Read Chang Naga JEREMIA 48 Bible Online

JEREMIA 48 - Chang Naga bible

JEREMIA 48

¹Moab shangabü Thükenbou BUNYUBOU Israel Mühghaüei hai lauda: “Nebo shanga ügütü! aieilausi ho leiluakei; Kiriathim shian apa; hoeibü lapheishon leilutia, hoba hakabü mütshuong himou bautia.

²Moabbü nyenhang satan apa. Dangbouei Heshbona lean apa, hoba Moab phang leilutila huonda. Madmen sangnyukei litham aplabü; aishanga lakoubü shuong ho khulimbo haulabü.

³Horonaim mütshuongei ngekda, ‘Panglangbü! Lusakbü yaang!’

⁴“Moab lusaka; nashousi shuong haapyobü ditashi.

⁵Luhit to angbü lamnyua, haoen khauektham haapyobü ditashi. Horonaim to koubü lamnyua haoen khonkua ngekyobü ditashi.

⁶‘Satashi! Kaneibü langkei khümenashi!’ dogo haoenei lauda. ‘Phetsen kaoa yamkabü gadu che phatko laangashi!’

⁷“Moab, nyi kaibü haua si nyaksinama maanglembei, lausikei tou no mangkei langsenlabü; hoba kaneibü mühghaü Khemosh, haoeibü ungshedbou shuong si konglebü shuong yoan laplanglabü.

⁸Sangnyu weko to mautibou loulabü, hoba sangnyu che ongkei ainletlabü. Yomang si yaüentok pholi khümbo maulabü, aishanga ngo BUNYUBOUei laua.

⁹Moab shanga laangkee phokuashi; aishanga sao tongde maulabü. Saoeibü sangnyu shuong lusakan aplabü, hoba khonei aokei akiko sangliphang la yeilabü.”

¹⁰(BUNYUBOUeibü kümsilei aoei nyibutham kümda hao shedsikhau yingshi, hoba aoei jembüeibü in sii angtibü ka senetda hao shedsikhau yingshi!)

¹¹BUNYUBOUei laukei, “Moab, sao mütao ka thama ongayasetham kikei hoba ladangkei langsenbü to ohau. Moab kho jephot che ka che to yeian ajinbü dangshatbü ih tegü ki. Sao ka jemoubü ladangkei asat, hoba sao to meimaibü ponlem ajeileiko ong maian ki.

¹²“Lausikei chühashi, ngei Moab ih tegütham yeian sungla mütshuong hautilabü chalou shuong louada. Haoenei ih takbü jephot shuong kongenlabü hoba khübü kho netla yeiko jangnyinlabü, dogo BUNYUBOUei lauda.

¹³Bethel mühghaü to maanglembü shangabü Israel chung himoubü tegütham, Khemosh mühghaü to maanglembü Moabbü himou baulabü.

¹⁴“Moabbü shuong, ‘Kün lakjaibü hoba wapyoa sonenbü shuong,’ dogo lauko aila nyen leda?

¹⁵Moab hoba saoeibü sangnyu shuong lusakkua; haoeibü shanenbü heshou shuong haitikhüma. Ngo Thükenbou BUNYUBOU Chobaei lauda.

¹⁶Moab tuonglabü thushed nyangakei; hoba sao leilulabü tongde louada.

¹⁷“Kan sao nyangko kibü shuong hoba saoeibü nyenhang ngebü phang pendouei mang haapashi. ‘Saoeibü haukiyaangkibü songdak leilua; saoeibü soneikangbü hoba hau touje aki,’ dogo laushi.

¹⁸O kan Dibona kibü shuong, kaibü soneikangbü kaoen ka kayena hoba kaoa thamngua setashi; aishanga Moab leilutibou hanei kia hoba haoei kaibü lapheishon leilutikua.

¹⁹O kan Aroera kibü shuong, lamnyu nyangko loashi, hoba chühko kishi; laangjung satbü shuong ka pheashi, ‘Ai kühshuokkei?’ dogo haoen ka pheshi.

²⁰‘Moab tuonga, dogo haoenei jongailabü, ho shanga haapbuashi; ho himou bautiakei. Moab maua dogo Arnon Shumanga ngetiashi!’

²¹“Yaüentok sangnyu shuong to matjem lousüha, kho Holon, Jahza hoba Mefaat thükto,

²²hoba Dibon, Nebo si Beth Diblathaim thükto,

²³hoba Kiriathaim, Bethgamul si Bethmeon thükto,

²⁴hoba Keriot si Bozra thükto. Moab sangnyu shuong saabü si nyangbü pendou thükto matjem loua.

²⁵Moabeibü laang wapan apbua; saoeibü hau leilua, dogo BUNYUBOUei lauda.”

²⁶BUNYUBOUei laukei, “Moab ihei jaaktiashi, aieilausi saoei ngo khulima. Moabei jembüei khinan apbüa khoneilabü, hoba mütshuongei nyikulabü.

²⁷Moab, nyi Israel mütli latetche nyikula lekei damendalao? Nyi haoen soshau soyungbü shuongei lapbü hima jungeikei.

²⁸“O kan Moaba kibü shuong, kaneibü sangnyu shuong apyoashi! Hauan laangnyu thüka kishi! Laanglip khüna jembüeibü hap takbü dukutuk phatko kishi.

²⁹Moab yonglambü shangabü künei dida! Haoen aeibou lilibü, hao yaangenbü, hao sungenbü, hao yonglamshamle hoba haoeibü maangpona mü awealaubü ki.

³⁰Hao maangsak yembü ngei ngekei, hoba hao lilibüei ai haang along, dogo BUNYUBOUei lauda.

³¹Khei yingbü ka Moabbü pendou shanga ngo haapda, hoba Kir Heres mütshuong shanga ngo haapda.

³²Jezer shanga haapbü toje aei ngo ka shanga haapbuda. O Sibma mütshuong, no Haibü Yungnyu danko hoba Jazer onlangko khaübü semlüh buhek phatkei. Lausikei tou kaibü buhek hoba semlüh hek shuong thükto leilubü lousüha.

³³Moab kaomai kaodak ka olinbü hoba lemselabü sunglanga. Nitshang ka semlühdei koubü ngei thontia; aoeikei olinbüei uihinko angünlabü; khübü kho olinbüei uihinbü aying.

³⁴“Heshbon si Elealebü mütshuongei ngekda, hoba haoenei ngekbü ngühlang kho Jahaz sühko, hoba Zoar ka Horonaim si Eglath-Shelishiya sühkoa ditda, aishanga Nimrim shumang dei mangkei ulangtham apa.

³⁵Moab mütshuongei haoeneibü lemshang shongha juokbü lembü kubü hoba haoeneibü mühghaü shuong la jen ponlem juokbü thaktikulabü, dogo BUNYUBOUei lauda.

³⁶“Hibü Moab shanga hoba Kir Heres mütshuong shanga ngeibü maangponei mangap pithungei chia atbü phatko maanghaapda. Haoenei thanshaibü nyaksinam maukhüma.

³⁷Aishanga haoen pendouei khu shuan apa, hoba haoeneibü sembung wi kütan apa. haoeneibü ika haüko aktiakei, hoba shenjanga senounei shenakei.

³⁸Moabbü chemdak hoba khongnyu pendoua ügütü chia to liman lubü ai aki; aishanga ngei Moab aolakei amaikubü jephot tegü phetnyin- an apa.

³⁹Sao latetche leiluan ki! Haoen latetche haapda! Moab latetchei himoua takphai sepeian ki! Moab leilubü thua kia hoba kaijembo kibü pendou shanga sao akhainyu hoba hatlamoklabü che yeian ki.”

⁴⁰Aishanga BUNYUBOUei hai lauda: Chühashi! Aulu che tegü saoeibü kaak pinan Moab khulimbo seengjung loukouada.

⁴¹Sangnyu shuong hoba lapheishon shuong shian mautilabü. Khünyet chaloua Moabbü lakjaibü shuongeibü maangpon kho nahap shatei sühbü yaksa cheeibü maangpon phatko kilabü.

⁴²Moab leilutilabü hoba phang che ayinglabü, aieilausi haoei jembü lolo BUNYUBOU khulimbo yaangenkei.

⁴³Hatlamoklabü, püngkhün, hoba sung ka thedanga kia, O Moab mütli shuong, dogo BUNYUBOUei lauda.

⁴⁴Ao mokbü ka satlaje püngkhün to atlabü; ao püngkhün ka khomjung longlaje sunga minlabü. Aishanga haoen shieikoebü poa Moab thükto habü sungbalabü, dogo BUNYUBOUei lauda.

⁴⁵Heshbonbü yeme phanga satbümaubü shuong jim akiko loda; aieilausi jih chenei Sihon Chobaei songdakbü sangnyu Heshbon ka wan che anga; kho wanei Moabbüeibü khüngja hoba oyolemenbü shuongeibü khun juokda.

⁴⁶Moab mütshuong ügütü! Khemosh mütli shuong leilua; aieilausi kaibü jayangshou shuong langsena hoba kaibü nouyangshou shuong thüngshang to laplanga.

⁴⁷Khei yingasikei, thonlama ngei Moabbü naangmaitikulabü, dogo BUNYUBOUei lauda. Moab thükto matjem ho sühko ki.