Read Chang Naga JEREMIA 8 Bible Online

JEREMIA 8 - Chang Naga bible

JEREMIA 8

¹“Kheijinei, BUNYUBOUei lauda: Jihuda Choba hoba haoeneibü konglebü shuongeibü lo, haoeneibü ungshedbou shuongeibü lo, haoeneibü thuseibü shuongeibü lo hoba Jerusalem mütshuongeibü lo haoeneibü hee ka haoenei sungenlabü.

²Hobaje khübü kho chanyu litnyu hoba müha kibü khanshoulitshou pendou thüka phinan aplabü, laobou to haoenei sanoukei hoba phai sembei hoba pheyolamyokei, hoba lembei. Khübü kho ayoshailabü, ayingsi akhünlabü, lausikei khongdanga od hima apyolabü.

³Hobaje ngei shian apshang pendoua ho phang amaibü jouan kibü pendouei langkei toje haibü ong pienlabü dogo Thükenbou BUNYUBOUei lauda.”

⁴Tokei nyi haoen to lauashi: BUNYUBOUei hai lauda, “Müt tuongan nyibou apingaida sai? Müt che satsi nyibou alongeida lo?

⁵Khülonga aila Jerusalema ho mütliei ponpen phai sukjung ngaida? Khüpsilang kaangkhühtham haoenei hatlepda, haoen nyibou tesepeikho lauda?

⁶Ngei nou haangan ditko kikei, lausikei haoenei tükde alau. Müt aoeikei, ‘Ngei ai kümbei,’ dogo lauko jembü amaibü ka maangpon asepeida. Lason to nyujung atbü koli tegü mütpem weko jembü lam to sepeida.

⁷Haü, müha yungauei mangkei jembü chasilit takletbü ngeda; dukutuk, lolenshang hoba yungauei haoen loubü jihsiphai jungeida. Lausikei kü mütliei BUNYUBOUeibü jaletbü ngühkhüm angeda.

⁸‘Kün songsi- hona keibü ki, hoba BUNYUBOUeibü ngühkhüm kün yoa kia,’ dogo kanei lai laula? Lausikei chühashi, dobou shuong amlangbü dojinei kho khüpeinyu aptia.

⁹Songsihon kibü mütshuong himou baulabü, haoen phenyembo hoba mokde apyoakei; ditashi, haoenei BUNYUBOUeibü ngüh apyokei; hoba ailaibü songsihon haoen to ki?

¹⁰Hibü ngei haoeneibü yaksi shuong lubü la kuan aplabü, hoba haoeneibü sek haoen thükbü la kuan aplabü, aishanga mütpem weko hanbou ka yaangbou sühko aeilam aeiphopei shenan kia; khei, thuseibü ka ungshedbou sühko mütpem wekoei yepeijaweko kümda.

¹¹Ngeibü mütli nou- yangnyueibü mou haoenei sosotham maitian lenda hoba sangmaije akinyu, ‘Sangmai, sangmai,’ dogo lauda.

¹²Haoenei mangsenlabü jungeijinei haoen himoukei sai? Aying, haoen aikei himouko akitei; ayingsi lai the menla khokei haoenei angekei. Hibü tuongbü shuong yoa haoenkei tuonglabü, haoen shieikoejinei haoen phangto sungyanlabü, dogo BUNYUBOUei lauda.

¹³“Ngei haoen lemailela mautilabü, dogo BUNYUBOUei lauda. Lüha semlüh hek akilabü. Bhuklonga bhukhek akilabü, hoba yik kho yuian aplabü. Ngei haoen la kubü peisilei shuong haoen ka sungngaian aplabü.

¹⁴“Sen tokei aila setan kida? Liko kamshaiashi! Sen thangngaian kibü sangnyu khüto atkho hoba sen khünei shemkho! Aishanga BUNYUBOU seneibü Mühghaüei sen shemla tetkukei hoba dei khauekbü yungla sen la kukei, aieilausi senei BUNYUBOU khulimbo shabü shonkei.

¹⁵Senei hakso lambei, lausikei ai maibou alou, hoba mailabü chalou lambei, lausikei chühashi, hatla moklabü yaang.

¹⁶Haoeneibü kolieibü kunga wibü Dan ka ditda; hau kibü koli shuong wiyobüei kaonyek khümbo lühda. Aishanga, kaonyek hoba khünei kibü pendou suila, sangnyu hoba khünei kibü mütshuong pendou suila haoen lousüha.

¹⁷“Aishanga chühashi, ngei pinyu hoba lüh kibü pinyu hautilabü, deipi shuong ngoutila athük; hoba khübü khoei kan to püplabü,” dogo BUNYUBOUei lauda.

¹⁸Aiwaü! ngeibü maangmau yongko yaanga, ngeibü maangpon maang aenei semthetda!

¹⁹Ditashi! Kaodak aeibou saabüa ngeibü mütli nouyangshoueibü ngühlang, BUNYUBOU Ziona aki lo? Saoeibü Chobasao to aki lo? Aila haoenei ngo heangsho noksaei, hoba küksithang amlangbü kümsileiei maangto shatko khau angtida?

²⁰“Youlat jih dana sulang dana hoba senje akhümenkei.”

²¹Ngeibü mütli nouyangshou leilubü hangshong ngeibü maangpona akakei; ngo manghaapda, hatla moklabüei kü to süha.

²²Gileada maitilabü moli aki lo? Khonei moli ngebü aki lo? Khülonga aila kü mütli nouyangshou shat amaida?