Read Chang Naga JEREMIA 51 Bible Online

JEREMIA 51 - Chang Naga bible

JEREMIA 51

¹BUNYUBOUei hai lauda, “Chühashi, Babilon khulimbo, Khaldia kibü shuong khulimbo mautibü soushou che pühnyintilabü.

²Hobaje ngei küksithang shuong Babilon khulimbo saoeibü kaonyek sipan apla hautilabü; hoba kho maubü thu lousühnyet jiji pendou aeka haoenei sao shilabü hoba aikei üpyolabü.

³Lau jungbü shuong la jembü lau tebühti, ayingsi haoeibü nameibü hele teleti. Saoeibü heshou shuong jouan tephoku; saoeibü sepai tan lemailela shemtishi.

⁴Babilona haoen leiluan tuonglabü hoba saoeibü sangnyu khonga haian yeplabü.

⁵Aishanga Israel Saopobou thedanga haoeneibü kaonyu shedbüei shenan kiasikei, Israel si Jihuda, Thükenbou BUNYUBOU, haoeneibü Mühghaüei inletan aki.

⁶Babilon ka satashi! Kaneibü langkei khümenla langashi! Saoeibü shabü laüa kan temauma. Ho BUNYUBOU phoklambü jihsiphai ki; haoei sao la saoei mubü kungailabü.

⁷BUNYUBOUeibü ika Babilon kho kaodak pendou jaaktibü honeibü thung che phatko kikei. Phangshuongei saoeibü ih yungkei, hibü phangshuong langet angda.

⁸Babilon hakde tuongkei hoba leilua! Sao shanga manghaapashi! Saoeibü moukhün mailabü moli leashi; aingenyu sao mailakei thükkei.

⁹Khünei kibü küksithang shuongei laukei, ‘Künei sao maitimang sühkei, lausikei sao amaitien. Senei sao apyoakho, hoba jembü kaodak to ngaiakho. Mühghaüei haoeibü hau pendouei Babilon shieikoea, aishanga saoeibü leilubü matjemei müh süha.’ ”

¹⁰BUNYUBOUei lauda, “Kü mütliei hai ngekda, ‘BUNYUBOUei seneibü ngühmaia yingkua. Kaiya, senei Ziona BUNYUBOU seneibü Mühghaüei kümbü ngetiakho.’ ”

¹¹“Laujin shuong simashi! Aih shuong jungashi! BUNYUBOUei Mediabü Choba shuong maang- pon pühnyintikua; aieilausi Babilon mautikula shanga haoeibü lamthen ki. BUNYUBOUei haoeibü Lembüchem leilutibü shanga phoklambü ki!

¹²Babilonbü laang ba naklepbo shensinge che phoashi! Lombüshuong hau kingaitiashi, lapheibü phoashi, latho kümashi!” BUNYUBOUei Babilonbü shuong khulimbo ai kümlep laukei, haoei kho küma.

¹³O kan dei juong nyangko kibü hoba nyaksinama keibü shuong, kaibü thonbü süha, kaibü langkei lüh thettia.

¹⁴Thükenbou BUNYUBOUei haoeibü langkeiei thealana, maimaitham koksüng tegü juongbü mütei Babilon shentilabü, hoba kan thükto haoenei thük hapbü uihinlabü.

¹⁵BUNYUBOUei jembü hauei kaodak kümbei; haoeibü songsihonei haoei kaodak yaükei hoba haoeibü ditenbüei müh pintikei.

¹⁶Hao ngühkhümei mühkabü dei shuong ngühda; hoba haoei kaodak ji thon ka sangmei sungbada. Lang shanga haoei langpon pontida hoba haoeibü thanshang ka yei loutida.

¹⁷Mütpem weko ngoubü hoba hapsinge songsido aki; namyaübü weko jembüeibü heangshoei himou bautida, aieilausi haoeibü mühghaü shuong kho amlangbü ki, hoba haoen to langkei hak aki.

¹⁸Haoen jim aki, nyikulabü peisilei che; haoeneibü kayang chaloua haoen maulabü.

¹⁹Ao Jakob Mühghaü ki haoje khübü tegü aying, aishanga ajanjan pendou Kümbou kho hao ki, hoba Israel kho haoeibü phetphanbü phang la lela piena. Haoeibü nyen kho Thükenbou BUNYUBOU ki.

²⁰BUNYUBOUei lauda, “Babilon, no ngeibü bungümjin hoba wapyobü insiaubu ki. Ka yoa phangshuong netla yeiko jangnyinla, sangle shuong netla yeiko mautila,

²¹koli si hao thüka setbü shuong netla yeitila, koli kailong si leibü shuong netla yeitila,

²²bousu si yaksa netla yeitila, baushi si mütao haitila,

²³lombüshuong si haoeibü sanshuong haitila, sekmoubü shuong si haoeneibü sekshapbü masu haitila, governor shuong si yaangenbü shuong netla yeitila ngei no jungeikei.”

²⁴BUNYUBOUei lauda, “Babilon hoba Khaldia kibü shuong, kaneibü theatham haoenei Ziona amaibü kümbü pendou shanga ngei shemngailabü.

²⁵Chühashi, Babilon, no kaodak khümbo mautibou shonghnyu che phatko ki; lausikei ngo BUNYUBOU kaibü dangbou ki. Ngei kakhu limbo ik shinglabü, hoba kao to senyanlabü, hoba ngei no tapshongh che la yeitilabü.

²⁶Ka ka chemnyek shanga laang hoba chemshang shanga laang aikei asunglabü, aishanga no ponpen shanga sangliphang che kilabü, dogo BUNYUBOUei lauda.

²⁷“Kaonyua shensinge che tonenashi! Phangshuong yoa teklaang metashi! Sao khulimbo lason wapyola phangshuong lamleashi; sao khulimbo habü sangnyu shuong tensepashi: Ararat, Mini hoba Ashkenaz. Sao shila lajamleibü che pienashi. Koksüng tan phatko koli shuong lamleashi.

²⁸Babilon khulimbo phangshuong wapyola lamleashi. Mediabü Choba shuong si haoeneibü governor shuong hoba songdakbü shuong; hoba haoeneibü songdak sangle phangkabü kaonyek shuong pendou lamleashi.

²⁹Kaodak lühda, hoba nyaakda, aishanga Babilon kaodaka müt aokei akiko sangliphang la yeitilabü lele BUNYUBOUeibü takletbü kümthen loakei.

³⁰Babilonbü sekbülakbü shuong wapyobü nanga; haoen lulueibü lapheishona kia. Haoen maang ayaangenko apa; haoen yaksa tegü yeia. Saoeibü sangnyu bakhün thangtet leilua hoba saoeibü chemsibunga wan anga.

³¹Babilonbü Choba to, sangnyu jiji pendou aenei lean apa dogo lenla lapang ngühlang künan cheei che to haüyoko laangyoda.

³²Shumang danshang phaishang dangbouei sunga hoba lapheishona wanei lona, hoba sepai shuong panglangyoda.

³³Aishanga Thükenbou BUNYUBOU, Israel Mühghaüei hai lauda, Babilon Nouyangnyu kho youshou nakbü chaloua amshang phatko ki; lalok akiko sao youlatbü jih sühlabü.”

³⁴Babilon Choba Nebukhadnezzarei Jerusalem suia, hoba haoei ngo shauan apa. Haoei sangnyu kho ilechak tegü kongenbü la yeitia; haoei dragon cheei tegü suian apa. Haoei jembüei mühbü tegü shaua, hoba haoei joubü ngaitian apbei.

³⁵Zion mütshuongei hai laushi, “Kün to amaiko ik shatbü shanga Babilonbü thükto yingshi!” Jerusalem mütshuongei hai laushi, “Kün khonkutibü shanga küneibü sii Khaldibü shuong thükto yingshi!”

³⁶Hibü, BUNYUBOUei hai lauda, “Chühashi, ngei kan shanga pü lelabü, hoba kan shanga phok lamlabü. Ngei Babilonbüeibü deikük utilabü hoba saoeibü shumang shuong ulangtham aptikulabü.

³⁷Hobaje Babilon leilubü laangshaang selong shuong thüngshang che yeilabü. Ho müt akibü mokde apyolabü hoba akhainyu kaoen che kilabü.

³⁸Babilonbü shuong pendou molosaonyu tegü ngühyoda hoba molosaonyu shoushou tegü haoen wiyoda.

³⁹Haoen sei longbü jiha ngei haoen la lem che lamlekulabü hoba haoen haian üpshongko haoen jaakan yeptilabü hoba ladangkei alakseptilabü.

⁴⁰Ngei haoen haitishang to leian haubü sanlon shoushou, lon hoba sanlon paang phatko leian yanlabü, dogo BUNYUBOUei lauda.”

⁴¹BUNYUBOUei Babilon shangabü lauda: “Kaonyudak pendouei nyen sangbü ailai shian apbei! Phangshuong thedanga Babilon ailai mokde apyolabü che yeian ki!

⁴²Babilonbü thükto yungnyu nguiakei hoba kho deinyu yungsen ngühbüei sao küplepan ki.

⁴³Saoeibü sangnyu shuong hatla moklabü che ki, uangmuang hoba sangliphang kaodak che la yeiakei, aokei akibü kaodak, müteibü shou adanbü kaodak che yeian ki.

⁴⁴Hobaje ngei Babilona Bel shieikoelabü hoba haoei ai suikei kho haoeibü sanglou ka sungenlabü. Touje phangshuong hao jungto yangjung ohaulabü. “Babilonbü kümthang tuongakei.

⁴⁵Ngeibü mütli shuong, hao ka longashi! Kaneibü langkei khümenla laangashi! BUNYUBOUeibü khauang maangpok ka satenla laangashi.

⁴⁶Ladang kaonyua ngühphakphak ditlaje kheijinei kaneibü maangpon tekou ayingsi hatko teki; toupo ngühphakphak che hoba ngiempo ngühphakphak che dogo songdakbü cheei songdakbü che khulimbo kaonyua leilubü kilabü.

⁴⁷Hibü chühashi, ngei Babiloneibü heangsho shuong shieikoelabü jihsiphai louada; saoeibü kaonyu khümbo himou baulabü hoba saoeibü tuongbü mangjimei shenlabü.

⁴⁸Kheijinei müh si kao hoba haoen to kibü pendouei Babilon thükto olinbüei ngeklabü, aishanga yungkük ka mautibü shuong louan sao shilabü, dogo BUNYUBOUei lauda.

⁴⁹Kaodak pendou haitibü haangjung Babilon tuongbü tegü, Israel haitibü hangshong Babilon tuongjan.”

⁵⁰BUNYUBOUei Babilona kibü hao mütshuong to laukei, “Kan in ka satenbü shuong hali satashi! Maang teyaang! Saabüa kiasikei BUNYUBOU damenashi, hoba kaneibü maangpon to Jerusalem lottiashi.

⁵¹Kanei lauda, ‘Kün himou bautia, aishanga künei hakbü dida; himouei küneibü thenyek küplepbua, aieilausi küksithangei BUNYUBOUeibü Lembüchem kiman apa.’

⁵²Hibü chühashi, BUNYUBOUei lauda, saoeibü heangsho shuong thükto ngei mat jemlabü chalou shuong louada, hoba saoeibü kaonyek khümboa leilu leilubü shuong ngühko wiyolabü.

⁵³Babilon müha jakko angasikei, hoba saoeibü kaangbüsekbü lapheishon sheasikei ngei sao khulimbo mautibü shuong hautikulabü, dogo BUNYUBOUei lauda.”

⁵⁴BUNYUBOUei lauda, “Ditashi, Babilon ka lemenbü! Khaldibü kaodak ka maubü yaang longbü ngühlang!

⁵⁵BUNYUBOUei Babilon leilutida! Haoei saoeibü lemen langh thaktikuda. Sepai tan dei juong ngühbü langh phatko louada, hoba phangyoko sao shilabü.

⁵⁶Haoen Babilonbü khulimbo louakei; saoeibü sekbülakbü shuong lean apa, hoba haoeneibü lau netla yeia. Aishanga BUNYUBOU kho shemngaibü Mühghaü che ki, haoei Babilon la saoei mubü kungailabü.

⁵⁷Saoeibü leiyeibü shuong, songbüdobü shuong, governor shuong, saoeibü lajamleibü shuong hoba saoeibü lakjaibü shuong jaaktilabü. Hobaje haoen ladangkei alaksepbo yeptilabü, dogo Choba, aoeibü nyen Thükenbou BUNYUBOU ki, haoei lauda.

⁵⁸Babilonbüeibü kaangbüsekbü kümthang kao hima yeitilabü, hoba saoeibü suokbü bakhün shuong wanei lonlabü. phangshuongeibü kümsilei kho jim akibü; haoen thungyobü kho wanlüh shanga ong ki.”

⁵⁹Zedekia Chobaeibü ikjaibou Seraia kho Neriaeibü shou hoba Maseiaeibü shi kiteikei. Jihuda Choba Zedekia songdak po leiboubüa Seraia hao yoa Babilon to hauko kikei hoba Jeremiaei hao la ho ngühlang kukei.

⁶⁰Babilonbü to habü amaibü pendou loushedla doan kibü khübü ngüh shuong pendou Babilon shangabü Jeremiaei le chenei dokei.

⁶¹Hobaje Jeremiaei Seraia to laukei, “Ladang no Babilon to atlaje nyi habü ngüh pendou kaangko weashi.

⁶²Hobaje welau- ashi, ‘O BUNYUBOU, nyi ho kaonyek wapan aplabü, hoba khünei aikei akilabü, khei müt yingsikei hoba meisiau yingsikei, hoba ho ponpendou sangliphanga kilabü, dogo nyi laua.’

⁶³Ladang nyi ho le wekhümlaje khünei laang che khühashi, hoba Eufrates Shumang to tekan attishi.

⁶⁴Hobaje lauashi, ‘Babilon to hai haüthüklabü, aieilausi BUNYUBOUei hao thükto sungbala kibü leilubü thushed danko ho ladangkei alongeilabü lele maangto shemjung atlabü.’ ” Jeremiaeibü ngühshuong hanei thonda.