanga mühei nyengla phinthonkei.

¹⁰Kheijinei müt pendouei ditko kian, dobou Shafaneibü shou Gemariaeibü shemjang ka Barukei Jeremiaeibü ngühshuong dobü tulai ka wean lenkei. Haoeibü shemjang kho thükkabou chemsophanga Lembüchemeibü Haanbü Bakhün to atshang nyangko kikei.

¹¹Ladang Shafaneibü shou Gemaria hoba haoeibü shou Mikaiaei BUNYUBOUeibü ngühshuong dobü pendou tulai ka weko ditkei,

¹²hao Chobaeibü chem to yankei hoba doboueibü chem khüto atkei, hoba konglebü shuong pendou khünei setan kikei. Elishama dobou, Shemaiaeibü shou Elnathan, Shafaneibü shou Gemaria, Hananiaeibü shou Zedekia, hoba lubü leiyeibü shuong pendou.

¹³Hobaje Barukei mütshuongei ditko dobü tulai kho wejinei Mikaiaei haoei ditbü ngüh pendou haoen la lenkei.

¹⁴Kheijinei khuleibü shuong pendouei (Kushieibü shou, Shelemiaeibü shou, Nathaniaeibü shou) Jehudi hautiko Baruk to laukei, “Mütshuongei ditko nyi webü tulai kho kaibü ika jungashi; hoba kaiya.” Hibü Neriaeibü shou Barukei haoen jungto jungan loukei.

¹⁵Kheijinei haoenei hao to laukei, “Setashi, hoba kho kün la wean lenkai.” Hibü Barukei haoen la wean lenkei.

¹⁶Ladang haoenei ngüh pendou kho ditkei, haoen hatbüei cheei che to chühyokei, hoba haoenei Baruk to laukei, “Senei habü ngüh pendou Choba la ngühlang kujan.”

¹⁷Kheijinei haoenei hao to phekei, “Habü pendou nyi lai dokei künla lenbü? Jeremiaeibü sembungei lenko dotikei sai?”

¹⁸Barukei jongaikei, “Haü, habü pendou haoeibü sembungei ngüh longko kü la lenkei, hoba ngei shiaiei phekhona dokei.”

¹⁹Kheijinei khuleibü shuongei Baruk to laukei, “Hauashi hoba Jeremia kasi huashi. Kasi kishang aolakei tengeti.”

²⁰Hibü dobü le kho Elishama doboueibü chema phoan haoen Chobaeibü chem to haukei, hoba haoenei Choba la ngühlang pendou kukei.

²¹Kheijinei dobü tulai kho sungbatila Chobaei Jehudi hautikei, hoba haoei Elishama doboueibü chem ka sungbakei, hoba kho Jehudiei Choba la, hoba khuleibü shuong Choba nyangko loan kibü shuong la wean lenkei.

²²Kho lit gü boubü kikei hoba Choba kho poang- chema setan kikei, hoba hao thedanga phauyaanga wankak wan longko kikei.

²³Jehudiei lip semsilei wekhümjinei Chobaei inshouei khübü jemnyinkei hoba khübü kho wankak phauyaang to jinkei. Wankak phauyaanga alonshem shongko tulai khümbo kho wan to jinkukei.

²⁴Khei yingasikei, Choba ayingsi hao khangenbü shuong aoeikei khübü ngüh ditan ühüt, ayingsi haoenei lulueibü neisimei ajitnyin.

²⁵Ladang Elnathan, Delaia hoba Gemariaei dobü tulai kho ajiksi maikei dogo Choba to sukeijakei, haoei haoen to ngüha ale.

²⁶Yongbou, Chobaei Chobaeibü shou Jeramael, Azrieleibü shou Seraia, hoba Abdeeleibü shou Shelemia la dobou Baruk si Jeremia thuseibou lapla sakkukei. Lausikei BUNYUBOUei haosi hukei.

²⁷Jeremiaei lenko Barukei dobü tulai jikan apbuan phaia, BUNYUBOUeibü ngüh Jeremia jungto loukei:

²⁸Lubü tulai dola sungba hoba shaangbü dobü tulai laobou Jihudabü Choba Jehoiakimei jikan apbukei, khünei kibü pendou doashi.

²⁹Hobaje Jihudabü Choba Jehoiakim to lenashi, BUNYUBOUei hai lauda: “Aila nyi Babilonbü Choba maimaitham loulabü hoba ho kaonyu mautilabü hoba haka müt si meisiau shemtilabü dogo dokei dogo lauko nyi tulai jikan apbukei?”

³⁰Hibü hai, Jihudabü Choba Jehoiakim shangabü BUNYUBOUei lauda, khei Dawid Chobaeibü setshanga settila hao shangabü ao akilabü. Hobaje haoeibü mang kho changea aubüa, hoba nangnak nin thüka dogo tekan aplabü.

³¹Hobaje hao hoba hao ka bakbü shuong hoba khangenbü shuong haoeneibü shedbü shanga shieikoelabü. Ngei haoen thükto hoba Jerusalema kibü shuong thükto hoba Jihudabü thükto ngei haoen khulimbo lauenbü amaibü pendou loutilabü; aieilausi haoenei ngüha aleda.”

³²Kheijinei Jeremiaei dobü lubü tulai sungbakei hoba Neriaeibü shou Baruk dobou la kukei. Haoei khünei Jihudabü Choba Jehoiakimei wana jikan apbubü Jeremiaeibü ngüh shuong hoba phatyobü lubü ngüh shuong pendou khünei dokei.