Read Chang Naga JEREMIA 4 Bible Online

JEREMIA 4 - Chang Naga bible

JEREMIA 4

¹“No longeikho laualonga O Israel, no kü jungto sepeiashi,” dogo BUNYUBOUei lauda. “Nyi kü thedang ka kaibü mangsenlabü heangsho shuong apbho laualonga hoba satan üplonga,

²hoba ngühmaia hoba saopobüa, ‘BUNYUBOU lang ki shongko,’ dogo lauko thealanalonga, kheijinei haoei phangshuong haükulabü hoba hao to haoen soneikanglabü.”

³Aishanga BUNYUBOUei Jihuda si Jerusalembü mütshuong to hai lauda, “Kanei küpshed shapmeiashi, hoba jaklaak yoa lilabü tewen.

⁴Kan lolo BUNYUBOU thedanga kipan apashi, hoba kaneibü maangpon tangkabü khop apashi, kan Jihuda hoba Jerusalembü mütshuong, khei ayinglonga kanei amaibü kümbü hangshong ngeibü khauang wan tegü longlabü hoba aoeikei anyettienlabü lele laaklabü.”

⁵Kanei Jihudaa ngekashi hoba Jerusalema ngetiashi; hoba lenashi, kaonyeka kanei teklaang metashi, ngekashi hoba lenashi; kamshaiashi hoba banyu lean kibü sangnyu shuong khüto kaiya.

⁶Zion to haulabü aenei nisan che phoashi, satenshang lamshi, tühaitei; aishanga ngei yungkük ka amaibü yaang sungbalabü.

⁷Molosaonyu che haoeibü hushang ka hoba phangshuongeibü mautibou che louada; hao jembü lama kia. Hao jembü kishang ka longan thinei kia; haoen kaonyek sangliphanga, khei kaneibü sangnyu shuong müt akiko apshang danglabü.

⁸Hibü kho shanga senounei shenan, ügütü chia lauashi hoba haapyoashi; aishanga BUNYUBOUeibü kaangbüsekbü sei sen ka angailangko kia.

⁹BUNYUBOUei laukei, “Ho chalou khünei Choba si yaangenbü shuong maang koulabü hoba ungshedbou shuong manglabü hoba thuseibü shuong maang- panglabü.”

¹⁰Kheijinei ngei laukei, “Ah, BUNYUBOU Mühghaü, nyi, ‘Kanei hakso haplabü,’ dogo laubü kho in sangloua tenan sühjineije nyi ho mütli hoba Jerusalem maiko khüpettia.”

¹¹Kho chaloua ho mütli to hoba Jerusalem to ho hai laulabü, “Yeilang aubü che, yamlamang shonghkhu ulangbü ka kü mütli nouyangshou aephei to louada; soueikula aying, hinseitikula aying;

¹²lausikei kho shangaje yongko sekokbü kü shanga loulabü, tokei tou ngei haoen shanga matjem kulabü.”

¹³Chühashi, hao sangmei tegü angda, hoba haoeibü kailong yeishik tegü kilabü; haoeneibü koli shuong aulu tokei sokeisepbei. Sen shanga ügütü! Sen lai kila!

¹⁴O Jerusalem, no khümenlabü lele kaibü maangpon shabü ka sakenashi. Lalokche kaibü dambü shuong ka to thüngan kila?

¹⁵Aishanga Dan ka ngüh cheei ngetida hoba Efraim shongh ka amaibü ngekletkuda.

¹⁶“Phangshuong maangsangtiashi; chühashi Jerusalem la ngetiashi: ‘Kaodak saabü ka sangshibü louada, hoba Jihuda sangnyu shuong khulimbo ngühlang kuda.

¹⁷Sek lombü shuongei tegütham, haoen sao khulimbo komlepan kia, aieilausi saoei ngo khulimbo meimeikei,’ ” dogo BUNYUBOUei lauda.

¹⁸“Kaibü hangsilam hoba kümsilei shuongei ka thükto ho loushedkei. Ho kaibü shabü kümsilei shuong ki, maimaitham ho khauektham ki, aieilausi hoei kaibü maangpona sühko atda!”

¹⁹O ngeibü soushou, ngeibü soushou! Kü maangpona ngeibü mang toktokda. Kü to ngeibü maangpon sangsembo akida; ngo küpjembo akienda. Aishanga teklaang ngühlang wapyobü ngühlang ngei ditda.

²⁰Leilubü thükto leilubü, kaonyek khümbo leiluakei. Hakde ong ngeibü neichem shuong hoba ngeibü thangtet nei shuong jitnyina.

²¹Ngei lalokche nisan hapla hoba teklaang ngühlang ditla?

²²“Aishanga kü mütli ngoubü ki; haoenei ngo angekei. Haoen ngoubüloubü shousi shuong ki; hoba haoen to ditenbü ai aki. Amaibü kümla haoen maanglimaangsang ki; lausikei maibü kümla haoenei angekei.”

²³Ngei kaodak to chühkei, hoba chühashi, kho leilubü hoba kongkong kikei hoba mütshuong haoeneibü ngesak akitei.

²⁴Ngei shongh shuong to chühkei, hoba chühashi haoen lühkei hoba shonghshou pendou jiji to ngomyokei.

²⁵Ngei chühkei hoba chühashi khünei müt akitei, hoba mühkabü au pendou satan kikei.

²⁶Ngei chühkei hoba chühashi, buhek hekbü kao kho yamla yeian kikei, hoba khünei sangnyu pendou BUNYUBOU thedanga hoba haoeibü hatla moklabü sei thedanga leiluan kikei.

²⁷Aishanga BUNYUBOUei hai lauda: “Kaonyek pendou sangliphang che la yeilabü; khei yingasikei kho thon alelabü.

²⁸Kho shanga kaodakei mang haaplabü, hoba thükaenei müh nakthühbü kilabü, aieilausi kho ngei laua hoba kho asenetlabü; ngei jantheda hoba khüka asepeilabü.”

²⁹Koli sepai shuong hoba lau jungbü shuong ngühei sangnyu khümbo satyoda, haoen hushang lamjung atda hoba laangbob lambo angda; sangnyu weko nangletakei hoba müt che ongkei khünei akida.

³⁰Hobaje no ladang leilulaje nyi ai kümla? Nyi no lolo nakthüngan sakbü neisimei lesikei hoba no lolo honeibü neisimei hele leasikei kaibü nyeka naangan yaangtisikei, amlanga nyi no lolo he maitida; no sanoubü shuongei ka la nyikuda, haoenei kaibü langkei lamda.

³¹Ditashi, shou bukjinei yaksa cheeibü ngüh phatko, shaangbüshou bukjinei sao khonkubü phatko, Zion Nouyangshou ngühlang, haksakan saoeibü ik yantiko: “Ngo tou ügütü; aishanga müt haitibü shuong thedanga ngeibü soushou semthetda,” dogo laubü ngühlang ngei ditda.