Read Chang Naga JEREMIA 42 Bible Online

JEREMIA 42 - Chang Naga bible

JEREMIA 42

¹Kheijinei sepai tan leiyeibü pendou Kareaeibü shou Johanan hoba Hoshaiaeibü shou Azaria hoba müt pendou hanbou ka yaangbouthama sühko nyangko loukei.

²Hobaje Jeremia thuseibou to laukei, “Küneibü subüjabü ka jungto loutiashi; hoba BUNYUBOU kaibü Mühghaü to kün shanga sukujakuashi. Kün jouletbü pendou shanga welaukushi; aieilausi kaibü nyekei hapbo kibü tegü, juongnyu ka kün shisho ong joutiakei.

³BUNYUBOU kaibü Mühghaüei kün la kün haulabü lamnyu hoba künei kümlabü kümsilei shean lenlabü lele welaukushi.”

⁴Jeremia thuseibouei haoen to laukei, “Ngei kan la ditkua, chühashi, ngei BUNYUBOU kaneibü Mühghaü to kaneibü subüjabü tegü welaukulabü, hoba BUNYUBOUei ai ong jongailaje ngei kan la lenlabü kan ka aikei huan apholabü.”

⁵Kheijinei haoenei Jeremia to laukei, “Laobou ngüh künan BUNYUBOU kaibü Mühghaüei no kün jungto hautilaje, pendou kho tegü künei akümlonga kün khulimbo ngühmai hoba maanglemenbü aukabü kho BUNYUBOU yingshima.

⁶Maisi amaisikei, khei ladang BUNYUBOU Mühghaü ngühlang ditlaje, kho kün yoa maian kilabü lele BUNYUBOU küneibü Mühghaü, ao jungto künei no hautiko ki, haoeibü ngüh künei ngüha lelabü.”

⁷Chalou anboubü thonnyet BUNYUBOUeibü ngüh Jeremia jungto loukei.

⁸Kheijinei Kareaeibü shou Johanan hoba hao yoa sepai tan leiyeibü pendou hanbou ka yaangboutham sühko ngakei.

⁹Hobaje haoei haoen to laukei, “BUNYUBOU, Israel Mühghaü, ao jungto kaneibü subüjabü kula kanei ngo hautikei, haoei hai lauda:

¹⁰‘Kan ho kaodak ka asatko kialonga, kheijinei ngei kan phonan dangetlabü hoba senan akoutilabü; ngei kan kelabü, hoba apheienlabü, aishanga ngei kan to amaibü kümbü shanga ngo ngangda.

¹¹Kan hatko kibü Babilonbü Choba to kan ühütlabü dogo BUNYUBOUei lauda, aieilausi ngo kan yoa kia, haoeibü ik ka ngei kan leiyenlabü.

¹²Ngei kan thükto onoulabü hoba no jembü kaodaka kitila ngei ka la sakkulabü.’

¹³“Lausikei kanei, ‘Ho kaodaka kün akilabü,’ dogo laualonga,

¹⁴hoba, ‘Aying, kün Ijep kaodak to haulabü lanei künei wapyo ühüplabü, ayingsi teklaang ngühlang aditlabü, ayingsi mühei haiko akilabü,’

¹⁵hoba kün khünei kilabü, dogo laualonga kheijinei kanei BUNYUBOUeibü ngüh ditashi, O Jihuda jouletbü shuong. Thükenbou BUNYUBOU Israel Mühghaüei hai lauda: ‘Kan Ijep to atla kaneibü thenyek sepeian kialonga hoba khünei kila haukho laualonga,

¹⁶kheijinei kanei hatbü inei khünei kan laphetlabü, hoba mühsinou laobou to kanei hatda, kho Ijep sühko khaplapbo kan phaito semlabü hoba khünei kan hailabü.

¹⁷Müt pendou aoyouei Ijep to kila haula jembü thenyek sepeida inei, mühei, hoba limsilangei hailabü; amaibü laobou ngei haoen thükto sungbalaje kho ka haoen jouletbü ayingsi lang kibü ayolabü.’

¹⁸“Aishanga Thükenbou BUNYUBOU Israel Mühghaüei hai lauda, ‘Ngeibü khauang hoba maangpok Jerusalema kibü shuong thükto jonan jinkubü phatko, ladang kan Ijep to haulaje ngeibü maangshat kan la hakan jinkulabü. Kan mangsenlabü che, shedsikhau hoba akhainyu che la yeilabü. Kanei touje ho kaodak ladangkei ühüpmailabü.’”

¹⁹BUNYUBOUei kan to lena, “O jouletbü Jihuda, Ijep to tohau. Ho maisho ngeashi, kan jembü langkeiei aukabü ayingsi ayingbü to hausi amaibüla dogo ngei tat kan la maangsanglabü kuda.

²⁰Aishanga kaneibü BUNYUBOU, kaneibü Mühghaü jungto kanei ngo hai lauko hautikei: Kün shanga BUNYUBOU seneibü Mühghaü to sukujakushi; hoba BUNYUBOU seneibü Mühghaüei ai ong lenlaje kün la ngetiashi hoba kho künei kümlabü.

²¹Hobaje tat ho kan la lentikei, lausikei kanei BUNYUBOU kaneibü Mühghaüeibü ngüh kho haoei kan la lenla ngo hautibü aineikei kanei ngüha ale.

²²Tou khei yingsije ho damenashi: Kan kila haumangsühbü kaonyeka kan inei, mühsinouei hoba limsilangei hailabü.”