Read Chang Naga ÜGÜTÜ 2 Bible Online

ÜGÜTÜ 2 - Chang Naga bible

ÜGÜTÜ 2

¹Ügütü, BUNYUBOUei hao khau lotjinei sangmei nakthühei Zion Nouyangshou küplepbei. Müh ka kao sühko haoei Israel hemaisaomai yantikei. Hao khauang longbü chaloua haoei haoeibü lembüchem adamen.

²Jakob kishang pendou BUNYUBOUei onou akiko mautia; hao khauangbüei Jihudabü Nouyangshoueibü lapheishon shuong tuongtia. Kao sühko sangle hoba haoeibü songdakbü shuong himou to yantia.

³Haoeibü khauangei Israelbüeibü hau yaangbü pendou haoei wapan attia. Dangbou shuong thedanga haoei jembü mae ik haoen ka sungngaia. Longan kibü wan tegü Jakob lonshema, kaijembo kibü pendou haoei lonshemtia.

⁴Dangbou cheei tegü haoei haoeibü lau bühkei, hao haoeibü mae ik lamlean loakei. Haoeibü nyekei maikubü pendou haitia; Zion Nouyangshoueibü neichem to haoei haoeibü khauang yeian jinkukei.

⁵BUNYUBOU kho dangbou che tegü yeia, haoei Israel leilutia; haoei chobasaoeibü chem pendou leilukua; haoei saoeibü lapheishon shuong netla yeitikua. Hobaje Jihudabü Nouyangshou shuong la haoei manghaapbü hoba waangbü aei yeitia.

⁶Bamanga haoeibü chemshou phatko kibü lembüchem kho haoei pana; haoei haoeibü lemshang kaoen leilua. Ziona lemlishang hoba Nounyet lemshang BUNYUBOUei thaktia. Hobaje hao hatlamoklabü khauang longbüa choba si ungshedbou shuong nyikula yeia.

⁷BUNYUBOUei haoeibü lemshang tekan apa, haoei haoeibü saoposhang inleda. Saoeibü kümthang shuong haoei dangboueibü ik to kuan apa; BUNYUBOUeibü chema saopobü lemnyet tegü lemenbü ngühlang longan kikei.

⁸Zion Nouyangshoueibü kümthang kho leilukulabü; BUNYUBOUei maangangena, haoei lüh jena; leilutila kibü ka haoeibü ik asenngai. Lapheishon maang hoba kümthangei mang haaplabü lele haoei yeitikei hoba haoen liko hau thetkei.

⁹Saoeibü bakhün kaomangto atda, haoei saoeibü koukhin mautikukei hoba leilutikua; saoeibü choba leiyeibü shuong kho ngühkhüm akibü shuong phang yoa kia; haü, saoeibü thuseibü shuongei BUNYUBOU ka mangsang ühüpda.

¹⁰Zion Nouyangshou noushou shuong kaoa setda; hoba haoen ngüh üangko kia. Haoenei haoeneibü khua tap phinan jinakei haoen haoen lolo shembe lokakei; Jerusalembü medei shuongei himoubüei haoeneibü thenyek küplepakei.

¹¹Ngeibü nyeka nyeksi dangda, ngeibü maangpon jitnyina. Ngeibü mütli nouyangshou leilubü shanga ngeibü maangpon kao to atakei; aieilausi hanbü shuong hoba senyopbü shuong sangnyua semthetan kia.

¹²Leilubü müt tegü sangnyu khongnyua haoen semthetnyu kijinei; haoeneibü langkei haoeneibü khukua nongan kijinei nyusi shuong to haoenei lauda, “Nyak si ih lanei ki?”

¹³O Jerusalem Nouyangshou, ka shanga ngei ai laula, no ai to takteiyola? O Zion Saosüngnyu, no solotila ngei no ai to takteiyola? aishanga yungnyu tegü no leilubü yaang kia, no aoei maitienla?

¹⁴Kaibü thuseibü shuongei ka shanga kongbü hoba leilubü mangsang hapa; kaibü thu kümetlabü lele haoenei kaibü shedshonbü tang akhittiku lausikei ka shanga kongbü hoba ayingbü onat ong hapa.

¹⁵Lama paibü pendouei ka la ik ipbuda; Jerusalembü Nouyangshou to haoenei hish dogo khu ngombukei, hoba lauda, “Chühseko hesisao maibü, hoba kaodak pendou olinshang sangnyu dogo mütei laueibü sangnyu kho ho si?”

¹⁶Kaibü dangbou pendouei no khulimbo nyikuda; haoenei hish dogo hauh takyoda hoba haoenei lauda, “Künei sao suia, ho künei chüheibü chalou kho ki; ho küneibü, ho künei hapa.”

¹⁷BUNYUBOUei haoeibü kümthen tegü küma; shangied haoei sakkubü tegütham haoeibü ngüh haüthüka; haoei onou akiko tonan yantia; hoba ka thüka dangbou shuong haoei olintia.

¹⁸Haoeneibü maangponei BUNYUBOU to ngekkei; O Zion Nouyangshou kümthang, shumang tegü changenangnak nyeksi koutishi; no lolo sangsembo teki, kaibü nyek haksoko tekiti.

¹⁹Meimeiashi, chasem khangbü jih ka nangnak ngekashi; BUNYUBOU junga kaibü maangpon, dei tegü jonan koutiashi; kaibü shousi shuong langkei shanga khongnyu weko lambheka, mühei haiko nyengko kibü shanga kaibü ik hao jungto tuokashi.

²⁰Chühashi, O BUNYUBOU, aoto nyi hai kümbei chühashi, yaksa shuongei haoenei bukletbü haoenei thounouko thuibü shaulep lo? Ungshedbou si thuseibü BUNYUBOUei lemshanga haitilep lo?

²¹Khong kabü thamngua nashou si chingbü haian yepakei ngeibü heshou hoba ngeibü medei shuong inei tuongakei; no khau longbü chaloua onou akiko nyi haoen haitikei.

²²Saopobü lemnyet tegü ngeibü hatlamoklabü pendou aeka nyi ngashaikei; hoba BUNYUBOU khauang longbü chaloua aokei asaten ayingsi ajou; aoyou ngei thuiko pangteikei ngeibü dangbou shuongei mautikei. Mühghaü maangshat julo phanga kayang hapbou müt kho ngo ki;