Read Chang Naga JEREMIA 7 Bible Online

JEREMIA 7 - Chang Naga bible

JEREMIA 7

¹BUNYUBOU ka Jeremia jungto loubü ngüh;

²“BUNYUBOUeibü bakhüna loashi, hoba khünei kho phinthonashi, hoba lenashi: ‘BUNYUBOUeibü ngüh ditashi, BUNYUBOU to lemla habü bakhün phangto lotbü kan Jihudabü pendou.’

³Thükenbou BUNYUBOU Israel Mühghaüei hai lauda: Kaneibü haang hoba kümsilei shu- ong kümetashi, hoba ngei hanei kan kitilabü.

⁴‘Ho BUNYUBOUeibü lembüchem, BUNYUBOUeibü lembüchem, BUNYUBOUeibü lembü- chem!’ dogo lauko amlangbü ngüh to kanei maitelem.

⁵“Aishanga kanei kaneibü haang shuong hoba kümsilei shuong maisho kümedalonga, kanei müt che hoba haoeibü lepbü sangmang kanglanga ngühmai kümalonga,

⁶kanei yenbou, bou akibü hoba latnyu khon akutilonga, hoba kanei shed akibü sii üangtilonga ayingsi kan jembü khonkulabü lele lubü mühghaü phai asemlonga,

⁷kheijinei ngei kaneibü pisibou la shangieda ponpen shanga kubü kaodaka ngei kan kitilabü.

⁸“Chühashi, amlanga khüpettibü ngüh kanei mailemda.

⁹Kanei kokda, müt haitida, hoba asangalanda hoba yepeijaweko thelalanda, hoba Baal shanga jen juokda hoba kanei angebü küksithang mühghaü shuong phaito paida,

¹⁰hoba kho phaia ho chema, laobou kü Nyenei ngaan ki, khüto louan loda hoba, ‘Kün khümenakei!’ dogo lauko khübü mangsenlabü pendou kümlep lo?

¹¹Ho chem laobou kü Nyenei ngaan ki, ka thedanga soshau soyungbü laangbob che la yeikei sai? Chühashi, ngei kho hapa! dogo BUNYUBOUei lauda.

¹²Lausikei tou ngo kishang laobou Shiloa kikei khüto kan hauashi, lanei ngei ngeibü Nyen shaanglaje kiteikei, hoba ngeibü mütli Israel amaibü shanga ngei khüto ai kümbei chühashi,

¹³hoba tou BUNYUBOUei lauda, Kanei habü kümsilei pendou kümbo kisije ngei ngeyang enyu hoba phaisho kan to joyokei, lausikei kanei ngüha ale; hoba ngei kan ngakei, lausikei kanei ajongai.

¹⁴Hibü ho chem laobou ngeibü Nyen nyenan ki, laoboua kanei maanglem phoda, kishang laobou ngei kan la hoba kaneibü pisibou la kukei, ngei Shiloa kümbü tegü ho chem hoba ho kishang to kümlabü.

¹⁵Hobaje ngei kü thedang ka kaneibü chempen pendou tekan aplabü, khei Efraim chung khümbo nangletbü tegü ngei kan nangletlabü.”

¹⁶BUNYUBOUei laukei, “Hibü ho mütli shanga tesuteja, ayingsi haoen shanga ngüh teku, ayingsi tewelauku; ayingsi kü to tesutejaku, aieilausi ngei ka to ngüha alelabü.

¹⁷Jihuda sangnyu shu- ong hoba Jerusalem khongnyua haoenei ai kümda nyi ühüpda lo?

¹⁸Khuthükbü Chobasao la wentek ngoukula shanga, nashousi shuongei bu lakda, bou shuongei wan metda, hoba yaksa shuongei wen nyatda. Ngo khauangtilabü lele haoenei lubü mühghaü shuongla yunglabü lembü khü- pan jinkuda.

¹⁹Hoei haoenei ngo ong khauang longtida sai? dogo BUNYUBOUei lauda. Hoei haoenei haoen thükto himou sungbalabü lele kümda aying lo?

²⁰Hibü BUNYUBOU Mühghaüei hai lauda: Chühashi, ngo khauangbü hoba ngeibü khauang maangpok, ho kaoena müt thükto hoba meisiau thükto hoba yama bulong thükto hoba kaoa buhek thükto haulabü hoba kho anyettienko laaklabü.

²¹“Thükenbou BUNYUBOU Mühghaüei hai lauda: Kaneibü juokbü lembü shuong haitibü lembüa jinashi, hoba phe kho shauashi.

²²Aishanga Ijep kaodak ka kaneibü pisibousi shuong leian longjinei juokbü lembü ayingsi haitibü lembü shanga ngei haoen to ajoyo ayingsi asakku.

²³Lausikei ho sakkubü ngei haoen la kukei: Kü ngüh ditashi, hoba ngo kaneibü Mühghaü hoba kan kü mütli yinglabü. Ngei kan la sakkubü lamnyu pendoua paiashi, khünei kan maian kilabü.

²⁴Lausikei haoenei ngüha ale ayingsi nou ühangku; khüpeinyu, haoenei jembü songadoa hoba haoeneibü sensimaang amaibü kaangbüa haoen paikei. Thedang ae aying, phai aeto haukei.

²⁵Kaneibü pisibou Ijep kaodak ka longbü chalou ka tat sühko ngei kan jungto ngeibü khangenbü hoba thuseibü pendou chalou weko hautidang lekei.

²⁶Khei yingasikei haoenei kü to adit ayingsi nou ühangku, lausikei haoen ngüm kaangtikei hoba haoeneibü pisibousi toje haoenei aei amaibou kümbei.

²⁷“Ladang nyi habü ngüh pendou haoen to lenlaje haoenei ka to kei ngüha alelabü; ladang nyi tokei haoen to ngalaje haoenei ka to ajongailabü.

²⁸Hobaje nyi haoen to laulabü: Ho mütliei BUNYUBOU haoeneibü Mühghaüeibü ngüh adit, ayingsi songlen asunglet. Haoeneibü sembung ka ngühmai maua; hoba haoeneibü lishang ka ho maua.

²⁹“Kaibü khu shuashi, O Jerusalem, hoba kho tekan apashi, hoba shonghkhua manghaap chia laushi; aieilausi BUNYUBOUei haoeibü khauang phanga kibü meten asunglet hoba nangletkei.

³⁰“Aishanga Jihudabü shousi shuongei kü thedanga amaibü kümbei dogo BUNYUBOUei lauda. Kü Nyenei ngabü chem kho shatila haoenei mangsenlabü heangsho shuong phokei.

³¹Hobaje haoeneibü shousi shuong hoba nouyangshou shuong wana jikla Ben Hinnom Yoa Tofet lemshang shongh kümbei; laobou ngei asakku ayingsi ngeibü maangto alotko kikei.

³²Hibü chühashi, BUNYUBOUei lauda: Khei touje ho to Tofet ayingsi Ben Hinnom Yo, dogo alaulabü, lausikei Haitibü Yo, dogo nyenlabü; aieilausi haoenei Tofeta mang khünshang akiko üpshongko khünlabü.

³³Hobaje ho mütlieibü haibü mang shuong kho mühkabü au hoba kaodak kabü meisiau shuong shanga shausiyung yinglabü hoba aieikei haoen aphangnyintilabü.

³⁴Kheijinei ngei Jihudabü sangnyu shuong ka hoba Jerusalem khongnyu ka olinyobü ngühlang hoba chemkanbü ngühlang thaktilabü; aieilausi kaonyek kho sangliphang la yeitilabü.