Read Chang Naga JEREMIA 50 Bible Online

JEREMIA 50 - Chang Naga bible

JEREMIA 50

¹Babilon shangabü hoba Khaldi kaodak shangabü thuseibou Jeremia danko joyobü ngüh:

²“Phang shuong la ngetiashi! Ho phinthonashi! Shensinge phoashi hoba phinthonashi! Kho huan tepho! Babilon shian apa! Bel himou baua; saoeibü mühghaü Marduk phenyemakei; Saoeibü heangsho shuong netlaphoula yeia!

³“Yungkük aeka sao khulimbo louan shilabü hoba saoeibü kaodak sangliphang la yeitilabü. Khonei ao akilabü; müt si meisiau ham laangjung satkhümlabü.”

⁴BUNYUBOUei lauda, “Khübü chaloua, hoba kho jihaphaia Israel mütli si Jihuda mütli shuong haoen liko haapyoko loulabü, hoba haoenei BUNYUBOU haoeneibü Mühghaü lamlabü;

⁵haoeneibü thenyek Zion aeto sepeian khüto haulabü lamnyu pheko laulabü. Haoen louan BUNYUBOU to ladangkei aleilulabü thebülanbü kümbo haoen lolo thangjamlabü.

⁶“Ngeibü mütli shuong maubü san la leko, haoeneibü sanlombü shuongei haoen ayinglamto aatibü hoba shongh aeto lintibü sanshuong phatkei. Haoen shonghnyu hoba shonghshoua shoong- aikei hoba haoeneibü kishang maan apbei.

⁷Haoen hapbü pendouei haoen taketkei; hoba haoeneibü dangbou shuongei laukei, ‘Kün shedbü aying, aishanga haoenei haoeneibü BUNYUBOU, haoeneibü tükdebü lamshaushang, hoba haoeneibü pisiboueibü maanglemshang BUNYUBOU khulimbo shabü shonkei.’

⁸“Israelbü shuong, Babilon ka satashi! Khaldi kaodak apyoashi! Sanshuong leibou lonpaang tegü kishi.

⁹Aishanga chühashi, yungkük kaodak aeka ngei phangshuong tan yaangbü Babilon khulimbo huishaiko leibada. Haoenei sao khulimbo haoen lolo lason lolabü, hoba yungkük aeka sao shian aplabü. Haoeneibü lau kho ik kong alongeibü sonenbü meikipbü che phatko ki.

¹⁰Khaldi shilabü, sao shibü pendou senyüh shemlabü, dogo BUNYUBOUei lauda.”

¹¹BUNYUBOUei lauda, “Babilonbü shuong, kanei ngeibü phangshuong solangkei. Kan youshou naktibü masu saoen phatko kaida hoba woiyobü koli paang phatko olinyoda hoba olinangko lemlem- yoda,

¹²lausikei kaneibü nyu kaang himoulabü; hoba no bukbü sao himou baulabü. Ditashi, Babilon kho phangshuong yoa pendou to manseibou, kaolin hoba sangliphang kho sao yinglabü.

¹³Aishanga BUNYUBOUeibü khau- ang maangpok haangjung sao to müt akilabü, lausikei khümbo sangliphang la yeilabü. Babilon nyangko danbü shuong pendou maangpanglabü hoba saoeibü akbülebü moukhün to nyikulabü.

¹⁴“Kan lolo Babilon khulimbo limchühko kaijembo loashi. Kan lau jungbü pendouei sao to kipashi, laujin tejouti, aieilausi saoei BUNYUBOU khulimbo shabü shona.

¹⁵Sangnyu kaijembo lapang uihinashi! Touje Babilonei litian apa, saoeibü lapheishon tuonga, saoeibü kümthang shuong noptheda. Aishanga ho BUNYUBOUeibü phoklambü ki, sao to phok lamashi; sao to saoei kümbü muthüng jungeiashi.

¹⁶Babilon ka youli wenbou kho hoba youlat jiha langku jungbü shuong wapan apashi. Shieikoebü in to hatbü ka mütpem weko jembü mütli jungto sepeilabü hoba mütpem weko jembü kaodak to ngailabü.”

¹⁷BUNYUBOUei lauda, “Israelbü kho molosaonyuei shian sattiko aatibü sanshuong phatko ki. Shaangla Assiriabü Chobaei sao suikei hoba tou phailathonla Babilonbü Chobaei saoeibü lo shuong nyainyinkua.

¹⁸Hibü Thükenbou BUNYUBOU Israel Mühghaüei hai lauda: Chühashi, ngei Assiriabü Choba shieikoebü tegü Babilon Choba Nebukhadnezzar hoba hao kaodak thükto ngei shieikoe sungbalabü.

¹⁹Ngei Israel nyibou saoeibü lamshaushang to leian loulabü, hoba saoei Garmel shongh si Bashan kao- pheia lamshaulabü; hoba Efraim si Gilead shongh kaopheia yembü kesiongei saoeibü maangdak senyüh shemlabü.

²⁰Khübü chaloua hoba kho jihsiphaia, Israeleibü shedbü lamlabü lausikei aikei akilabü, hoba Jihudaeibü shabü lamlabü, lausikei aikei ühüplabü; aishanga ngei apyobü jouletbü shuong la ngei ap kulabü.”

²¹BUNYUBOUei lauda, “Merathaim kaodak hoba Pekod kaodak khulimbo angan shiashi. Shiashi, haitiashi hoba lemailela shemtiashi. Ngei kan la sakkubü khümbo kümashi.

²²Kaonyua lason ngühlang kia, hoba leilubü yaang!

²³Kaodak khümbo ngümnyinbou lai netla yeitian ki! Phangshuong yoa Babilon lai hatla moklabü che leiluan ki!

²⁴O Babilon, ngei ka la sung sankukei hoba nyi kho alapentoua no khonei minkei; aieilausi nyi BUNYUBOU khulimbo lokei.

²⁵BUNYUBOUei haoeibü insiaubu phoshang ipbei hoba haoeibü maangshat insiaubu sungenkei; aishanga Khaldibü kaodaka Thükenbou BUNYUBOU Mühghaüei kümlabü kümsilei che kia.

²⁶Kaonyek lei weko ka sao khulimbo kaiya. Saoeibü bung shuong khoknyinashi; sao youshou thanan phobü phatko shomentiashi! Sao khümbomeiko mautiashi hoba sao la ai tejouti!

²⁷Saoeibü masu pongsu pendou haitiashi; haoen haitishang to hautiashi! Haoen shanga ügütü! Aishanga haoen shieikoelabü chalou jihsi- phai lousüha!”

²⁸(Ditashi, satetlangbü shuong Babilon ka Zion to loua, hoba haoenei Babilonbüei haoeibü Lembüchem khulimbo kümbü shanga seneibü BUNYUBOU Mühghaüei phoklambü shangabü lenyoda.)

²⁹“Babilon khulimbo lau jungbü pendou huishaiashi. Sao kaijembo louan thoashi; aokei tesatenti. Saoeibü kümsilei thüng sao la ngaitikuashi; saoei kümbü pendou thüng sao to jungeishi. Aishanga saoei Israel Saopobou BUNYUBOU khulimbo liliseseko küma.

³⁰Hibü saoeibü heshou shuong khongjia tuonglabü; hoba saoeibü sepai shuong pendou khünyet shemtilabü, dogo BUNYUBOUei lauda.

³¹“Chühashi, ngo kakhu limbo kia, O lilinyu Babilon; aishanga ngei no shieikoelabü jihsiphai lousüha, dogo Thükenbou BUNYUBOU Mühghaüei lauda.

³²Lilinyu kho sao phonla ao akiko phaiyetlabü hoba tuonglabü; saoeibü sangnyu kaijembo kibü shuonga ngei wan sapbulabü hoba khoei sao kaijembo kibü pendou lonlabü.”

³³Thükenbou BUNYUBOUei hai lauda, “Israelbü mütli hoba haoen yoa Jihudabü mütli shieikoea. Haoen laplangbü shuong pendouei haoen kaangkhühtham hatlepakei hoba haoen alitida.

³⁴Lausikei haoen Angthetbou to hau kia; haoeibü nyen kho Thükenbou BUNYUBOU ki. Haoei haoen kaodak la hakso kula haoen shanga lokulabü lausikei Babilona kibü shuonglaje khonsak kulabü.”

³⁵BUNYUBOUei lauda, “Khaldibü thükto haibümaubü! Babilona kibü shuong thükto haibümaubü, hoba haoeibü songdakbü shuong si haoeibü songbüdobü mütshuong thükto in che!

³⁶Amlangbü thuseibü shuong thükto in che, haoen ngoubüla yeitilabü! Sekbülakbü shuong thükto in che, hoba haoen mautila in che!

³⁷Saoeibü koli si kailong shuong leilutiashi! Haoen yoa küksithang sepai tan thükto in che, haoen yaksa yeitilabü. Saoeibü nyaksinam thanshang khulimbo in che! Khübü kho solanglabü.

³⁸Saoeibü dei thükto shulin yunglin che, haoen ulangtham yeilabü. Aishanga ho heangsho juong kibü kaodak che ki, hoba lembüsabü heangsho thüka langet angko kia.

³⁹“Hibü yamkabü meisiau shuong hoba selong shuong Babilona kilabü, hoba ostrik shuong khünei thünglabü. Touje hao to ladangkei müt akilabü, ayingsi meten meten ao akilabü.

⁴⁰Mühghaüei Sodom si Gomora hoba haoen nyangkobü sangnyu shuong khüpan apbü tegütham khei ao akilabü hoba khunakshousi aokei athünglabü, dogo BUNYUBOUei lauda.

⁴¹“Chühashi, yungkük aeka mütli che louada, hau kibü hoba saabü kabü phangyaang; hoba Choba juongnyu lason shanga huishaiakei.

⁴²Haoenei lau hoba insiaubu hatlepakei; haoen to phokei hoba üeisanou aki. Haoeneibü ngühlang kho yungnyu ngühbü phatkei, haoen koli thüka setda. Lason shanga haoen bousu che tegü kakhu limbo lamleakei, O Babilon Nouyangshou!

⁴³Babilonbü Chobaei haoen shangabü ngühlang ditkei, hoba haoeibü ik nyibutham apbei. Yaksa na hapla khonkubü phatko hao to khonkuei sühkei.

⁴⁴“Chühashi, Jordan lamang ka nyemsang san lambo molosaonyu che loushadbü phatko ngo anglabü, hoba ngei Babilon mangde ong haoeneibü kaonyek ka shian sattilabü. Kheijinei ngei ao pienlaje haoei kaonyek thüka songdaklabü. Kü to ao takteiyola? Kü to ao sheiyola? Hobaje ao sanlombouei kü khu limbo lola?

⁴⁵Hibü BUNYUBOUei Babilon khulimbo hoba Khaldi kaodak khulimbo ai takletan phokukei kho ditashi: Haoeneibü sanlon shoushou mangkei senlanglabü; haoen laüa haoei haoeneibü lamshaushang khümbomeiko mautilabü.

⁴⁶Babilon shian apbü langhei kaonyu nyaakeilabü; haoenei ngekbü Saklangbü Yungnyua ditlabü.”