Read Chang Naga JEREMIA 41 Bible Online

JEREMIA 41 - Chang Naga bible

JEREMIA 41

¹Lit nyetboubüa Nethaniaeibü shou hoba Elishamaeibü shi Ishmael, ao Chobaeibü thensilen, hoba Chobaeibü kongnyu songdakbü yoa che kiteikei, hao Mizpaa Ahikameibü shou Gedalia jungto müt an yoan loukei. Ladang haoen khünei liko shauko yungko kikei,

²kheijinei Nethaniaeibü shou Ishmael hoba hao yoa müt an kho meimeikei hoba Ahikameibü shou hoba Shafaneibü shi Gedalia kho inei wapan koutikei hoba hao haitikei, ao Babilonbü Chobaei kaonyeka governor pienan kikei.

³Tokei Ishmaelei Mizpaa Gedalia yoa kiteibü Jihudabü pendou hoba Khaldibü sepai aoyou khünei kiteikei haoen pendou haitikei.

⁴Gedalia haitian phaia nyetbounyet, aoeikei kho angetoua,

⁵Shekhem, Shilo, hoba Samaria ka haoen sembung wi kütan apan hoba neisimei phenthetbü lean, haoeneibü mang wapeian, shausiyung lembü hoba ponlem hibü jungan BUNYUBOUeibü lembü- chema lembü ku la müt saolei lousühkei.

⁶Hobaje Nethaniaeibü shou Ishmael Mizpa ka haoen to haüyola haapbo longkei. Haoei haoen haüyojinei, haoei haoen to laukei, “Ahikameibü shou Gedalia jungto kaiyeda.”

⁷Ladang haoen sangnyu to lotkei, Nethaniaeibü shou Ishmael hoba hao yoa kibü mütshuongei haoen haitikei hoba haoen deikhüna jinkukei.

⁸Lausikei khünei haoen yoa müt anei Ishmael to laukei, “Kün tühaiti, aieilausi künei youshou, barli, onang, hoba naodei seka huan thanan phoakei.” Hibü haoei haoen apyokei hoba jenabou yoa ühaiti.

⁹Tou deikhün laoboua Ishmaelei haitibü mütshuong mang pendou jinkukei kho Israelbü Choba Baasha khulimbo Asa Chobaei thangetla kümbü kiteikei. Nethaniaeibü shou Ishmaelei haitibüei kho shentikei.

¹⁰Kheijinei Ishmaelei Mizpaa joubü müt pendou, khei Chobaeibü nouyang shousi shuong hoba Mizpaa apyobü müt pendou, aoyou lombü lajamleibou Nebu- zaradanei Ahikameibü shou Gedalia la khümbo kuan phokei haoen lapbei. Nethaniaeibü shou Ishmaelei haoen lapbei, hoba Ammonbü jungto danthetjung haula meimeikei.

¹¹Lausikei ladang Kareaeibü shou Johananei hoba hao yoa kibü sepai tan leiyeibü pendouei Nethaniaeibü shou Ishmaelei kümbü amaibü pendou ditkei,

¹²haoenei haoeneibü mütshuong pendou leikei hoba Nethaniaeibü shou Ishmael khulimbo wapyola haukei. Gibeona kibü thimdei yaangbü khüto haoen hao thükto loukei.

¹³Hobaje ladang müt pendouei Kareaeibü shou Johanan hoba hao yoa sepai tan leiyeibü pendou hapbei, haoen olinyokei.

¹⁴Hibü müt pendou aoyou Ishmaelei Mizpa ka langsenan haukei haoen nopngaian loukei hoba Kareaeibü shou Johanan jungto haukei.

¹⁵Lausikei Nethaniaeibü shou Ishmaelei hao yoa müt set leian Johanan ka satenkei, hoba Ammonbü jungto haukei.

¹⁶Kheijinei Kareaeibü shou Johanan hoba hao yoa sepai tan leiyeibü pendouei Nethaniaeibü shou Ishmael Ahikameibü shou Gedalia haitian phaia joubü sepai shuong aoyou Nethaniaeibü shou Ishmaelei sunglangan kikei, se- pai shuong, yaksa shuong, nashousi shuong, hoba sungphatbü mütshuong aoyou Johananei Gibeon ka leian longeikei haoen pendou leikei.

¹⁷Hobaje haoen haukei hoba Bethlehem nyangko Gerut Kimhama kikei; aieilausi Khaldibü laüa Ijep to haula dambo kikei;

¹⁸aishanga haoenei Babilonbü to hatkei. Aieilausi Nethaniaeibü shou Ishmaelei Babilonbü Chobaei kaonyeka governor yeitibou Ahikameibü shou Gedalia haitian kikei.