Read Chang Naga JEREMIA 43 Bible Online

JEREMIA 43 - Chang Naga bible

JEREMIA 43

¹BUNYUBOU haoeneibü Mühghaüei Jeremia haoen jungto BUNYUBOU haoeneibü Mühghaü ngüh jungan hautibü pendou haoei müt pendou to lenkhüman phaia,

²Hoshaiaeibü shou Azaria hoba Kareaeibü shou Johanan hoba müt pendou hanbou ka yaangbouthama sühko louan Jeremia to laukei, “Nyi amlang laueida, BUNYUBOU seneibü Mühghaüei Ijepa kila tohau dogo lenla no ohauti;

³lausikei Khaldibü ika kün khümbo kula, khei haoenei kün haitila ayingsi kün Babilon to laplangla shanga Neriaeibü shou Barukei no kün khulimbo phokuakei.”

⁴Hibü Kareaeibü shou Johanan hoba sepai tan lajamleibou pendou hoba müt pendouei Jihuda kaodaka kila BUNYUBOUei lenbü ngüh aditku.

⁵Lausikei Kareaeibü shou Johanan hoba sepai tan lajamleibü pendouei Jihudabü jouletbü pendou, hoba phinthon- an kibü kaonyek pendou ae ka Jihuda to kila louan kibü shuong pendou,

⁶khei bousu shuong, yaksa shuong, nashousi shuong, Chobasao shuong hoba mütpem weko aoyou lombü lakjaibü Nebuzaradanei Shafaneibü shi hoba Ahikameibü shou Gedalia yoa apyoan kikei, tokei thuseibü Jeremia hoba Neriaeibü shou Baruk yoan laplangkei.

⁷Haoenei BUNYUBOUeibü ngüha ale, hoba haoen Ijep to Tahpanhes sangnyu sühko haukei.

⁸Kheijinei Tahpanhesa BUNYUBOUeibü ngüh Jeremia jungto loukei:

⁹“Kaibü ika laang yaangbü shuong jungashi, hoba Tahpanhesa Faraoeibü chem to atbü lama Jihudabü pendou thedanga juoklaangei yaübü shema khübü kho huan phoashi.

¹⁰Hobaje haoen to lenshi, Thükenbou BUNYUBOU Israel Mühghaüei hai lauda: Chühashi, ngei hautilabü hoba Babilonbü Choba Nebukhadnezzar, ngo khangenbou la lelabü, hoba haoeibü Choba setshang ngei huan phobü habü laang thüka huonglabü, hoba haoei jembü Chobaeibü phüh khübü thüka pinlabü.

¹¹Nebukhadnezzar loulabü hoba Ijep shian aplabü. Limsilangei shemla tetbü shuong limei hailabü, langsenla tetbü shuong laplanglabü, hoba inei shemla tetbü shuong inei hailabü.

¹²Haoei Ijepbü mühghaü shuong lembü chema wan sapbulabü; hoba haoei haoeneibü lembüchem thekulabü hoba haoeneibü mühghaü shuong langkulabü. Sanlombüei haoeibü neisimei ka hek lapan apbü tegütham, Babilon Chobaei Ijep sakteitham kuan aplabü, hoba hao khüka sangmaia satlabü.

¹³Hobaje Ijep kabü Heliopolis saopobü thaonyu shuong kho haoei leilukulabü, hoba Ijepbüeibü mühghaü lembü- chem shuong kho wanei lonan apbulabü.”