Read Chang Naga JEREMIA 38 Bible Online

JEREMIA 38 - Chang Naga bible

JEREMIA 38

¹Tou Mattaneibü shou Shefania, Pashureibü shou Gedalia, Shelemiaeibü shou Jukal, hoba Malakiaeibü shou Pashur, haoenei mütshuong to lenko kibü ditkei.

²BUNYUBOUei hai lauda, “Aoyou ho sangnyua kilaje inei, mühsinouei, hoba limsilangei hailabü, lausikei aoyou Khaldibü jungto satlaje lang kilabü; haoeneibü langkei kho wapyobü jongsak che tegü yinglabü hoba lang kilabü.”

³BUNYUBOUei hai lauda, “Ho sangnyu ho Babilonbü Chobaei sepai tan ik to kulabü hoba lean aplabü.”

⁴Kheijinei khuleibü shuongei Choba to laukei, “Ho müt haitiashi, aieilausi ho tegübü ngüh haoen to laubüei ho sangnyua phoyobü sepai shuong hoba müt pendoueibü ik haoei hau akitiko aptida. Aishanga ho mütei ho mütli maila lamda aying, lausikei haoen amaitila ong lamda.”

⁵Zedekia Chobaei laukei, “Chühashi, hao kaneibü ika kia aieilausi Chobaei kan khulimbo ai akümlabü.”

⁶Hibü haoenei Jeremia sungenkei hoba Chobaeibü shou Malkiaeibü deikhün to jinkukei, laobou lombü chema kikei. Haoenei Jeremia deikhün to jolühei phenan yantikei; deikhüna dei akitei, lausikei thimdak ong kiteikei hoba Jeremia thim to nyemjung atkei.

⁷Ladang Ethiopiabü sung- phatbü müt che Ebed-Melek, ao Chobaeibü chema kikei, haoei Jeremia haoenei deikhün to jina dogo ditkei, kheijinei Choba kho Benjamin Bakhüna setan kiteikei.

⁸Ebed-Melek Chobaeibü chem ka satkei hoba Choba to lenkei,

⁹“Ngeibü bunyubou Choba, habü mütshuongei Jeremia thuseibou deikhüna jinkubüei haoenei kümbü pendoua shed shona; hao khünei mühei hailabü, aieilausi sangnyua wentek ajoukei.”

¹⁰Kheijinei Ethiopiabü Ebed-Melek la Chobaei ngühkhüm kukei, “Ka yoa haka müt khujin leiashi, hoba Jeremia hao ühaitoua deikhün ka yaüenashi.”

¹¹Hibü Ebed-Melekei mütshuong kho hao yoa leikei, hoba Chobaeibü chem to thanshang chem neisimei phoshang to haukei. Haoei khüka neikek si neisimei hangbü sungkei, hoba haoei lüha shenan yantikei.

¹²Kheijinei Ebed-Melek Ethiopiabü khoei Jeremia to laukei, “Neikek si neisimei kho kaibü phakphanga si lüh kanglanga hopashi.” Jeremiaei khei kümbei,

¹³hoba haoenei Jeremia lühei senenkei hoba deikhün ka hao yaüenkei, hoba Jeremia lombou chema kikei.

¹⁴Zedekia Chobaei Jeremia thuseibou ngala hautikei, hoba BUNYUBOUeibü lembüchem to atshang semboubüa hao sungletkei. Chobaei Jeremia to laukei, “Ngei ka to phebü che phekho, kü ka ai tehu.”

¹⁵Jeremiaei Zedekia to laukei, “Ngei maimaitham ka to lensi nyi ngo ühaitilep lo? Hobaje ngei ka la songsido maibü kuasikei nyi kü to ngüha alelabü.”

¹⁶Kheijinei Zedekia Chobaei huphanga Jeremia to thekeilankei, “BUNYUBOU, aoei seneibü soushou kümbei hao lang kishongko ngei no ühaitilabü, ayingsi kaibü langkei lambü khübü müteibü ikto ngei no kuan üplabü.”

¹⁷Kheijinei Jeremiaei Zedekia to laukei, “BUNYUBOU Thükenbou Israel Mühghaüei hai lauda: Nyi Babilonbü khuleibü ika khümbo kuan apalonga ho sangnyu ajuoklabü, hoba no hoba kaibü chemdang khümetlabü.

¹⁸Lausikei nyi Babilonbü Choba khuleibü shuong ik to khümbo akulonga ho sangnyu Khaldibü ikto kuan aplabü, hoba haoenei ho wanei jikan apbulabü, hoba no haoeneibü ik ka asatenlabü.”

¹⁹Lausikei Zedekia Chobaei laukei, “Jihudabü aoyou Khaldibü jungto satetlangan ki, haoenei ngo kuan apan kü to mangtham jungeibüla dogo ngo hatda.”

²⁰Jeremiaei laukei, “No haoen la akutilabü, ngei ka to ai lenda, khünei ong nyi BUNYUBOUeibü ngüha leshi; khülonga ka yoa maian ong kilabü, hoba no lang kilabü.

²¹Lausikei nyi khümbo tekukho laualonga BUNYUBOUei ka la kubü mangsang kho ho:

²²Chühashi, Jihudabü Chobaeibü chema apyoan kibü yaksa shuong pendou Babilonbü Choba eibü khuleibü shuong jungto leian hauko kü la haptiakei. Haoen haujinei haoenei ai lauda ditashi: ‘Chobaeibü maanglembü jaishou shuongei no lepettikei, hoba ka khu limbo thük hapbei. Tou kaibü you thima nyemakei; haoen ka ka sepeinyu satkua.’”

²³“Kaibü yaksi shuong hoba kaibü shousi shuong Khaldibü jungto leian haulabü. Nyi no lolo haoeneibü ik ka asatenlabü, lausikei Babilonbü Chobaei laplabü; hoba ho sangnyu wanei jikan apbulabü.”

²⁴Kheijinei Zedekiaei Jeremia to laukei, “Habü ngüh ho aolakei telen, hoba no ühailabü.

²⁵Khuleibü shuongei ngei ka to joyoa dogo ditalonga, hoba ka jungto louan nyi Choba la ai lenkei hoba Chobaei ka to ai laukei, aikei kün ka tehu hoba künei no ühaitilabü dogo laualonga,

²⁶kheijinei nyi haoen to, ‘Ngei Choba to ngo nyibou Jonathaneibü chem to khünei ühaitila ohautisi maikei dogo sukeijakei,’ dogo lenshi.”

²⁷Kheijinei khuleibou shuong pendou Jeremia jungto loukei hoba hao to phekei, hoba haoei Chobaei hao to lenbü tegü haoen to jongaikei. Hibü haoenei hao to joyobü nangkei, aieilausi aoeikei haoei Choba to ngühsong wan- yobü adit.

²⁸Hobaje Jerusalem lebü chalou asühshongko Jeremia Choba chem chemsophanga phokei.