Read Chang Naga JEREMIA 37 Bible Online

JEREMIA 37 - Chang Naga bible

JEREMIA 37

¹Josiaeibü shou Zedekia, ao Babilonbü Choba Nebukhadnezzarei Jihudabü kaodaka Choba yeitikei, haoei Jehoiakimeibü shou Jehoiakhin jeiko songdakkei.

²Lausikei haoei yingsikei hoba hao khangenbü shuongei yingsikei kaonyeka mütli shuongei yingsikei BUNYUBOUeibü ngüh Jeremia danko joyobü aditku.

³Zedekia Chobaei Shalemiaeibü shou Jehukal, Maaseiaeibü shou Zefania ungshedbou jungto hautiko laukei, “Kün shanga BUNYUBOU seneibü Mühghaü to welaukushi.”

⁴Tou Jeremia mütshuong yoa atko longeiko dogo kikei, aishanga hao toukei thüngshanga mojinko kikei.

⁵Faraoeibü sepai tan Ijep ka longan kikei, hoba ladang Babilonbü aoyouei Jerusalem komlepan kikei, haoeneibü ngühlang ditan phaia haoen Jerusalem ka sukjung ngaikei.

⁶Kheijinei BUNYUBOUeibü ngüh Jeremia thuseibou jungto loukei:

⁷BUNYUBOU Israel Mühghaüei hai lauda, “Jihudabü Choba aoei kan kü jungto kü ka phela hautikei hao to kanei hai lenashi: Chüh- ashi, Faraoeibü sepai tan laobou ka to thuila loukei jembü kaodak Ijep to ngaikho dogo kia.

⁸Hobaje Khaldibü sepeinyu longeilabü hoba sangnyu khulimbo wapyolabü, haoenei kho lelabü hoba kho wanei lonan apbulabü.

⁹BUNYUBOUei hai lauda: Babilonbü maimaitham kukjung satlabü, dogo lauko kan lolo tekhüpetti. Haoen angailabü.

¹⁰Aishanga Khaldibü no khulimbo wapyobü sepai tan khümbo nyi thükasikei, haoen yoa mütpem wekoei jembü neichema leilu leilubü shuong ong jouan kiasikei, haoen lakseplabü hoba ho sangnyu wanei jikan apbulabü.”

¹¹Tou Faraoeibü sepai tan sühlangjineije Khaldibü sepai tan Jerusalem ka kukan kiteikei.

¹²Jeremia Jerusalem ka Benjamin kaodak kabü mütli yoa haoeibü phejan sungletla meimeijung haukei.

¹³Lausikei ladang hao Benjamin Bakhüna kikei khünei lombou che, Hananiaeibü shou Shelemia haoeibü shou nyen Irija, haoei Jeremia thuseibou lapbei hoba laukei, “No Khaldibü jungto satda!”

¹⁴Hobaje Jeremiaei laukei, “Kho amlangbü. Ngo Khaldibü jungto asatda.” Lausikei Irijaei haoeibü ngüha ale, hoba Jeremia lapbei hoba hao khuleibü shuong jungto leibakei.

¹⁵Hobaje khuleibü shuongei Jeremia to khauangkei hoba haoenei hao to ngümbei hoba Jonathan doboueibü chema hao thüngan phokei; aieilausi haoeibü chem kho thüngshang chem la kümbei.

¹⁶Jeremia püngkhün che to jinkei, hoba chalou lounyu khünei kikei.

¹⁷Zedekia Chobaei hao ngala hautikei, hoba hao leiyenkei hoba Chobaei haoeibü chema huphanga hao to phekei hoba laukei, “BUNYUBOU ka ngüh at kia sai?” Kheijinei haoei laukei, “Haü, no Babilonbü Choba ik to khümbo kulabü.”

¹⁸Jeremiaei tokei Zedekia Choba to laukei, “Ngo thüngshanga kanei pholabü lele ngo ka thedanga ai shedkei ayingsi no khangenbü shuong ayingsi ho mütli to ai kümbei?

¹⁹Kaneibü thuseibü shuong aoyouei ka to, ‘Babilonbü Choba no hoba ho kaodak khulimbo aloulabü,’ dogo tetenbü lanei ki?

²⁰Tou ditashi, ngei ka to sudajada, O ngeibü Choba. Ngei ea aoa subüjabü ka jungto sungbada: Ngo Jonathaneibü thüngshang chem to tengaitikai. Khei kümalonga ngo khünei haibüla.”

²¹Hibü Zedekia Chobaei ngühkhüm kukei hoba chem lombü la haoenei Jeremia khümbo kukei, hoba sangnyua wentek akhüm shongko wentek kümshang khongnyu ka chalou weko hao la wentek che che kukei. Hibü Jeremia lomboueibü shemjanga kikei.