Read Chang Naga JEREMIA 40 Bible Online

JEREMIA 40 - Chang Naga bible

JEREMIA 40

¹Lombü lajamleibou Nebu- zaradanei Rama ka Jeremia litian phaia haoei hao namlühei khühan Jerusalem hoba Jihuda langsenbü pendou yoa leian Babilon to lapan haujinei BUNYUBOUeibü ngüh Jeremia jungto loukei.

²Lombou lajamleibouei Jeremia leian loukei hoba hao to laukei, “BUNYUBOU kaibü Mühghaüei ho kaoen khulimbo amaibü kho sakkukei;

³hoba BUNYUBOUei kho sungbakua hoba haoei laubü tegü küma. Aieilausi kaibü mütliei BUNYUBOU khulimbo shabü shona hoba haoeibü ngüha alesije ho kümsilei ka thükto loushedkei.

⁴Tou chühashi, kaibü ik namlüh ka ngei no litila Babilon to kü yoa loula maiakei dogo nyi damalonga kaiya, hoba ngei no maisho chühlabü; lausikei no kü yoa Babilon to loula sheda dogo damalonga telou. Chühashi, kaodak khümbo ka thedanga kia, nyi laeto maikei hoba janbü dogo damda thi aeto haushi.

⁵“No ohauko kialonga kheijinei Ahikameibü shou, Shafaneibü shi Gedalia jungto sepeiashi, ao Babilonbü Chobaei Jihudabü sangnyu shuonga governor pienkei. Hao yoa mütli yoa kiashi, ayingsi nyi lae aeto haujan dogo damda thi aeto haushi.” Hibü lombou lajamleibouei hao la shausiyung hoba jongsak kukei, hoba hao hautikei.

⁶Kheijinei Jeremia Mizpaa Ahikameibü shou Gedalia jungto haukei, hoba hao yoa kaonyeka apyoan kibü mütshuong yoa kikei.

⁷Ladang khongthua sepai tan lajamleibü pendouei, hoba haoen mütshuongei Babilonbü Chobaei Ahikameibü shou Gedalia kaonyeka governor piena hoba bousu, yaksa, hoba nashousi shuong, kaonyeka shalebou tham aoyou Babilon to alaplangko ki hao la ikjai khümbo kua dogo ditkei,

⁸haoen Mizpaa Gedalia jungto Nethaniaeibü shou Ishmael, Kareaeibü shou Johanan, Tanhumetheibü shou Seraia, Netofa ka Efaieibü shousi hoba Maaka ka Jezania, haoen mütshuong yoa haukei.

⁹Ahikameibü shou Gedalia Shafaneibü shiei haoen hoba haoeneibü mütshuong to theyolanyoko laukei, “Khaldibü khangenla tehüt, kaonyeka kishi, hoba Babilonbü Choba khangenashi, hoba kan yoa kho maian kilabü.

¹⁰Kü shangaje Mizpaa kilabü, Khaldibü aoyou kü jungto loulaje haoen thedanga kan shanga lolabü. Lausikei kaneije ih hoba sulang buhek hoba onang yoshaishi, hoba kaneibü nyak chaka khübü kho thanan phoshi, hoba kanei sungan kibü sangnyu shuonga kishi.”

¹¹Kho tegü ladang Jihudabü aoyou Moabbü si Ammonbü yoa hoba Edom hoba lubü kaonyeka, khei Babilonbü Chobaei Jihudaa joubü apyoan ki hoba Ahikameibü shou Gedalia Shafaneibü shi haoen thüka governor pienan kia dogo ditkei,

¹²kheijinei Jihudabü pendou haoen lai aeto ong shian apan kikei, khüka Jihudabü kaonyek to Mizpa hoba Gedalia jungto loukei. Hobaje haoenei ih hoba sulang buhek juongnyu yoshaikei.

¹³Tou Kareaeibü shou Johanan hoba khongthua sepai tan leiyeibü pendou Mizpaa Gedalia jungto loukei

¹⁴hoba hao to laukei, “Ammonbü Choba Baalisei; Nethaniaeibü shou Ishmael kaibü langkei lela hautiakei dogo nyi ngekeilao?” Lausikei Ahikameibü shou Gedaliaei haoen to maialem.

¹⁵Kheijinei Kareaeibü shou Johananei Mizpaa Gedalia to huphanga joyokei, “Ngo hauakho hoba ngei Nethaniaeibü shou Ishmael haitiakho, hoba aoeikei kho angelabü. No nyangko kamshaian kibü Jihudabü linlabü hoba lubü Jihudabü jouletbü shuong shemlabü lele aila kaibü langkei letila?”

¹⁶Lausikei Ahikameibü shou Gedaliaei Kareaeibü shou Johanan to laukei, “Nyi ho kümsilei akümlabü, aishanga nyi Ishmael shangabü amlangbü ngüh angda!”