Read Chang Naga JEREMIA 6 Bible Online

JEREMIA 6 - Chang Naga bible

JEREMIA 6

¹“Satenla shanga Jerusalem ka satashi, kan Benjamineibü shousi shuong, hoba Tekoaa teklaang metashi, hoba Beth- hakherem thüka nisan phoashi; aishanga yungthang phei ka khonsak yuklepjung khei leilubü yaang lotda.

²Hemai saomai omlang Zion nouyangnyu ngei wapan aplabü.

³Sao jungto sanlombü shuong jembü sanshuong yoa sao khulimbo loulabü; sao kaijembo haoenei jembü neichem shuong danglabü; hoba haoen wekoei jembü kishanga lamshaulabü.

⁴Kanei sao khulimbo wapyola lamleashi! Meimeiashi, hoba sen sao khulimbo chajihboua angkho! Lausikei sen shanga ügütü, aieilausi change nepda, hoba chasembü mangh lounyu yeida.

⁵Meimeiashi, sen nangnak angkho hoba saoeibü lapheishon shuong senei leilukukho!”

⁶Aishanga Thükenbou BUNYUBOUei lauda, “Bulong shuong akashi, hoba Jerusalem khulimbo shon sheashi. Ho sangnyu shieikoejan; ho shoeinakeilabüei shenakei.

⁷Deikük ka dei longbü tegütham saoei amaibü longtida. Sao to kaangbüsekbü hoba soshau soyungbü ngühlang ditda; kü thedanga athakko shatbü hoba moukhün shuong kia.

⁸O Jerusalem, ngo kan ka lubü to kukjung satakei, ngei no sangliphang müt akibü kaodak che yeitiakei.”

⁹Thükenbou BUNYUBOUei hai lauda, “Israelbü jouletbü semlüh li tegü haoenei maisho saüenlabü; kama semlüh hek yoshaibouei yoshaibü tegü kaibü ik nyibou sepeiashi.”

¹⁰Haoenei ngüha leko ditlabü lele ngei aoyou to joyola? Chühashi, haoeneibü nou saklep- akei, hoba haoenei ditla athük. Chühashi, BUNYUBOUeibü ngüh haoen thedanga hakbü la yeian kia; khonei haoen olinbü aki.

¹¹Khei yingbü khoei BUNYUBOUeibü khauangei ngo shenakei, hoba kho ngei natenla athük. Kheijinei BUNYUBOUei kü to laukei, “Khongtanga nashousi shuong to hoba heshou shuong to liko shaian kibü thükto khüpan jinkushi; yaksilaonyi ham chingbü jaishou sinbü laplanglabü.

¹²Hobaje haoeneibü phangshuong, haoeneibü sek hoba haoeneibü yaksi shuong yoan müla kulabü. Aieilausi kaonyeka kibü thükto ngei ngeibü ik shinglabü,” dogo BUNYUBOUei lauda.

¹³“Aishanga haoen hanbou ka yaangbou sühko mütpem weko thedüh maangdüh aeto hauakei, hoba thuseibou ka khei ungshedbou sühko mütpem wekoei yepeijaweko jungeida.

¹⁴Kü mütli nouyangshoueibü moukhün haoenei sosotham maitian lenda. Sangmaije akinyu haoenei, ‘Sangmai, sangmai,’ dogo lauda.

¹⁵Mangsenlabü kümsilei shuong kümjinei haoen himouko kikei sai? Aying, haoen aikei himouko ayingsi the menko akitei. Hibü tuongbü shuong yoa haoen tuonglabü; ngei haoen shieinangeijinei haoen tuongtilabü,” dogo BUNYUBOUei lauda.

¹⁶BUNYUBOUei hai lauda, “Kü lampheka loashi, hoba chühashi, shangiedbü lam lan maibü ki kho pheashi; hoba khonei paiashi, hoba kaneibü soushou shanga hakso haplabü. Lausikei haoenei laukei, ‘Kün apailabü.’

¹⁷Ngei kan thüka lombü phokuko laukei, ‘Teklaang ngüh ditashi!’ Lausikei haoenei laukei, ‘Künei aditlabü.’

¹⁸“Hibü ditashi, O phangshuong; O saopobü thangyenbü shuong, haoen to ai loushedlaje ngeashi.

¹⁹Ditashi, O kaodak: chühashi, ho mütli thükto ngei amaibü, khei haoeneibü dambü hek sungbakulabü, aieilausi haoenei ngeibü ngüha ale; hoba ngeibü ngühkhüm le haoenei tekan apbei.

²⁰Aineilela Sheba ka jen hoba kaodak saabü ka ponlem hibü hongkung teibü jungan kü jungto louda? Kaneibü juokbü lembü sungletla athük ayingsi haitibü lembü kü thedanga olinbü aying.”

²¹Khoei BUNYUBOUei hai lauda, “Chühashi, ngei ho mütli thedanga phaiyetlabü phokulabü; hoba bousi shuong hoba shousi shuong liko khünei phaiyetlabü; lepbou hoba haoeneibü thangbou maulabü.”

²²BUNYUBOUei hai lauda, “Chühashi, yungkük aeka mütli che louada hoba kaodak janyinbü thonbü ka phang yaangbü che meimeida.

²³Haoenei lau hoba aubu jungda; haoen to onou aki, hoba üeisanou aki, haoeneibü ngüh yungnyu tegü ngühda; hoba haoen kolia setda; ka khu limbo lason to haubü müt tegütham müt lamlebüa kia, O Zion nouyangshou.”

²⁴Künei haoeneibü ngühlang dida, hoba küneibü ik hau akiko apa; khonkubü hoba yaksa na hapjinei khonsakbü tegü kün to maang alembo hatyolanga.

²⁵Sek to tekou ayingsi lama tepai, aishanga khünei dangboueibü in hoba pendou aenei hatlabü kia.

²⁶O ngeibü mütli nouyangnyu, nyi senounei neiashi, hoba no lolo tapa lekeiashi; no mang haapashi, jayangshou shanga tegü haapashi; aieilausi sen thükto maulabü ong hakde loulabü.

²⁷“Kü mütli yoa ngei no khei nyi ngela hoba haoeneibü lamthen takteilabü lele ngei laangbob hoba lapheishon che yeitikei.

²⁸Haoen pendou songdak khulimbo longda, sukjung ngaian paibü shuong yoa shoongaibü shuong. Haoen chisak nam hoba namkung ki; haoen pendou amaiko jungeida.

²⁹Wanei wan metjin kho juokda, namphet khoje wanei tühnyinakei, lausikei jim akibüa haoenei athakko saüenda; aieilausi amaibü khoje sungan üpbo kia.

³⁰Mütei khübü to chandinam namphet dogo lauda, aieilausi BUNYUBOUei haoen inletkei.”