Read Chang Naga JEREMIA 52 Bible Online

JEREMIA 52 - Chang Naga bible

JEREMIA 52

¹Zedekia Choba yeijinei hao salangbü po saoto che kikei hoba Jerusalema haoei po anthük che songdakkei. Hao nyu kho Libnabü Jeremiaeibü nouyangshou Hamutal nyenbü kikei.

²Hobaje Zedekiaei Jehoiakimei kümbü tegü BUNYUBOU thedanga ai amaibü ki kho pendou kümbei.

³Maimaitham BUNYUBOU khau angbü haangjung Jerusalem si Jihudaa hai haüthüklabü yeian khei haoei hao thedang ka haoen nangan apbei. Hobaje Zedekiaei Babilonbü Choba Nebukhadnezzar khulimbo meimeikei.

⁴Hobaje haoei songdakbü po gü boubü lit anboubü chalou anbounyet Babilonbü Choba Nebukhadnezzar haoeibü sepai tan pendou yoa Jerusalem khulimbo loukei, hoba haoenei kho komlepbei hoba kho kaijembo lapheishon shekei.

⁵Kho tegü sangnyu kho Zedekia Choba po anthükche boubü sühko komle- pan kikei.

⁶Lit leiboubü chalou gü boubüa sangnyu khünei mühsinou aeibou kaangan yeisi kaonyeka mütshuong shanga shausiyung akitei.

⁷Kheijinei sangnyu ba kho panyetkei hoba wapyobü mütshuong pendou linkei. Khaldibü shuongei sangnyu pendou kaian kiasikei haoen nangnak sangnyu kümthang penyi kaanglanga bakhün che to Chobaeibü bamang nyangko angan shetlangkei. Hobaje haoen Araba aeto satkei.

⁸Lausikei Khaldibü sepai tanei Choba shijung haukei hoba Jerikho pholia Choba kho laphetkei hoba haoeibü sepai tan pendouei hao apyoan linkei.

⁹Kheijinei haoenei Choba kho lapbei, hoba Hamath kaodak Reblaa Babilonbü Choba jungto hao leibakei, hoba hao thükto haoei matjem kukei.

¹⁰Babilonbü Chobaei Zedekiaeibü shousi shuong hao thea haitikei hoba tokei Reblaa leiyeibü shuong pendou haitikei.

¹¹Haoei Zedekiaeibü nyek phekan apbukei, hoba hao namlühei khühkei, hoba Babilonbü Chobaei hao Babilon to leian haukei hoba hao ühai shongko thüngdanga phokei.

¹²Lit ngaoboubü chalou anbounyeta Babilon Choba Nebukhadnezzar songdak po anthükgü boubüa, Nebuzaradan, Babilon Choba lombü yoa lajamleibou Jerusalem to atkei.

¹³Hobaje haoei BUNYUBOUeibü Lembüchem, Chobaeibü chem hoba Jerusalem- a chem pendou jikan apbukei. Kongnyu shuongeibü chem pendou haoei lonshemtikei.

¹⁴Hobaje Khaldibü sepai tanei, aoyou Choba lombü lajamleibou tan yoa kikei, Jerusalem kaijembo ba pendou lusaktikukei.

¹⁵Hobaje Choba lombü lajamleibou Nebu- zaradan mütli yoa shaleboutham hoba sangnyua apyoan kibü shuong hoba ikküm ikleia libünyenbü shuong yo ka nangletbü shuong hoba aoyouei Babilon Choba jungto letjung haukei haoen dan Babilonbü Choba jungto lapjung haukei.

¹⁶Lausikei Choba lombü lajamleibü Nebuzaradanei kaonyeka kaang shalebü shuong atje semlüh sek moutila hoba sek latla shanga apyokei.

¹⁷Hobaje BUNYUBOUeibü Lembüchema kibü chisaknam thaonyu shuong hoba BUNYUBOUeibü chema kibü denshang shuong hoba chisaknam yungnyu Khaldibüei leilukukei, hoba chisaknam pendou Babilon to sunglangkei.

¹⁸Hobaje haoenei nyakchak, tap suokjin, hoba namphet kipan aplabü shuong hoba sii laklabü phauyaang shuong hoba jen juoklabü phau shuong hoba Lembü- chem kümsileia jungeibü chisaknam phau,

¹⁹hoba tokei chandinamei yaübü phau hanbü shuong hoba wankak suokjin phau, hoba sii laklabü phauyaang shuong hoba chak shuong hoba wanthung denshang shuong hoba yunglabü lembü kulabü phau, khübü peisilei khümbo Chobaeibü lombou lajamleibouei künlangkei.

²⁰Thaonyu penyi kabü chisaknamei yaübü kailong, yungnyu yaangbou, yungnyu phanga kibü masu pongsu anthüknyi hoba kho juetla kümbü denshang shuong, laobou Solomon Chobaei BUNYUBOUeibü Lembüchem shanga kümbei, khübü chisaknamei kümbü peisilei pendou seret takan chühla athüklabü lele kikei.

²¹Thaonyu kho suokla iknop anthükset bang kikei, kaijembo iknop anthüknyi bang; hoba kho shangla ikpit lei bang hoba kho maang kuokan kikei.

²²Khonei chisaknam thaonyu sembung yeman kikei; thaonyu sembung che kho iknop ngao suokbü kikei, hoba thaonyu sembung kaijembo chilangei pepyobü küman chinamei yaüan kikei; hoba nyiboubü thaonyu khokei, kho tegütham ong chilangei küman kikei.

²³Thükaenei chilang hek pendouei saongao bang kikei hoba khüka anjinngaoto lak khoje kao ka hapbo kikei.

²⁴Hobaje Choba lombü lajamleibou Nebuzaradanei thükkabou ungshedbou Seraia, hoba thenkabou ungshedbou Zefania, hoba koukhün lombü müt sem laplangkei.

²⁵Hobaje sangnyu ka haoei wapyobü mütshuong leiyeibü che, hoba sangnyu ka asatko kiteibü Chobaeibü meitangbou müt nyet lapbei, hoba sepai tan thüka lajamleibou thenkabou hoba kaonyeka mütli huishaian phobou, hoba sangnyua hapbü kaonyek kabü mütli shuong yokabü müt saosem lapbei.

²⁶Hobaje lombü thüka lajamleibou Nebuzaradanei haoen lapbei hoba haoen Reblaa Babilon Choba jungto sungbakei.

²⁷Hobaje Babilonbü Chobaei haoen to ngümbei hoba Hamath kaonyek Reblaa haoen haitikei. Kho tegü Jihudabü jembü kaodak ka langsenkei.

²⁸Nebukhadnez- zarei lapjung haubü lühbak ho ki: po nyet boubüa Jihudabü hajar sem to saoto sem.

²⁹Nebukhadnezzar po anthükset boubüa haoei Jerusalem ka müt saongao setto khujinto nyi.

³⁰Po saoto semboubüa Choba lombü lajamleibou Nebuzaradanei Jihudabü saongao nyetto saonyito ngao. Müt pendouei hajar leito saongao lak kikei.

³¹Jihudabü Choba Jehoiakhin laplangbü po khujinto nyet boubüa, lit anthüknyi boubüa, hoba chalou saoto ngaobounyet, Evil-Merodakh Babilon Choba yeibü poa Jihudabü Choba Jehoiakhin to onou lenkei hoba thüngshang ka sungenkei.

³²Hobaje haoei hao to huphanga joyokei, hoba Babilona hao yoa kibü Choba shuong setshang thüka thükkabou younak che hao la kukei.

³³Hibü Jehoiakhinei haoei thüngshanga lebü neisimei hangletkei; hoba salang sünga chalou angboua Chobaeibü khümsoka shaukei yungkei.

³⁴Haoeibü munam shanga hao hainyet sühko haoeibü salang sünga hao chalou angbou khambü thüng Chobaei hao la ponpen thuibü kukei.