Read Chang Naga ÜGÜTÜ 4 Bible Online

ÜGÜTÜ 4 - Chang Naga bible

ÜGÜTÜ 4

¹Ügütü, hon kho ailabü son satkei; hinseibü son kho lai küman jeileikei! Khong wekoa lampheka saopobü laang shuong lai phinnyinan ki.

²Ügütü, Zion sangnyubü shousi shuong, hon shanenbü to takteila thükbü, chak yaübü ikei kümbü kümsileil lai thamchak tegü weeida.

³Khei selong shuongeikei sendei kuda, hoba haoeneibü shoushou sena yopda. Lausikei yama ostrik aushuong tegü, ngeibü mütli nouyangshou shuong onou akiko yeia.

⁴Deilabüei senyungbü nashou, lishang ngeia khipakei; nashou hanbü shuongei nyak hida; lausikei aoeikei haoen la peian akuda.

⁵Haabüteibü shaubüyungbü shuong kho khonga shemda; shanenbü neisimei thüka chingenbü shuong odsinot apshanga leketnyu yepan kia.

⁶Aishanga, haoeneibü shabü laüa shieikoebü Sodom toje kü mütli nouyaangshou shieikoe yangbou; laobou hakde ong Mühghaü ikmaanga thonshang to loukei.

⁷Saopobü chobaeibü shousi shuong, ninthu tokei hinseibou, sendei tokei haoen hinseibou kikei. Namseklaang tokei haoeneibü mang maietnyu mütsak angetnyu kikei; haoen hemai saomai kho, safir namsek laang phatko kikei.

⁸Tou haoeneibü thenyek wankak tokei nakhübou; khonga haoen achühenda, haoeneibü khon loa ong yukakei. Pheijung ngaiakei, ju tegü linjung ngaiakei.

⁹Mühei nouei koplintham apan, sek ka buhek deihek ühüpbo haibü toje inei haibü maibou ki.

¹⁰Onou kakbü nyushuongei haoeneibü ikei haoeneibü shousi shuong shaula thungkei. Ngeibü mütli nouyangshou mautida, nashousi shuong kho saoeibü shausiyung yeikei.

¹¹BUNYUBOUei haoeibü khauang longa, haoei haoeibü kaangbüsekbü khauang longbü hakletkua hoba haoeibü Ziona wan che sapbei khoei chemshang kho lona.

¹²Jerusalem bakhün to dangbou labou lotlabü dogo, kaodakbü choba shuong ayingsi kaodak mütli shuong aoeikei maialem.

¹³Ho saoeibü thuseibü shuong shabü haangjung hoba saoeibü ungshedbou shuong shedbü shabü haangjung; haoeibü saopobü shuongeibü sii sao kishanga phinkei.

¹⁴Kongnyua nyekthubü tegü haoen shoongaida, haoen siiei naanglepakei; hibü aoeikei haoeneibü neiameia meitila athükda.

¹⁵Haoenei haoen to ngetikei; “Kan kukashi, kan asaopo, kukashi, temeiti!” Hibü haoen linan shoongaibü la yeikei; mütshuongei phangshuong yoa laukei, touje haoen sen yoa akitilabü.

¹⁶BUNYUBOUei haoei lolo haoen aatikei; touje haoei haoen alomlabü. Ungshedbou shuong la haoei soumo alen hoba jaishou shuong to haoeibü maangshik alen.

¹⁷Künei jim akibü thuibü shanga haiyeijinei küneibü nyekei atin; püetla athükbü phang shanga ong, künei maanglembo haiyeia.

¹⁸Kün khong to asatenlabü lele haoenei küneibü youmo phanda; küneibü chalou tetetnyu weenakei, aishanga küneibü thonbü süha.

¹⁹Kün shieibü shuong kho müha aulu tokei sobüsepbü shongh thük ka haoenei kün shijung loukei. Yamlama haoei kün la thokukei.

²⁰BUNYUBOUei naangenko pienbü küneibü choba haoeneibü püngkhüna atakei; ao shangabü künei, “Haoeibü yeme phanga phangshuong yoa kün kilabü” dogo laukei.

²¹Olinangko kishi hoba olinashi, Uz kaodaka kibü, O Edom Nouyangnyu. Lausikei thung kho ka jungto lousühlabü; no jaaklabü; hoba no lolo mütkong aplabü.

²²O Zion Nouyangshou, kaibü shabü shieikoe thona, haoei touje no thüngshang to leian ohaulabü. Lausikei, O Edom Nouyangshou, haoei kaibü shedbü peanchühlabü; haoei ka shabü phanenlabü.