Read Chang Naga JEREMIA 39 Bible Online

JEREMIA 39 - Chang Naga bible

JEREMIA 39

¹Jihudabü Choba Zedekia po güboubü lit anboubüa, Babilonbü Choba Nebukhadnez- zar hoba sepai tan pendou Jerusalem khulimbo loukei, hoba kho shikei.

²Zedekia po anthükche boubü lit leiboubü chalou gübounyet sangnyu khonei sangnyu kümthang kho leilukei.

³Ladang Jerusalem lekei, Babilonbü khuleibü pendou loukei hoba bakhün jenyua setkei: Nergal Sharezer, Samgar Nebo, Rabsarisbü Sarsekhim, hoba lubü Rabmagbü Nergal Sharezer, hoba Babilon Choba songdak phanga joubü pendou yoan kikei.

⁴Ladang Jihudabü Choba Zedekia hoba sepai pendouei haoen hapbei haoen satkei; Chobaeibü bamanga kümthang penyi kaanglanga bakhün danko nangnak sangnyu ka angkei, hoba haoen Araba aeto haukei.

⁵Lausikei Khaldibü sepai shuongei haoen shijung haukei hoba Jerikho pholia Zedekia laphetkei hoba haoenei hao lapbei, hoba Hamat kaodaka Riblaa Babilonbü Choba Nebukhadnezzar jungto hao leian loukei, hoba haoei hao to mat jembei.

⁶Babilonbü Chobaei Riblaa Zedekia Chobaeibü shousi shuong hao thedanga haitikei, hoba Babilonbü Chobaei Jihudabü sekbülakbü pendou haitikei.

⁷Kheijinei haoei Zedekiaeibü nyek phekan apbukei hoba Babilon to leian haula hao namlühei khühkei.

⁸Hobaje Khaldibüei Chobaeibü chem hoba mütli shuongeibü chem jikkei hoba Jerusalem kümthang leilukukei.

⁹Kheijinei lombou lajamleibou Nebuzaradanei joubü mütshuong aoyou sangnyua ap- yoan kikei, aoyou hao jungto satetlangkei, hoba aoyou haiyeiko kikei khübü kho Babilon to lang senkei.

¹⁰Lombou lajamleibou Nebuzaradanei shalebü müt at aoyou ai aki haoen Jihuda kaodaka apyokei, hoba haoen la semlüh bamang hoba sek yoan kukei.

¹¹Babilonbü Choba Nebukhadnezzarei Jeremia shanga lombou Nebuzaradan danko sakkuko laukei,

¹²“Hao leian kaiya, hao to maisho chühashi; hoba hao to amaibü teküm, lausikei haoei ka to lenbü tegü hao to kümashi.”

¹³Hibü lombü lajamleibou Nebu- zaradan, yaangenbou Nebushazban si Nergal Sharezer, hoba Babilonbü Chobaeibü songdakbü konglebü shuong pendouei,

¹⁴hautikei hoba lombou shemjang ka Jeremia leian sungkei. Haoenei Shafanureibü shi, Ahikameibü shou Gedalia la haoei haoeibü chem to leian haula khümbo kukei. Hibü hao mütshuong yoa kikei.

¹⁵BUNYUBOUeibü ngüh Jeremia jungto hao lombou chema khinan kijinei loukei:

¹⁶“Hauashi, hoba Ethiopiabü Ebed-Meleg to lenshi, Thükenbou BUNYUBOU Israel Mühghaüei hai lauda, ‘Chühashi, ngei ho sangnyu khulimbo maibü shanga aying amaibü shanga loushedtila hoba kho chaloua ka thedanga habü ho kümlabü.

¹⁷Lausikei noje khünyet ngei püetlabü, dogo BUNYUBOUei lauda; hoba no aoyou to hatda haoeneibü ik to no akulabü.

¹⁸Aieilausi maimaitham ngei no püetlabü hoba no inei atuonglabü; lausikei no jembü langkei wapyobü jongsak phatko kilabü, aieilausi nyi kü to maanglem phokei, dogo BUNYUBOUei lauda.’ ”