Read Chang Naga JEREMIA 5 Bible Online

JEREMIA 5 - Chang Naga bible

JEREMIA 5

¹“Kanei Jerusalem khongnyu sünga langeiashi, hoba tou chühashi hoba ngeashi, hoba khünei hopabü kaoena kanei tükdebü kümbü hoba ngühmai lambü müt che hapla si ühüplaje lamashi, hoba ngei ho sangnyu la amai apbulabü.

²Hobaje haoenei, ‘BUNYUBOU lang kishongko,’ dogo lauasikei, maimai haoenei amlang thedalanda.”

³O BUNYUBOU, kaibü nyek ngühmai thüka kida aying lo? Nyi haoen to ngümbei, lausikei haoenei aüh alau; nyi haoen mautikei lausikei haoen maang asangngai. Haoenei haoeneibü thenyek laang tokei kaangbou yeitikei, hoba haoen sepeinyu telongaikho lauda.

⁴Kheijinei ngei laukei, “Maimaitham habü ho shalebü ki, haoen ngoubüloubü ki; aishanga haoenei BUNYUBOUeibü lamnyu, ayingsi haoeneibü Mühghaüeibü matjem angekei.

⁵Hibü ngo khuleibü shuong jungto haulabü hoba haoen to joyolabü, aishanga haoenei BUNYUBOUeibü lamnyu, hoba haoeneibü Mühghaüeibü matjem ngeakei.” Lausikei habü hoei maangpon che la lean buleng leilua hoba khübü phentheda.

⁶Hibü yam ka molosaonyu cheei haoen haitilabü hoba phetsen kao kabü sho cheei haoen jitnyinlabü, kongkhü cheei haka longbü shuong mütpem weko netla yeiko jitnyinla shanga haoeneibü sangnyu nyangko thoan kilabü; aishanga haoen ngühkhüm lulimbü hoba phaisukbü juongseba.

⁷“Ngei ka la lai shedbü apbuenla? Kaibü shousi shuongei ngo inletkei hoba ai mühghaü shuong aying khübüei theyolanyokei; ladang ngei haoen shishenko pangteikei haoenei asangalanbü jungeikei, hoba haoen lolo tan tan asangalan sao shuong chema yoshaikei.

⁸Haoen shausiyung maibüei pangteibü koli shuong tegü mütpem wekoei jembü lepboueibü yakla koli tegü wikukei.

⁹Khübü shanga ngei haoen ashiakoelep lo? Hobaje kho tegübü phang to ngei phok alamlep lo?” dogo BUNYUBOUei lauda.

¹⁰“Kan saoeibü semlühlaak khüto angashi hoba leilutiashi; lausikei khümbomeikoje teleiluku. Saoeibü bhek shuong sunglangashi, aishanga haoen BUNYUBOUeibü aying.

¹¹Aishanga Israel mütli hoba Jihuda mütliei ngo khulimbo khüpbolangko jungeia,” dogo BUNYUBOUei lauda.

¹²Haoenei BUNYUBOU athelet hoba laukei, “Haoei aikei akümbülabü! Kün thükto amaibü ai aloulabü; ayingsi künei in ayingsi limsilang akühshoklabü.

¹³Hobaje thuseibü shuong kia lausikei yei ong hoba ngühmai haoen to aki; kho tegü haoen to kümlabü.”

¹⁴Hibü BUNYUBOU Thükenbou Mühghaüei hai lauda, “Mütshuongei habü ngüh angdabü, chühashi, ngei ngeibü ngüh shuong kaibü sembunga wan yeitilabü, hoba ho mütli shuong bu la yeitilabü hoba wan khoei haoen suilabü.

¹⁵“Chühashi, O Israel chemdang, kan thükto saabü ka phang che sungbalabü,” dogo BUNYUBOUei lauda, kho phang hau yaangbü, kho shangiedbü phang che laobou ngühyem nyi ange, ayingsi haoenei ai lauda nyi aditenda.

¹⁶Haoeneibü laujin phot kho ipan kibü hee ki; haoen hau kibü mütshuong ki.

¹⁷Hobaje haoenei nyi latbü youshou shauan apbulabü, laobou nou- yang jayangshousiei shaula kiteikei; haoenei kaibü sanlon si masu shuong shaukulabü. Haoenei kaibü semlüh si bhuk shaukulabü, hoba ba lean kibü sangnyu shuong laobou to nyi maanglemda, khübü kho haoenei inei wapshemkulabü.

¹⁸“Lausikei khübü chalouakei ngei no khümbothamje temautikho, dogo BUNYUBOUei lauda.

¹⁹Hobaje ladang kan mütliei, ‘Aila BUNYUBOU seneibü Mühghaüei sen to ho pendou jungeikei,’ dogo laulaje, kheijinei nyi haoen to laushi, ‘Kanei ngo inletbü tegü hoba kaneibü kaodaka küksithang mühghaü khangenbü tegü kanei küksithang kaodaka lubü khangenlabü.’ ”

²⁰“Jakob chemdang to kanei ho phinthonashi, hoba Jihudaa kho ngekletkuashi:

²¹Ho ditashi, O ngoubü shuong hoba ai aditenbü mütshuong; kan nyekkhün yetakei, lausikei ühüpda; kan nou yemakei lausikei aditda.

²²BUNYUBOUei lauda: Kanei kü to ühütda lo? Kan kü junga alühda si? Yungnyu shanga leilang ngei phetsen phokukei, ladangkei danjung alouenlabü lele thangetlabü che; deishou shuongei onshaisikei haoenei athüklabü, haoen ngühsikei haoenei kho danjung ohaulabü.

²³Lausikei ho mütli ngüm kaangbü hoba khulimbo lobü; haoen khulimbo meimeikei hoba khüpeinyu ngaia.

²⁴Haoenei haoeneibü maangpona ho alauda: BUNYUBOU seneibü Mühghaü to senei hatakho kaiya, aoei jembü poang hongjiha lang yantida, youshap lang hoba phaibou lang; aoei senla youlat jih takletan phokuda.

²⁵Kaneibü shedbü shabüei khübü shian sattia; hoba kaneibü shabüei kan ka maibü seneda.

²⁶“Aishanga ngeibü mütli yoa müt amaibü hapda; au sanbüei huan thobü tegü haoenei thoan haiteida, haoenei sung sanda, haoenei müt lapda.

²⁷Auei shen- an kibü kam tegü, khüpbülangbüei haoeneibü chem shenakei, hibü haoen yaangbü hoba keibü la yeia.

²⁸Haoen netda, thesak angakei, haü, amaibü kümaleia haoen aoeikei athükda, haoenei shoujit shuongeibü pü alekuda; khei haoen naangmaila atonenda hoba shalebüeibü janbü kümsilei shanga haoen alokuda.

²⁹“Khübü shanga ngei ashi- akoelep lo? dogo BUNYUBOUei lauda; kho tegübü phang to ngei phok alamlep lo?

³⁰Maangpanglabü kümsilei che hoba hatla moklabü kaonyeka haüthükakei.

³¹Thuseibü shuongei amlang tetenda, hoba ungshedbou shuongei haoenei maangangbüei songdakda, hoba ngeibü mütli shuongei kho tegü kilakeila maikuda. Lausikei thonlama kanei ai kümla?