Read Chang Naga JEREMIA 49 Bible Online

JEREMIA 49 - Chang Naga bible

JEREMIA 49

¹Ammonbü shangabü BUNYUBOUei hai lauda, “Israelbü shousi shuong phetphanlabü aki lo? Khülonga aila Molekei Gad lean apbei? Hobaje hao mütshuong aila ho sangnyua kikei?

²Hibü chühashi, ngei Ammoneibü Rabba sangngu khulimbo lason uihintilabü hoba ho leilubü uon che la yeitilabü; hoba kaijembü sangnyu shuong khümbo wanei lonlabü chalou che lousühada. Kheijinei Israelei hao shian sattibü shuong shian aplabü, dogo BUNYUBOUei lauda.

³Haapashi, O Heshbon! aishanga Ai leilutia! Mang haapashi, O Rabba nouyangshou shuong! Senou nei neiashi hoba mang haapashi! Maang ngouan laang- yoashi. Aishanga Molek haoeibü ungshedbou hoba konglebü shuong yoa langsenlabü.

⁴O maangalanbü nouyangshou, no kaibü kao yomang shanga aila yonglamda? Kaibü hau kouda. ‘Aoei ngo shila,’ dogo lauko aila nyi kaibü hau to maanglemda?

⁵Chühashi, kan kaijembo kibü shuong ka ngei kan thükto hatlamoklabü sungbakulabü, dogo Thükenbou BUNYUBOU Mühghaüei lauda. Kan mütpem weko jembü langkei püetla laangyolabü, hoba touje kaibü satetlangbü shuong nyibou ngashaila aokei akilabü.

⁶“Lausikei phaiaje ngei Ammonbü naang maitikulabü, dogo BUNYUBOUei lauda.”

⁷Edom shangabü Thükenbou BUNYUBOUei hai lauda, “Touje Temana songsido aki sai? Songbüdobü ka daman chühbü thona sai? Haoeneibü songsihon maua sai?

⁸Dedanbü shuong, sepeiashi hoba laangjung satashi! Laangboba huashi! Aieilausi ngei Esau thensilen thükto shieikoe sungbako mautilabü jihsiphai lousüha.

⁹Semlüh hek kheibü shuong ka jungto lousi haoenei semlüh- hek shisho üpyokulep lo? Kokbü shuong nangnak lousi haoenei mangsühbü ong langlep aying lo?

¹⁰Lausikei ngei Esau mütkong khokletkulabü; hao lolo ahuenlabü lele ngei hao hushang khokan apbulabü. Haoeibü shousi shuong, haoeibü jaisinasi shuong, chem- pen shuong shemlabü hoba hao touje akiko aplabü.

¹¹Kaneibü shoujit shuong apyoshi, ngei haoeneibü langkei thounoulabü. Kaneibü latnyu shuongei kü to maang lemtishi.”

¹²Aishanga BUNYUBOUei lauda, “Aoyouei yungjan ayingkokei kayang thung ka yunglabü lele yeikei longaje, no ashiakoeko satenlabü dogo damda lo? Aying, nyi kho kayang thung ka yungjan!

¹³Ngei ngo lolo thedalanda, Bozra, hatlamoklabü che, akhainyu che, leilulabü che, hoba shedsikhau che yeilabü; hoba haoeneibü sangnyu shuong pendou ponpen shanga leiluan kilabü, dogo BUNYUBOUei lauda.”

¹⁴BUNYUBOU ka ngei ngühlang shuong dida: Phangshuong jungto hai laula ngühlang künbü che hautiakei: “Kan lolo liko yoshaishi hoba hao khulimbo kaiya hoba lason loashi!

¹⁵Aieilausi chüh- ashi, ngei no phang yoa hanbou yeitilabü hoba müt yoa aweasüngtilabü.

¹⁶Nyi huongbü hatla moklabü si ka maangpon yonglam liliei no khüpettia. O no laanglip boba kibou hoba shonghkhu suokbou kimbou. Nyi kaibü hap auluei tegü suokbüa takasikei, ngei no khüka senyenlabü,” dogo BUNYUBOUei lauda.

¹⁷BUNYUBOUei lauda, “Edom hatlamoklabü che yeilabü; aoei hao danko haulaje maangpanglabü hoba khübü khonku hapan huphanga nyikulabü

¹⁸Sodom si Gomora hoba haosi nyangko kibü sangnyu shuong khüpan apjinei tegü, khünei müt aokei akilabü; khünei khunakshousi aokei athünglabü, dogo BUNYUBOUei lauda.

¹⁹Chühashi, Jordan yamlamang ka nyemsang lamshaushang lambo molosaonyu che loushedbü phatko ngo anglabü, hoba ngei Edom mangde ong haoeneibü kaonyek ka shian sattilabü. Kheijinei ngei ao pienlaje haoei kaonyek thüka songdaklabü. Kü to ao takteiyola? Kü to ao sheiyola? Hobaje ao sanlombouei kü khu limbo lola?

²⁰Hibü BUNYUBOUei Edom khulimbo hoba Temana kibü shuong khulimbo ai takletan phokukei kho ditashi: Haoeneibü sanlon shoushou mangkei senlanglabü; haoen laüa haoei haoeneibü lamshaushang khümbomeiko mautilabü.

²¹Haoen tuongbü langhei kaonyu nyaakeilabü; haoenei ngekbü Saklangbü Yungnyua ditlabü.

²²Chühashi! aulu kaak pinan seengjung lou- yenbü tegü labou shuong Bozra khulimbo loulabü. Khünyet Edombü sekbülakbü shuongeibü maangpon nabukshatei sühbü yaksa che phatko kilabü.”

²³Damaska shangabü ngühlang: “Hamat si Arpad mütshuong phenyemyoakei, aishanga haoenei ngühlang amaibü dida. Haoen hatbüei tühnyinda, hoba sangasemenbü yungnyu tegü shoueida.

²⁴Damaska hau akiko apa, sao satla sepeikei, hoba panglangbüei sao to sühlangakei; yaksa che nabukshatei sühbü tegütham sao khonku si maangshatei senetakei.

²⁵Olinbü hoba nyenshen sangnyu lai nangletan ki!

²⁶Hibü saoeibü mütao shuong khongnyua tuonglabü; khünyet lakjaibü shuong pendou mautilabü, dogo Thükenbou BUNYUBOUei lauda.

²⁷Hobaje Damaska kümthanga ngei wan sapbulabü, hoba khoei Benhadad Chobaeibü lapheishon shuong lonan aplabü.”

²⁸Babilon Choba Nebukhadnezzarei sang shian kimbü Kedar si Hazorbü Choba sangnyu shuong shangabü BUNYUBOUei hai lauda: “Meimeiashi, Kedar khulimbo angashi, hoba Chaangbou aekabü mütli mautiashi!

²⁹Haoeneibü neichem si haoeneibü sanshuong lean aplabü; haoeneibü thangtetnei si haoeneibü peisilei khümbo ut yoa haulangkulabü. Mütshuongei haoen to ngeklabü, ‘Pendou aenei hatla moklabü ki!’

³⁰“Hali satashi, O kan Hazora kibü shuong! Laangbob haübüa huan apashi, dogo BUNYUBOUei lauda. Aishanga Babilonbü Choba Nebukhadnezzarei kan khulimbo huon che takakei, hoba no khulimbo lamthen che küma.

³¹‘Meimeiashi! Damlabü ai akiko ongayasetham kibü phang che shiakho! Kho sangnyua bakhün ayingsi koukhin aki hoba mütshuong helelea ki.’

³²“Haoeneibü ut shuong soletbü peisilei yeilabü, haoeneibü masu shuong konga jimlabü! Khulou tuibang kipbü shuong ngei yeia pendou aenei soulangtilabü, hoba pendou aeka ngei haoen jungto thushed loutikulabü, dogo BUNYUBOUei lauda.

³³Hazor ponpen shanga selong thüngshang leilubü kaoen che yeitilabü. Khünei müt aokei nyibou akingailabü.”

³⁴Jihudabü Choba Zedekia songdak khangbüa BUNYUBOUeibü ngüh Jeremia thuseibü jungto Elam shangabü loukei:

³⁵Thükenbou BUNYUBOUei hai lauda: “Chühashi, Elambü lau jungbü shuongeibü hau ngei leilutikulabü,

³⁶hoba müh kaophei lei ka ngei Elam thükto yei den lei sungbalabü; hoba ngei haoen khübü yei den lei pendou aeto aatilabü, hoba Elambü langsenbü to ohaubü phang che ongkei akiteilabü.

³⁷Haoeneibü dangbou thedanga hoba aoyouei haoeneibü langkei lamda haoen thedanga ngei Elam moktilabü. Ngeibü kaangbüsekbü khauang longbüa ngei Elambü thükto leilubü sungbalabü, hoba ngei haoen khümbomeiko ashemti shongko ngei haoen khulimbo lakoubü shuong hautilabü, dogo BUNYUBOUei lauda.

³⁸Hobaje ngei Elambüeibü Choba shuong hoba konglebü shuong mautilabü hoba khünei ngeibü Choba setshang huongenlabü, dogo BUNYUBOUei lauda.

³⁹Lausikei phailama ngei Elambüeibü thu nyibou naang maitilabü,” dogo BUNYUBOUei lauda.