Read Chang Naga ÜGÜTÜ 3 Bible Online

ÜGÜTÜ 3 - Chang Naga bible

ÜGÜTÜ 3

¹Ngesakbü akiko nakthühshang to haoei ngo shian jinkei.

³Maimaitham ngo khulimbo chaseko haoeibü ik sepeitaiko leda.

⁴Ngeibü phe hoba ngeibü khon haoei haman apbua, ngeibü lo haoei leilutikua.

⁵Haoei ngo khulimbo komlepbei, hoba khauekbü sii khonkuei kailepbei.

⁶Haian lounyu apyobü phatko, haoei ngo nakthüh phanga kitikei.

⁷Ngo alongenlabü lele haoei ngo kailepbo taklepbei; haoei kü la yangmen atshaibü jinkukei.

⁸Haü, ngei thuibü hiko ngekjinei haoei ngeibü welau asungletda.

⁹Thüngbü laangei ngeibü lamnyu haoei lelepa; haoei ngeibü lamnyu komettham aptikei.

¹⁰Sapei thoan haiteibü tegü, molosaonyu cheei huan haiyeibü tegü kü thedanga hao kia.

¹¹Haoei ngeibü lamnyu pekseknyu apbua hoba ngo netla yeitia.

¹²Haoei haoeibü lau büha hoba laujin khoei kü to takda.

¹³Haoeibü lauphot ka laujinei haoei ngeibü maangpona yontia.

¹⁴Ngeibü mütli pendou shanga nyikushang ngo yeitia; hoba chaseko haoeneibü akainyu chia la yeitia.

¹⁵Haoei ngo khauekbüei shentikei, haoei ngo khauekbü deiei oan sheman aptikei.

¹⁶Laangminshouei haoei ngeibü hauh leilutikua, haoei ngo tapei jonlepa.

¹⁷Ngeibü soushou hakso ühüptiko kia, olinbü kho ai yingkeije ngei maa.

¹⁸Hibü ngei lauda, “Ngeibü soneikangbü maua, hoba BUNYUBOU ka ngeibü maanglem aki.”

¹⁹Ngeibü khonsak hoba ngo khonku khauekbü dei hoba khaubü damenshima.

²⁰Ngeibü soushouei ho shanga athakko damda, hoba kü to maiko nopda.

²¹Ho ngeibü maangpon to louda, hibü ngei maanglem kia.

²²Sen amauko kibü kho BUNYUBOUeibü sanou danko ki; aieilausi haoeibü onou ladangkei athonda.

²³Ngeyang weko haoen haanbü; kaibü maanglemenbü yaang kia.

²⁴Ngeibü soushouei lauda, BUNYUBOU ngeibü phejan, hibü ngei hao to maanglemlabü.

²⁵Hao shanga haiyeiko kibü shuong to, hao lambü soushou to BUNYUBOUei maida.

²⁶Mütei BUNYUBOUeibü khümenbü shanga maanglemlabü, hoba ngüh üangko kila maikei.

²⁷Mütao jiha buleng atshaibü pelabü kho müt che shanga maiakei.

²⁸Hao mütpem ngüh üangko settiashi, aieilausi kho haoei kala küntia.

²⁹Hao sembung thama yontishi, khei yingalonga maanglem kila thükkei.

³⁰Aoei hao to ipda, hao jungto omlang thoashi, hoba hao ngühthemei shentishi.

³¹Aishanga BUNYUBOUei ponpenje ainletlabü.

³²Aishanga haoei maangto shattiasikei, khei yingsikei haoeibü üeisanou souko kibü thüng haoeibü onou kilabü.

³³Aieilausi haoei kheiongje khonsak akuda, ayingsi müteibü shousi shuong maang angangtida.

³⁴Kaodakeibü thüngbü shuong pendou youphanga nyuinyinlabü.

³⁵Thükkabou junga müteibü janbü kümsilei apbulabü.

³⁶Müt che haoeibü janbü kümsilei sepeisaila BUNYUBOUei asungletda.

³⁷BUNYUBOUei asakku tegüje aoei sakkuan kho haüthükko loula?

³⁸Maibükei amaibükei loubü kho Thükkabou ka aying lo?

³⁹Aila lang kibü müt cheei jembü shabü shanga shieikoesi nyamnyamla?

⁴⁰Senei lambho hoba seneibü lamnyu takteikho hoba BUNYUBOU jungto nyibou ngaikho.

⁴¹Seneibü maangpon hoba seneibü ik, khuthük kabü Mühghaü jungto senei tonenkho.

⁴²“Künei shabü shonkei hoba khulimbei, hoba O BUNYUBOU, nyi küneibü shedbü amai üpbu.

⁴³“Nyi kün shibakei hoba kün haitikei; kaibü khauang maangpokei kaibü üeisanou küplepbei.

⁴⁴Küneibü welau danko alouenlabü lele nyi no lolo sangmeiei yuklepbei.

⁴⁵Phangshuong yoa nyi kün odsinot tegü yeitikei.

⁴⁶“Küneibü dangbou pendouei kün khulimbo haoeneibü sembung ipakei.

⁴⁷Hatbümokbü püngkhün lemenleenbü hoba leilubü kün thükto louakei.

⁴⁸Ngeibü mütli nouyangshou maubü shanga ngeibü nyek ka nyeksi shumang tegü kouda.

⁴⁹“Khuthük ka BUNYUBOUei chühyantiko achühshongko

⁵⁰Ngeibü nyek ka nyeksi athakko koulabü.

⁵¹Ngeibü sangnyu nouyangshou shuong laüa ngeibü nyekei ngeibü soushou maangshat khangtida.

⁵²“Ai ayingnyu ngeibü dangbou shuongei au che tegü ngo shieikei.

⁵³Püngkhün to haoenei ngeibü langkei yaüan jinkei, hoba kü thükto laang sonan jinkukei.

⁵⁴Deiei ngeibü khu danglepbei, hoba ngei laukei, ngo akisap.

⁵⁵“Phangkabou püngkhün ka ngei no ngakei, O BUNYUBOU,

⁵⁶Thuibü shanga ngei ngekjinei nyi kü ngüh ditkei, nyi kaibü nou teküpletma.

⁵⁷Ngei no ngajinei no nyangko loukei, hoba nyi laukei, ‘Tehütma.’

⁵⁸“O BUNYUBOU, nyi kü soushou shanga pü lekua, nyi ngeibü langkei angtheda.

⁵⁹O BUNYUBOU, nyi kü to kümbü shedbü hapa nyi ngeibü mat jembüma.

⁶⁰Ngo khulimbo haoeneibü phoklambü hoba haoeneibü huon pendou nyi hapa.

⁶¹“O BUNYUBOU, haoenei hakbü hoba ngo khulimbo haoeneibü huonsiyou pendou nyi ngekei.

⁶²Chaseko no khulimbo meimeibü shuong sembung khop, hoba haoeneibü dambü ngo khulimbo ong ki.

⁶³Haoen setbü hoba haoen loenbü to chühshi, ngo haoeneibü akhainyu chia la yeia.

⁶⁴“O BUNYUBOU, haoeneibü kümsilei thüng, nyi haoen la ngaingouashi.

⁶⁵Kaibü shedsikhau haoen thüka kitishi, hoba nyi haoeneibü maangpon nyibutham yeitikushi!

⁶⁶O BUNYUBOU, nyi haoen khauangko shilangashi hoba kaibü kaonyudak ka haoen mautishi!”